SHemppuwaa Tammanne Laappuna

Woosan Xoossaakko SHiiqa

Nuuni Xoossaakko woossana bessiyoy aybissee?

Xoossay nu woosaa siyanaadan ay oottana bessii?

Xoossay nu woosaa waati zaarii?

1, 2. Nuuni woosaa keehi gita maatadan xeellana bessiyoy aybissee? Geeshsha Maxaafay woosaabaa ay tamaarissiyaakko nuuni erana koshshiyoy aybissee?

AAHO yuniverssiyaara geeddarissiyo wode, saˈay keehi guutta. SHin, ‘Saluwaanne saˈaa medhdhida’ Yihoowayyo, kawotettan deˈiya asaa naati gombbo giddon deˈiya issi xohetta haatta mala gidiyoogee qoncce. (Mazamure 115:15; Isiyaasa 40:15) Gidikkokka, Geeshsha Maxaafay: “GODAI bana xeesiya ubbau, tuman bana xeesiya ubbau matan de7⁠ees. I baayyo yayyiyaageetu ubbaayyo amuwaa kunttees. Qassi i eta waasuwaa siyidi, eta ashshees” yaagees. (Mazamure 145:18, 19) Hegee woygiyoogaakko ane qoppa! Medhdhidaagee, ubbabaa danddayiyaagee, nuussi matanne nuuni a ‘tuman xeessiyaaba’ gidikko, nuna siyees. Xoossaakko woossiyoogee keehi dumma maata!

² Gidoppe attin, Yihooway nu woosaa siyanaadan koyiyaaba gidikko, i koyiyo ogiyan akko woossana bessees. Hegaadan oottanau, Geeshsha Maxaafay woosaabaa ay tamaarissiyaakko erana koshshees. Woosay nuuni Xoossaakko shiiqanaadan maaddiyo gishshau, hegaa xeelliyaagan Geeshsha Maxaafay woygiyaakko eriyoogee keehi koshshiyaaba.

YIHOOWAKKO AYSSI WOOSSIYOO?

3. Nuuni Yihoowakko woossana koshshiyo issi waanna gaasoy aybee?

³ Nuuni Yihoowakko woossana koshshido issi waanna gaasoy,  hegaadan oottanaadan i shoobbiyo gishshataassa. A Qaalay: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana” yaagidi nuna minttettees. (Piliphphisiyuusa 4:6, 7) Yuniverssiyan Ubbaappe Bollaara Haariyaagee nuussi immido hegaa mala giigissuwaa nuuni sheneho gennaagee erettidaagaa.

4. Yihoowakko ubbatoo woossiyoogee aara deˈiya dabbotaa waati minttii?

⁴ Woossiyo hara gaasoy, Yihoowakko ubbatoo woossiyoogee, aara deˈiya dabbotaa nuuni minttiyo issi oge gidiyo gishshataassa. Tumu laggeti issoy issuwaara haasayiyoy, koyiyoobay deˈiyo wode xallaana gidenna. Hegaappe, loˈˈo laggeti issoy issuwaara dosettoosona; eti bantta qofaa, bantta hirggaanne banttau siyettiyaabaa qottennan issoy issuwau yootiyoogan dabbotaa minttoosona. Xoossaa Yihoowaara nuussi deˈiya dabbotaa xeelliyaagankka, amarida ogiyan hanotay hegaara issi mala. Ha maxaafaa goˈettiyoogan, neeni Yihoowa xeelliyaagan, a oonatettaanne a halchchuwaa darobaa Geeshsha Maxaafay ay tamaarissiyaakko eradasa. Neeni aara dabbotaa medhdhana  danddayiyo ura i gidiyoogaa tamaaradasa. Woosay saluwan deˈiya ne Aawawu ne qofaa qonccissiyoonne neessi siyettiyaabaa yootiyo injjiyaa medhdhees. Neeni hegaadan oottiyo wode, Yihoowakko kaseegaappekka aaruwan shiiqaasa.—Yaaqooba 4:8.

NUUNI KUNTTANA BESSIYA GIDAY AYBEE?

5. Yihooway woosa ubbaa siyennaagaa bessiyay aybee?

⁵ Yihooway woosa ubbaa siyii? Hananabaa yootiya Isiyaasa wode, i makkalanchcha Israaˈeeletussi woygidaakko qoppa: “Intte daro woosaa woossikkokka, taani siyikke; aissi giikko, intte kushee suuttan munaqettiis” yaagiis. (Isiyaasa 1:15) Yaatiyo gishshau, issi issi oosoti, Xoossay nu woosaa siyennaadan gaaso gidoosona. Xoossay nu woosaa nashshidi siyanaadan, keehippe koshshiya gidata kunttana koshshees.

