SHemppuwaa Tammanne Hosppuna

Xinqqatiyaanne Xoossaara Ne Medhdhiyo Dabbotaa

Issi uri Kiristtaane gidanau ayba ogiyan xammaqettii?

Neeni xammaqettiyo gidaa kunttanau ayba tangguwaa ekkana bessii?

Issi asi bana Xoossaassi geppiyoy ayba ogiyaanee?

Xammaqettana bessiyo waanna gaasoy aybee?

1. Toophphiyaa biittan suntta gidida issi bitanee xammaqettanau oychchidoy aybissee?

“HAATTAA hagaa be7a; xammaqettiyoogaa tana diggiyai aibee?” Ha oyshaa oychchidaagee koyro xeetu layttan Toophphiyaa biittan suntta gidida issi bitaniyaa. Piliphphoosa geetettiya Kiristtaanee,  yaana geetettida Masee Yesuusa gidiyoogaa assi boxooxissidi yootiis. He bitanee Geeshsha Maxaafaappe tamaaridoban wozanappe denttettidi tangguwaa ekkiis. I xammaqettanau koyiyoogaa bessiis!—Oosuwaa 8:26-36.

2. Xinqqatiyaabaa neeni minttada qoppana bessiyoy aybissee?

² Neeni ha Maxaafan ha shemppuwaappe kasetiya shemppota issi Yihoowa Markkaara loyttada xannaˈidaba gidikko, ‘xammaqettennaadan tana diggiyay aybee?’ gaada oychchanau giigettidabadan neessi siyettennan aggenna. Neeni haˈˈi, Geeshsha Maxaafay Gannatiyan merinau deˈanaagaa yootiyo hidootaabaa tamaaradasa. (Luqaasa 23:43; Ajjutaa 21:3, 4) Hayqqidaageeti deˈiyo hanotaabaa tumaanne dendduwaa hidootaabaakka tamaaradasa. (Eranchchaa 9:5; Yohaannisa 5:28, 29) Neeni geella Yihoowa Markkatuura eta shiiquwan beettaydda takkennaaninne eti tumu haymaanootiyaappe koyettiyaabaa waatidi oosuwan bessiiddi deˈiyaakko beˈennan aggakka. (Yohaannisa 13:35) Ubbabaappe aadhdhiyaaba gidida, Xoossaa Yihoowaara buzo dabbotaa dichchiyoogaa geella doommennan aggakka.

3. (a) Yesuusi bana kaalliyaageetussi immido azazoy aybee? (b) Haattan xammaqettiyoogee ayba ogiyan polettii?

³ Neeni Xoossaayyo haggaazana koyiyoogaa waatada bessana danddayay? Yesuusi bana kaalliyaageetussi: “Intte biidi, asa ubbaa tana kaalliyaageeta oottite; . . . eta xammaqite” yaagidi yootiis. (Maatiyoosa 28:19) Yesuusi ba huuphe haattan xammaqettidi hegau leemiso gidiis. A bolli haattay caccafettibeenna; qassi guutta haattay ayyo liiphiyan tigettibeenna. (Maatiyoosa 3:16) “Xammaqa” geetettida Giriike qaalau birshshettay “muukka” yaagiyaagaa. Hegaa gishshau, Kiristtaane xinqqate giyoogee muleera haattan muukettiyoogaa.

4. Haattan xammaqettiyoogee ay bessii?

⁴ Haattan xammaqettiyoogee Xoossaa Yihoowaara dabbotana koyiya ubba asaappe koyettiyaaba. Xinqqatee neeni Xoossaayyo haggaazanau koyiyoogaa asaa sinttan bessiyo oge. Hegee, neeni Yihooway koyiyoogaa oottanau ufayttiyoogaa bessees. (Mazamure 40:7, 8) Gidikkonne, neeni xammaqettiyo gidaa kunttanau, koshshiya tanggota ekkanau bessees.

 ERAANNE AMMANUWAA KOSHSHEES

5. (a) Xammaqettiyo gidaa kunttanau ekkana koshshiya koyro tanggoy aybee? (b) Kiristtaane shiiqoti keehi koshshiyaaba gididoy aybissee?

⁵ Neeni koyro tangguwaa ekkiyoogaa doommadasa. Waatada? Geella Geeshsha Maxaafaa xannaˈanau giigida hanotaa kaallada Xoossaa Yihoowabaanne Yesuus Kiristtoosabaa eraa demmiyoogaana. (Yohaannisa 17:3) SHin erana bessiya darobi deˈees. Kiristtaaneti Xoossaa “sheniyaa eriyo eratettaa [“tumu eraa,” NW]” demmanau koyoosona. (Qolasiyaasa 1:9) Yihoowa Markkatu gubaaˈiyaa shiiqotun shiiqiyoogee hegau keehi maaddiyaaba. Hegaa mala shiiqotun shiiqiyoogee keehi koshshiyaaba. (Ibraawe 10:24, 25) SHiiqotun ubbatoo shiiqiyoogee Xoossaa eriyoogan neeni gujja gujja baanaadan maaddees.

