Siˈoolee Aybee?

GEESHSHA MAXAAFAY koyro xaafettido doonatun, shiiˈohil geetettiya Ibraysxxe qaalaanne heydes geetettiya Giriike qaalaa 70ppe dariya keenaa goˈettiis. Naaˈˈu qaalatikka hayquwaara gayttidaageeta. Issi isssi Geeshsha Maxaafaa birshshettati he qaalata “duufuwaa,” “siˈooliyaa” woykko “ollaa” yaagidi birshshidosona. Gidoppe attin, ha Ibraysxxenne Giriike qaalatu suure qofaa oyqqida qaali daro doonatun baawa. Hegaa gishshau, Ooratta Alamiyaa Birshshettay, “Sheol” nne “Hades” yaagiya qaalata goˈettees. Ha qaalatu birshshettay tumuppe aybee? Geeshsha Maxaafay Eta dumma dumma sohuwan waatidi goˈettiyaakko ane beˈoos.

Eranchchaa 9:10y: “Neeni baanasan duufuwan [“siˈooliyan,” NW] oosoi, woikko halchchoi, woikko eri, woikko aadhdhida eratetti baawa” yaagees. Hegaa giyo wode siˈoolee nuuni siiqiyo issi ura moogana danddayiyoosa, woykko duufo ollaa malaatees yaagiyoogee? CHii. Geeshsha Maxaafay issi uri moogettido sohuwaa malaatanau, shiiˈohil woykko heydes giyo qaalata gidennan Ibraysxxenne Giriike qaalata harata goˈettees. (Doomettaabaa 23:7-9; Maatiyoosa 28:1) Geeshsha Maxaafay, “siˈooliyaa” giya qaalaa so asaa makkaanaa gidin, daro asaa ahaa issippe shiishshidi moogiyo sohuwaakka gidin, malaatanau goˈettenna.—Doomettaabaa 49:30, 31.

Yaatin, “Siˈoole” yaagiyo qaalay ay malaatii? Xoossaa Qaalay, “Siˈoole” giyo qaalay, daro asaa moogo sohoppekka keehi aadhdhiyaabaa malaatiyoogaa bessees. Leemisuwau, Isiyaasa 5:14y “Duufoi [Siˈoolee] ba gomppaa aassees; ba doonaakka zawi bainnaagaa hanggees” yaagees. Siˈoolee hanno gakkanau hayqqida daro asaa mittiis gaanau danddayiyaaba gidikkonne, i awudenne haraa gujjanau namisettees. (Leemiso 30:15, 16) Amarida asa xallay moogettana danddayiyo, asa moogiyo sohoppe dummatiya ogiyan, ‘haiqoy [“siˈoolee,” NW] kalli erenna.’ (Leemiso 27:20) Siˈoolee awudenne kumenna. Ayyo hanna zawa giyoobi baawa. Hegaa gishshau, Siˈoolee asay moogettiyo issi erettida soho gidenna. Hegaappe, i daro asay hayqqidi xiskkuwan deˈiyoogaa malaatiya asaa naatu ubbaa duufuwaa.

Geeshsha Maxaafay dendduwaabaa tamaarissiyoobay, “Siˈoole” giyo qaalaa nuuni loytti akeekanaadan maaddees. Xoossaa Qaalay, Siˈoole giyo qaalaa dendduwaa demmana danddayiyo hayquwaara gattidi yootees. * (Iyyooba 14:13; Oosuwaa 2:31; Ajjuutaa 20:13) Xoossaa Qaalay Siˈooliyan deˈiyaageeti Yihoowayyo haggaazidaageetu xalla gidennan, ayyo haggaazibeenna darota gujjiyoogaakka bessees. (Doomettaabaa 37:35; Mazamure 55:15) Hegaa gishshau, Geeshsha Maxaafay “worddoikka xilloikka haiquwaappe denddana” yaagidi tamaarissees.—Oosuwaa 24:15.

[Tohossa qofaa]