6. Xoossay nu woosaa siyanaadan waannati koshshiya giday aybee? He gidaa waati kunttana danddayiyoo?

⁶ Waannatidi koshshiya giday ammanuwaa. (Marqqoosa 11:24) Kiitettida PHauloosi: “Ammanoi bainnan ooninne Xoossaa ufaissanau danddayenna; aissi giikko, Xoossaakko yiya ooninne Xoossai de7⁠iyoogaanne bana koyiyaageetuyyo woituwaa immiyoogaa ammananau koshshees” yaagidi xaafiis. (Ibraawe 11:6) Tumu ammanoy, Xoossay deˈiyoogaa ammaniyoogaa xalla gidennan, i woosaa siyidi zaaruwaa immiyoogaa ammaniyoogaa gujjees. Ammanoy nu oosuwan qonccees. Ubba gallassi deˈiyo deˈuwan nu ammanoy qoncci beettanaadan oottana bessees.—Yaaqooba 2:26.

7. (a) Woosan Yihoowa haasayissiyo wode, bonchchuwaana gidana bessiyoy aybissee? (b) Yihoowakko woossiyo wode, nu huuphiyaa kawushshiyaageetanne wozanappe woossiyaageeta gidiyoogaa waati bessana danddayiyoo?

⁷ Yihooway baakko woosan shiiqiyaageeti bantta huuphiyaa kawushshidi wozanappe woossanaadankka koyees. Nuuni Yihoowa haasayissiyo wode, nu huuphiyaa kawushshiyoogee bessiyaaba gidennee? Asay issi kawuwaa haasayissiyo injjiyaa demmiyo wode, ayyo deˈiya haariyo maataa akeekidi, darotoo  bonchchuwan haasayissees. Yaanin, nuuni Yihoowakko shiiqiyo wode, ay keena bonchchuwana gidana bessii! (Mazamure 138:6) Hegaa bolli i “Ubbaa Danddayiya Xoossaa” gidiyoogee qoncce. (Doomettaabaa 17:1) Nuuni Xoossaakko woossiyo wode, nu hanotay a matan nuussi deˈiya sohuwaa eridi, nu huuphiyaa kawushshiyoogaa bessiyaagaa gidana koshshees. Hegaadan nu huuphiyaa kawushshiyo hanotay, nuuni meeze oottidi zaaretti zaaretti issi mala woosa woossanaadan gidennan, wozanappe ashkketettan woossanaadankka denttettees.—Maatiyoosa 6:7, 8.

8. Nuuni woossiyoobaara waani moggotti deˈana danddayiyoo?

⁸ Xoossay nu woosaa siyanaadan oottiya hara giday, nuuni nu woosaara moggidi deˈiyoogaa. Nuuni woossiyoobaa nu wolqqay danddayido keena ubban oottanaadan Yihooway naagees. Leemisuwau, “Hachchi hachchi koshshiya qumaa nuuyyo hachchi imma” yaagidi woossiyaaba gidikko, nuuni oottana danddayiyo ooso ubbaa minnidi oottana koshshees. (Maatiyoosa 6:11; 2 Tasalonqqe 3:10) Ashuwaa daafuran oottiyoobata xooni kiyanau maaduwaassi woossiyaaba gidikko, nuna paaciyan yeggana danddayiya hanotatuppe haakkanau akeekanchcha gidana koshshees. (Qolasiyaasa 3:5) Ha keehi koshshiya gidatu bolli woosaa xeelliyaagan nuuni zaaruwaa demmana koshshiya oyshati deˈoosona.

WOOSAA XEELLIYAAGAN AMARIDA OYSHATU ZAARUWAA

9. Nuuni ookko woossana bessii? O baggaara?

⁹ Nuuni ookko woossana bessii? Yesuusi bana kaalliyaageeti ‘saluwan deˈiya nu Aawaakko’ woossana mala tamaarissiis. (Maatiyoosa 6:9) Hegaa gishshau, nu woosay Xoossaa Yihoowa xallau shiiqana bessees. Gidikkonne, ba mexi issi Naˈaa Yesuus Kiristtoosassi deˈiya sohuwaakka nuuni eridi ekkanaadan Yihooway koyees. Nuuni SHemppuwaa 5n tamaaridoogaadan, Yesuusi saˈaa kiitettidoy, nuna nagaraappenne hayquwaappe ashshanaassa woykko wozanaassa. (Yohaannisa 3:16; Roome 5:12)  I Qeese ubbatu Halaqanne Pirddiyaagaa gidanaadan doorettiis. (Yohaannisa 5:22; Ibraawe 6:20) Hegaa gishshau, Geeshsha Maxaafay nuuni Yesuusa baggaara woosaa shiishshana mala yootees. I ba huuphe: “Ogee, tumainne de7⁠oi tana; ta baggaarappe attin, ooninne ta Aawaakko baanau danddayenna” yaagiis. (Yohaannisa 14:6) Nu woosay siyettanaadan, Yihoowa xalaalaakko Yesuusa baggaara woossana bessees.

