“SHemppuwaa” nne “Ayyaanaa”—Ha Qaalatu Birshshettay Tumuppe Aybee?

NEENI “shemppuwaa” nne “ayyaanaa” geetettiya qaalata siyiyo wode ay hassayay? Daroti, ha qaalati nu giddon deˈiya, beettennanne hayqqennabaa malaatiyaabadan ammanoosona. Eti asay hayqqiyo wode ha beettennabay ashuwaappe shaahettidi deˈuwan deˈees giidi qoppoosona. Ha ammanoy keehi aakkoogaappe denddidaagan, hegee tumuppe Geeshsha Maxaafaa timirtte gidennaagaa eriyo wode, daroti garamettoosona. Yaatin, Xoossaa Qaalay shemppoy ayba gii? Ayyaanaashin ayba gii?

GEESHSHA MAXAAFAY “SHEMPPUWAA” GIYA QAALAA GOˈETTIYO OGIYAA

Koyro ane shemppuwaa qoppa. Geeshsha Maxaafau daro baggay koyro Ibraysxxe doonaaninne Giriike doonan xaafettidoogaa hassayennan aggakka. Geeshsha Maxaafaa xaafidaageeti shemppuwaabaa xaafiyo wode, nefesh yaagiya Ibraysxxe qaalaanne pisiikihi yaagiya Giriike qaalaa goˈettidosona. Ha naaˈˈu qaalati Geeshsha Maxaafan 800ppe dariyaagaa keenaa xaafettidosona; Ooratta Alamiyaa Birshshettay he ubbasan “shemppuwaa” giidi birshshiis. “SHemppuwaa” woykko “shemppota” giya qaalata Geeshsha Maxaafay goˈettiyo ogiyaa neeni loytta pilgga xeelliyaaba gidikko, ha qaalaa geloy baasettidoy (1) asaa, (2) mehiyaanne doˈaa woykko (3) issi asa woy  issi mehiyaa deˈuwaa malaatanaassa gidiyoogee qoncciyan beettees. Ha heezzu gelota malaatiya amarida Geeshsha Maxaafaa Xiqiseta ane beˈoos.

Asaa. Nohe wode ‘amarida hosppun asati [shemppoti] haattaappe attidosona.’ (1 PHeexiroosa 3:20) Ha sohuwan “shemppoti” giya qaalay asaa, giishin Noha, a machchiyo, a heezzu naatanne eta machchota malaatiyoogee qoncce. Kessaabaa 16:16y mannaa shiishshiyoogaa xeelliyaagan Israaˈeeletussi imettida azazuwaa yootees. ‘Asay issoy issoy baayyo maanau koshshiyaagaa keenaa . . . dunkkaane giddon deˈiya asaa [shemppuwaa]’ qoodan shiishshana mala etassi odettiis. Yaatiyo gishshau, mannay son deˈiya asaa qoodaadan shiiqana bessees. “SHemppoy” woykko “shemppoti” issi uraa woykko asaa malaatiyoogaa bessiya, Geeshsha Maxaafan deˈiya hara amarida leemisoti Doomettaabaa 46:18n; Yaasa 11:11n; Oosuwaa 27:37⁠ninne Roome 13:1n deˈoosona. (Ha xiqiseti ekettidoy Ooratta Alamiyaa Birshshettaappe.)

Mehiyaa woy Doˈaa. Geeshsha Maxaafay meretaabaa odiyoosan: “Xoossai . . . hagaadan yaagidi haasayiis; ‘Paxa de7iya dumma dumma meretati [shemppoti] haattan darona; kafoikka sa7aappe bollaaranne salo gufanttuwaappe garssaara paallo’ yaagiis. Xoossai hegaappe guyyiyan hagaadan yaagidi haasayiis; ‘Paxa de7iya meretati [shemppoti] bantta qommuwan qommuwan: meheti, biittaara gooshettiya meretatinne do7ati bantta qommuwan qommuwan biittaa bollan kiyona’ yaagiis; yaagin haniis” yaagiyaagaa nabbaboos. (Doomettaabaa 1:20, 24) Ha xiqisiyan molee, meheenne doˈay issi mala qaalan “shemppo” geetettidosona. Mehetinne doˈati, Doomettaabaa 9:10n; Wogaabaa 11:46⁠ninne Qoodaabaa 31:28nkka [“shemppo,” NW] geetettidosona.

