Kiitanchchatu Halaqaa Mikaaˈeeli Oonee?

MIKAAˈEELA geetettiya ayyaana meretaa sunttaa Geeshsha Maxaafay darosan denttenna. Gidikkonne, a sunttaa denttiyo sohuwan ooso bolli deˈishin bessees. Daaneela maxaafay Mikaaˈeeli iita ayyaanatuura olettiyoogaa, Yihudaa maxaafay i Seexanaara palamettiyoogaa, Ajjuutaa maxaafay qassi Dabloosaaranne a daydanttatuura olettiyoogaa yootees. Mikaaˈeeli, Yihoowa aysuwau mootettiyoogaaninne Xoossaa morkketuura olettiyoogan, “Xoossaa Mali Ooni Deˈii?” yaagiya ba sunttaara moggiyaaba oottiis. SHin Mikaaˈeeli oonee?

Issi issi asatussi baggaade issuwaappe daro sunttay deˈees. Leemisuwau, Ibraawetu aawatuppe issuwaa gidida Yaaqoobi, Israaˈeelakka geetettees; qassi Yesuusi kiittido PHeexiroosi Simoonakka geetettees. (Doomettaabaa 49:1, 2; Maatiyoosa 10:2) Hegaadankka Mikaaˈeeli, saˈaa yaanappe kasenne saˈaappe bi simmidi Yesuusi xeesettiyo sunttaa gidiyoogaa Geeshsha Maxaafay bessees. Hegaadan kuuyana mala oottiya Geeshsha Maxaafaa naqaashata ane beˈoos.

Kiitanchchatu halaqaa. Geeshsha Maxaafay Mikaaˈeela “kiitanchchatu halaqaa” yaagees. (Yihudaa 9) Mikaaˈeeli kiitanchchatu halaqaa geetettidoogaa akeeka. Hagee a mala kiitanchchi haray baynnaagaa bessees. Geeshsha Maxaafan “kiitanchchatu halaqaa” yaagiya qaalay selliyaa malaatidippe attin, coraa malaatidi gelibeenna. Hegaa bolli, Yesuusikka kiitanchchatu halaqa gidiyoogee qoncciis. Yesuusi hayquwaappe denddi simmin, ayyo deˈiya sohuwaa xeelliyaagan 1 Tasalonqqe 4:16y: “Godai ba huuphen azazuwaara, kiitanchchatu halaqaa cenggurssaara . . . saluwaappe wodhdhana” yaagees. Hegaa gishshau, Yesuusa cenggurssay kiitanchchatu halaqaa cenggurssa gidiyoogaadan odettiis. Hegaa gishshau, ha Geeshsha Maxaafaa xiqisee, kiitanchchatu halaqaa Mikaaˈeeli ba huuphe Yesuusa gidiyoogaa qonccissees.

Olanchchata Kaalettiyaagaa. Geeshsha Maxaafay: ‘Mikaaˈeeli ba kiitanchchatuura issippe miimminttiyaaranne . . . a kiitanchchatuura’ olettidoogaa yootees. (Ajjuutaa 12:7) Hegaa gishshau, Mikaaˈeeli ammanettida kiitanchchatu olanchchata Kaalettiyaagaa. Ajjuutaa maxaafay, Yesuusikka ammanettida kiitanchchatu olanchchata Kaalettiyaagaa gidiyoogaa qonccissees. (Ajjuutaa 19:14-16) Yesuusi kiittido PHauloosi, “Godai Yesuusi ba wolqqaama kiitanchchatuura” gidiyoogaa qoncciyan yootees. (2 Tasalonqqe 1:7) Yaatiyo gishshau, Geeshsha Maxaafay Mikaaˈeela ‘ba kiitanchchatuura,’ Yesuusakka ‘ba kiitanchchatuura’ gidiyoogaa yootees. (Maatiyoosa 13:41; 16:27; 24:31; 1 PHeexiroosa 3:22) Saluwan deˈiya ammanettida kiitanchchatu olanchchatu issi citaa Mikaaˈeeli kaalettin haraa qassi Yesuusi kaalettin, eti naaˈˈu citan shaahettidoogaa Geeshsha Maxaafay awaaninne bessenna gishshau, Mikaaˈeeli saluwan ba aawatettan deˈiya Yesuus Kiristtoosa malaatees yaagidi kuuyiyoogee bessiyaaba. *

[Tohossa qofaa]