10. Nuuni woossiyo wode dumma hanotan eqqiyoogaa koshshennay aybissee?

¹⁰ Nuuni woossiyo wode waanidi woossana bessii? Yihooway kushiyaa hanotaa gidin kumetta bollaa hanotaa gidin dumma gidida equwaa koyenna. Geeshsha Maxaafay dumma dumma gidida daro hanotan shiiqiya woosay siyettiyoogaa tamaarissees. Hegee, uttidi, hokkidi, gulbbatidinne eqqidi woossiyoogaa gujjees. (1 Odiya 17:16; Nahimiyaa 8:6; Daaneela 6:10; Marqqoosa 11:25) Tumuppe koshshiyaagee, harati beˈana danddayiyo dumma equwaa gidennan, suure gidida wozanaa hanotaa. Ooso oottiiddi woykko ellellissiya hanotay gakkiyo wode, nuuni awan deˈiyaaba gidikkonne, wozanan woossana danddayoos. Hegaa mala woosaa nu matan deˈiya asay aynne akeekennaba gidikkonne, Yihooway siyees.—Nahimiyaa 2:1-6.

11. Nuuni woossana bessiyo buzo allaalleti awugeetee?

¹¹ Nuuni aybaaba woossana bessii? Geeshsha Maxaafay: ‘Xoossay koyiyoogaadan, aynne nuuni a woossikko, i siyees’ yaagidi qonccissees. (1 Yohaannisa 5:14) Hegaa gishshau, Xoossaa sheniyaara moggiya aybanne gidin woossana danddayoos. Nuna buzo metidabaa woossiyoogee a sheniyaara maayii? Maayiyoogee tuma! Yihoowakko woossiyoogee mata laggiyaara haasayiyoogaara issi mala gidana danddayees. Nuuni qoncciyan, “nu wozanan deˈiyaabaa muleera” Xoossaayyo yootana danddayoos. (Mazamure 62:8, NW) Suure gididabaa oottanau maaddanaadan, geeshsha ayyaanaa immanaadan woossiyoogee bessiyaaba. (Luqaasa 11:13) Eratettan kuuyanaadan kaaletuwaa immanaadaaninne metuwaa xooni kiyanau minttettanaadankka woossana  danddayoos. (Yaaqooba 1:5) Nuuni nagaraa oottiyo wode, Kiristtoosa yarshshuwaa baaso oottidi maarotettaa oychchana koshshees. (Efisoona 1:3, 7) Nuna buzo koshshida allaalletu xallay nu woosan koyro sohuwaa oyqqana bessennaagee qoncce. Nu woosaa aassidi haratakka gujjana koshshees—so asaanne nuugaara issi mala goynuwaa goynniyaageetakka gujjana bessees.—Oosuwaa 12:5; Qolasiyaasa 4:12.

12. Saluwan deˈiya nu Aaway koyiyoobatuyyo xoqqa sohuwaa immiyoogaa nu woosan waati bessana danddayiyoo?

¹² Xoossaa Yihoowaara gayttidabati nu woosan koyro shohuwaa oyqqna bessees. Nuuni a loˈˈotetta ubbau, a wozanappe sabbanaunne galatanau bessiya gaasoy deˈees. (1 Odiya 29:10-13) Maatiyoosa 6:9-13n xaafettida, nuuni woygi woossanaakko Yesuusi yootido leemiso gidiya woosan, Xoossaa sunttay anjjettanaadan woykko bonchchettanaadan i tamaarissiis. Kaallidi, Xoossaa Kawotettay yaanaadaaninne a shenee saluwan hanidoogaadan saˈankka hananaadan woossana mala yootiis. Yihoowaara gayttida ha koshshiya allaalleta denttoogaappe guyyiyan, aawussi buzo koshshiyaabata oychchana bessiyoogaa Yesuusi yootiis. Hegaara issi mala hanotan, nuunikka nu woosan Xoossau keehippe xoqqa sohuwaa immidi, nu xalaalau loˈˈobaa amottiyoogaappe adhdhiyaabaa koyiyoogaa bessoos.