Issi asa deˈuwaa. Issitoo isssitoo “shemppo” yaagiya qaalay issi ura deˈuwaakka malaatees. Yihooway Muusessi: ‘Nena woranau koyida [“ne shemppuwaa shankkatiya,” NW] asati ubbay haiqqiichchidosona’ yaagiis. (Kessaabaa 4:19) Muuse morkketi ay shankkatidonaa? Eti Muusa woranau koyidosona. Hegaappe kase Raaheela ba naˈaa Biniyaama yeliyo wode a hayqqido gishshau, i ‘shemppoi kiyiis.’ (Doomettaabaa 35:16-19) Raheela he wode hayqqaasu. Yesuusi giidobaakka beˈa: “Taani dorssaa loitta heemmiyaagaa; dorssaa loitti heemmiyaagee he dorssatu gishshau haiqqees [“ba shemppuwaa immees,” NW]. (Yohaannisa 10:11) Yesuusi ba shemppuwaa woykko ba deˈuwaa asaa naatu gishshau aattidi immiis. Ha Geeshsha  Maxaafaa xiqisetun shemppuwaa giya qaalay issi ura deˈuwaa malaatiyoogee qoncce. “SHemppo” giya qaalay hagaa mala ogiyan gelido gujo leemisota 1 Kawotu 17:17-23n; Maatiyoosa 10:39n; Yohaannisa 15:13⁠ninne Oosuwaa 20:10n demmaasa.

Xoossaa Qaalaa neeni gujjada xannaˈiyo wode, “shemppo” giya qaalay Geeshsha Maxaafan awaaninne “hayqqennaba” woy “merinau diyaaba” malaatiyoogaa demmakka. Hegaappe, Geeshsha Maxaafay shemppoy hayqqiyoogaa bessees. (Hizqqeela 18:4, 20) Yaatiyo gishshau, Geeshsha Maxaafay hayqqida ura “hayqqida shemppo” yaagees.—Wogaabaa 21:11, NW.

“AYYAANAA” SHAAKKI ERIYOOGAA

Haˈˈi ane Geeshsha Maxaafay “ayyaanaa” giyo qaalaa goˈettiyo ogiyaa beˈoos. Issi issi asay “ayyaanaa” giya qaalay “shemppuwaa” giya qaalaara issuwaa giidi qoppees. Gidoppe attin, hegaadaana gidenna. Geeshsha Maxaafay “ayyaanay” nne “shemppoy” issoy issuwaappe dummattiya naaˈˈubata malaatiyoogaa qonccissees. Eti waanidi dummatiyoonaa?

Geeshsha Maxaafaa xaafida asati “ayyaanaabaa” xaafiyo wode goˈettidoy ruˈah yaagiya Ibraysxxe qaalaanne pneˈuma yaagiya Giriike qaalaa. He qaalatu birshshettaa Geeshsha Maxaafay ba huuphe yootees. Leemisuwau, Mazamure 104:29y, NW: “Neeni [Yihooway] eta ayyaanaa [ruˈah] ekkiyo wode eti haiqqidi, bantta biittau simmoosona” yaagees. Yaaqooba 2:26y, NW, qassi “ayyaanay [pneˈuma] shaahettido bollai haiqqidaagaa” yaagees. Yaatikko, ha xiqisetun “ayyaanay” bollaayyo deˈuwaa immiyaabaa malaatees. Ayyaanay baynna bollay hayqqidaagaa. Hegaa gishshau, Geeshsha Maxaafan ruˈah giya qaalay “ayyaanaa” xalla gidennan “wolqqaa” woykko deˈo-wolqqaa geetettidikka birshshettiis. Leemisuwau, Nohe wode Bashsha Hattaa xeelliyaagan Xoossay: “Taani saloppe garssan de7o shemppoora [“ayyaanaara,” NW] [ruˈah] de7iya mereta ubbaa xaissanau, ha sa7aa bollan bashshaa haattaa yeddana” yaagiis. (Doomettaabaa 6:17; 7:15, 22) Hegaa gishshau, “ayyaanay” deˈon deˈiya ubbay qaaxerettanaadan oottiya wolqqaa malaatiya ayfiyan beettennaba.