13. Xoossaa ufayssiya woosaa adussatettaabaa Geeshsha Maxaafay ay yootii?

¹³ Nu woosay ay keenaa aduqqana bessii? Nuuni nurkka gidin hara asaara gidin woossiyo woosay ay keenaa aduqqana bessiyaakko, Geeshsha Maxaafay zawaa wottenna. Qumaa maanau woossiyo qantta woosaappe doommidi, nuuni nu wozanaabaa ubbaa Yihoowayyo yootiyo adussa, buzo woosaa gakkanau dummattana danddayees. (1 Sameela 1:12, 15) Gidikkonne, banttana xillo milattissanaunne harata bessanau koyidi, adussa woosaa woossiyaageeta Yesuusi boriis. (Luqaasa 20:46, 47) Hegaa mala woosay Yihoowa ufayssenna. Waanna koyettiyaagee nuuni wozanappe woossiyoogaa. Hegaa gishshau, Xoossaa ufayssiya  adussa woosay koshshiyaagaadaaninne hanotaadan dummatana danddayees.

14. ‘Aggennan woossana’ mala Geeshsha Maxaafay nuuna minttettiyoy woygana koyido gishshataassee? Hegee minttettiyaagaa gididoy aybissee?

¹⁴ Awude awude woossana bessii? Geeshsha Maxaafay ‘aggennan woossana’ mala, ‘ubba wode woossana’ malanne “salettennan woossana” mala minttettees. (Qolasiyaasa 4:2, 1 Tasalonqqe 5:17; Luqaasa 18:1) Hegaadan giyo wode, nuuni Yihoowakko issi gallassaa giddon shemppoy baynnan woossana bessees giyoogaa gidenna. Hegaappe, Geeshsha Maxaafay, Yihooway nuussi oottido loˈˈobau aggennan galatiiddi, a kaaletuwaanne minttettuwaa demmanau ubbatoo woossanaadan minttettees. Nu woosay ay keenaa aduqqana bessiyaakkonne awude awude woossana bessiyaakko, Yihooway zawaa wottibeennaagee minttettiyaaba gidennee? Woossiyo maataa tumuppe nashshiyaaba gidikko, saluwan deˈiya nu Aawaakko woossiyo daro injjiyaa demmoos.

15. Nu buzo woosaa woossiyo wode gidin, shiiquwan siyo woosan gidin “Aminˈˈi” gaana koshshiyoy aybissee?

¹⁵ Woosay kuuyettiyo wode “Aminˈˈi” gaana koshshiyoy aybissee? “Aminˈˈi” giyoogee “maayaas” woykko “gido” yaagiyoogaa. Buzo woossiyo wode gidin, issippe woossiyo wode gidin, woosaa kuuyiyo wode “Aminˈˈi” giyoogee bessiyaaba gidiyoogaa Geeshsha Maxaafaa leemisoti, qonccissoosona. (1 Odiya 16:36; Mazamure 41:13) Buzo woosaa nuugaa kuuyiyo wode “Aminˈˈi” giyoogan, nu giidobay tumanne wozanappe gidiyoogaa bessoos. Issi uray shiiqida asau woosaa shiishshidi kuuyiyo wode “Aminˈˈi” giyoogee, i giidobaa maayoos giyoogaa.—1 Odiya 14:16.

XOOSSAY NU WOOSAA ZAARIYO OGIYAA

16. Woosaa xeelliyaagan nuuni ay ammanettana danddayiyoo?

¹⁶ Yihooway tumuppe woosaa zaarii? Ee, zaarees! ‘Woosaa Siyiyaagee,’ miilooniyan qoodettiya asay wozanappe shiishshiyo woosaa zaariyoogaa nuuni ammanettana danddayiyo mino baasoy deˈees. (Mazamure 65:2) Yihooway nu woosau daro dumma dumma ogiyaara zaaruwaa immana danddayees.

17. Xoossay kiitanchchatanne saˈan assi oottiyaageeta goˈettidi, nu woosau zaaruwaa immees giyoy aybissee?

 ¹⁷ Yihooway Woosau zaaruwaa immanau, kiitanchchatanne saˈan assi oottiyaageeta goˈettees. (Ibraawe 1:13, 14) Geeshsha Maxaafaa akeekanau, Xoossay maaddanaadan woossidoogaappe guyyiyan, sohuwaara Yihoowayyo oottiyaageetuura gayttida daro asaa temokiroy deˈees. Hegaa mala temokiroy, Kawotettaa sabbakiyo oosuwaa kiitanchchay kaalettiyoogau naqaasha. (Ajjuutaa 14:6) Yihooway, nuuni koshshiya wodiyan shiishshido woosaa zaaranau, issi Kiristtaanee nuna maaddanau yaanaadan denttettana  danddayees.—Leemiso 12:25; Yaaqooba 2:16.

18. Yihooway baassi oottiyaageetu woosaa zaaranau ba geeshsha ayyaanaanne ba Qaalaa waati goˈettii?

¹⁸ Xoossaa Yihooway geeshsha ayyaanaanne ba Qaalaa, Geeshsha Maxaafaakka goˈettidi baassi oottiyaageetu woosaa zaarees. Metuwaa nuuni xooni kiyanaadan ba geeshsha ayyaanaa baggaara kaaletuwaanne minttettuwaa immiyoogan maaddidi, i nu woosaa zaarana danddayees. (2 Qoronttoosa 4:7) Darotoo kaaletuwaa demmanau woossiyo woosaa zaaroy beettiyoy, aadhdhida eratettay deˈiyo kuushshaa kuuyanau maaddanaadan Yihooway immido, Geeshsha Maxaafaana. Geeshsha Maxaafaa buzo xannaˈiyo wodenne ha maxaafaa mala Kiristtaane xuufeta nabbabiyo wode, keehi maaddiya Geeshsha Maxaafaa qofata demmana danddayoos. Nuuni qoppana bessiya Geeshsha Maxaafaa qofata Kiristtaane shiiquwan tamaaridobaappe woykko nuussi qoppiya gubaaˈiyaa cimay immido zoriyaappe hassayana danddayoos.—Galaatiyaa 6:1.

19. Nu woosay issito issito zaaruwaa demmibeennaba milatiyo wode ay akeekana bessii?

¹⁹ Yihooway nu woosau sohuwaara zaaruwaa immeennaba milatiyaaba gidikko, hegee i nu woosau zaaruwaa immana danddayenna gishshataassa mule gidenna. Hegaappe, Yihooway woosaa zaariyoy ba sheniyaadaananne ba koyido wodiyaadaana gidiyoogaa nuuni hassayana bessees. I nu koshshaanne hegaa waati kunttana bessiyaakko nuuppe aattidi erees. I ubbatoo nuuni a ‘aggennan  woossanaadan, koyanaadaaninne xeesanaadan’ koyees. (Luqaasa 11:5-10, NW) Hegaadan gencciyoogee, nu koshshay wozanappenne nu ammanoy tumuppe gidiyoogaa Xoossaassi bessees. Hegaa bollan, Yihooway nuussi qoncce gidenna ogiyan nu woosaa zaarana danddayees. Leemisuwau, issi metuwaara gayttidaagan, i he metuwaa xayssennan, genccanaadan nuussi minttettuwaa immiyoogan nu woosaa zaarana danddayees.—Piliphphisiyuusa 4:13.

20. Woossana danddayiyo dumma maatan loytti goˈettana bessiyoy aybissee?

²⁰ Aaho yuniverssiyaa Medhdhidaagee bessiya ogiyan woosan bana xeessiya ubbau mata gidiyoogaa eriyoogan ay keena galatana bessii! (Mazamure 145:18) Yihoowakko woossana danddayiyoogee dumma maata gidiyo gishshau, ubbatoo woossana bessees. Hegaadan oottiyaaba gidikko, woosaa Siyiya Yihoowakko awudeegaappekka aaruwan shiiqana danddayoos.

GEESHSHA MAXAAFAY TAMAARISSIYOOBAA

▪ Yihoowakko Ubbatoo woossiyoogee akko shiiqanau maaddees.—Yaaqooba 4:8.

▪ Nu woosaa Xoossay siyanaadan, nuuni ammanuwan, nu huuphiyaa kawushshiyoogaaninne wozanappe woossana koshshees.—Marqqoosa 11:24.

▪ Nuuni Yihoowa xalaalaakko a Naˈaa baggaara woossana bessees.—Maatiyoosa 6:9; Yohaannisa 14:6.

▪ Yihooway, ‘woosaa Siyiyaagee,’ ba kiitanchchata, saˈan baassi oottiyaageeta, ba ayyaanaanne ba Qaalaa goˈettidi nu woosaa zaarees.—Mazamure 65:2.

[Oyshaa]

[Sinttaa 165n diya misiliyaa]

‘Saluwaanne saˈaa Medhdhidaagee’ nu woosaa siyanau koyees

[Sinttaa 171n diya misiliyaa]

Ne woosay shiiqidoy ay hanotaanakka gidikko siyettees

[Sinttaa 172n diya misiliyaa]

Yihooway issi Kiristtaanee nuna maaddanau yaanaadan denttettiyoogan, nu woosaa zaarana danddayees