SHemppoynne ayyaanay naaˈˈaykka issi mala gidokkona. Eraadooniyaa haasayissanau korinttiyaa koshshiyoogaadan bollaayyokka ayyaanaa koshshees. Hegau hara leemisuwaa gujjanau, qeeri eraadooniyaa qoppa. Neeni he eraadooniyan baatire shuchchaa  yeggada haasayanaadan a dooyiyo wode, baatire shuchchaa giddon deˈiya korinttee eraadooniyau deˈo immiyoogaa malabaa oottees. SHin baatire shuchchay baynnan eraadoonee hayqqidaba mala. Korinttiyaara gattiyo sookkeetiyaa shodiichchido eradooneekka hegaa mala. Hegaadan, ayyaanaykka nu bollay qaaxerettanaadan oottiya wolqqa. Qassi korinttiyaadan ayyaanaykka qoppennanne ayyo aybinne siyettenna. I bolli baynna wolqqa. SHin he ayyaanay woykko deˈo-wolqqay baynnan nu bollay, yettanchchay giidoogaadan ‘hayqqidi, ba biittau simmees.’

Eranchchaa 12:7y asaa hayquwaabaa yootiiddi: ‘Biittay kase ba ekettido biittaakko simmees, shemppoykka [“ayyaanay,” NW] bana immida Xoossaakko simmees’ yaagees. Ayyaanay woykko deˈo-wolqqay bollaappe kiyiyo wode, bollay hayqqidi ba yiido biittau simmees. Hegaara issi mala ogiyan, deˈo-wolqqay ba yiidosaa, Xoossaakko simmees. (Iyyooba 34:14, 15; Mazamure 36:9) Hegaa giyoogee deˈo-wolqqay tumukka saluwaa bees giyoogaa gidenna. Hegaappe, issi asi hayqqiyo wode sinttanau deˈiyo hidooti deˈikko, hegee Xoossaa Yihoowan kuuyettiyaaba gidiyoogaa bessees. A deˈoy Xoossaa kushiyan deˈees giyoogaa jaala. Issi asi zaarettidi deˈana mala ayyaanaa woykko deˈo-wolqqaa imana danddayiyo wolqqay Xoossaa xallau deˈees.

“Duufuwan [“hassayiyo duufuwan,” NW]” deˈiyaageetussi Xoossay hegaadan oottanaagaa eriyoogee ayba minttettiyaabee! (Yohaannisa 5:28, 29) Hayquwan xiskkida urassi Yihooway dendduwaa wode ooratta bollaa medhdhidi, ayyaanaa woykko deˈo-wolqqaa an gelissidi deˈuwau zaarana. Hegee ayba ufayssiya gallassa gidanee!

Neeni Geeshsha Maxaafay “shemppuwaa” nne “ayyaanaa” geetettiya qaalata goˈettiyo ogiyaa gujjada eranau koyikko, Nuuni Hayqqiyo Wode Waaniyoo? yaagiya brooshuriyaanne Geeshsha Maxaafaappe Xaqqasidi Akeekissiyoogaa yaagiya maxaafan sinttaa 375-84 xeella; naaˈˈaykka Yihoowa Markkatun attamettidaageeta (Wolayttattuwan birshshettibookkona.)