6. Neeni xammaqettiyo gidaa kunttanau Geeshsha Maxaafaa eraa ay keena demmana bessii?

⁶ Neeni xammaqettiyo gidaa kunttanu Geeshsha Maxaafan deˈiya ubbabaa erana koshshennaagee qoncce. Toophphiyaa biittan suntta gidida bitanee amaridaba erees; shin Geeshsha Maxaafan deˈiya harabata akeekanau ayyo maaduwaa koshshiis. (Oosuwaa 8:30, 31) Hegaadan, neenikka tamaaranabi darobi deˈees. Ubba neeni Xoossaabaa tamaarada wurssakka. (Eranchchaa 3:11) Gidikkonne, neeni xammaqettanaappe kase baa giishin, Geeshsha Maxaafaa baaso timirtteta erada ammananau bessees. (Ibraawe 5:12) Hegaa mala timirtteti, hayqqida asati deˈiyo tumu hanotaanne Xoossaa sunttaynne a Kawotettay keehi koshshiyoogaa erada ekkiyoogaa gujjoosona.

7. Geeshsha Maxaafaa xannaˈiyoogee neeni waatanau maaddana bessii?

⁷ Gidikkonne, “ammanoi bainnan ooninne Xoossaa ufaissanau danddayenna” gishshau, era xallaykka gidenna. (Ibraawe 11:6) Geeshsha Maxaafay, beni wode Qoronttoosa kataman deˈiya amarida asati Kiristtaaneti sabbakiyo qaalaa siyido wode, “ammanidi xammaqettidosona” yaagees. (Oosuwaa 18:8) Hegaadankka, Geeshsha Maxaafaa xannaˈiyoogee i Xoossaa Qaala gidiyoogaa neeni ammananaadan oottana bessees. Geeshsha Maxaafaa xannaˈiyoogee Xoossay qaalaa gelidobatuuninne Yesuusa yarshshoy nena ashshana danddayiyoogaa neeni ammananaadan  maaddana bessees.—Yaasa 23:14; Oosuwaa 4:12; 2 Ximootiyoosa 3:16, 17.

GEESHSHA MAXAAFAA TUMAA HARATUSSI YOOTIYOOGAA

8. Neeni tamaaridobaa haratussi yootanaadan ne wozanaa denttettanabay aybee?

⁸ Ammanoy ne wozanan dicci dicci biyo wode, tamaaridobaa ne xallau oyqqa uttanaagee neeyyo danddayettennaba gidana. (Ermmaasa 20:9) Haratuyyo Xoossaabaanne a halchchuwaabaa yootanau ne wozanay nena keehippe denttettana.—2 Qoronttoosa 4:13.

9, 10. (a) Neeni Geeshsha Maxaafaa tumaa yootiyoogaa ooppe doommanau danddayay? (b) Yihoowa Markkati oottiyo maaraadan etaara issippe sabbakiyoogan shaahettanau koyikko, neeni ay oottana bessii?

⁹ Geeshsha Maxaafaa tumaa haratussi yootiyoogaa, ne dabbotussi, ne laggetussi, ne shoorotussinne nenaara oottiya asatussi akeekan yootiyoogan doommana danddayaasa. Takkada, Yihoowa Markkati oottiyo maaraadan etaara issippe sabbakuwaa oosuwan shaahettanau koyana danddayaasa. Geeshsha Maxaafaa nena xannaˈissiya Markkaayyo he wodiyan, ne koshshaa yootanau guyye gooppa. Neeni dere haggaazuwan shaahettanau danddayiyoogee erettiyo wode, gubaaˈiyaa cimatuppe naaˈˈati nena xannaˈissiyaagaara issippe nena haasayisoosona.

¹⁰ Hegan neeni, Xoossaa wudiyaa heemmiya gubaaˈiyaa cimatuppe amaridaageetuura loyttada erettaasa. (Oosuwaa 20:28; 1 PHeexiroosa 5:2, 3) Ha cimati, neeni Geeshsha Maxaafaa baaso timirtteta eriyoogaanne ammaniyoogaa, Xoossaa baaso siraataara moggada deˈiyoogaanne Yihoowa Markka gidanau wozanappe koyiyoogaa akeekikko, mishiraachchuwaa xammaqettennan aassiyaagaa gidada dere haggaazuwan shaahettanau gidaa kunttidoogaa neessi yootoosona.

11. Amaridaageeti dere haggaazuwau gidaa kunttanau kasetidi laamettana bessiyoy aybiina gidana danddayii?

¹¹ Hara baggaara, dere haggaazuwau gidaa kunttanau ne deˈuwaanne kandduwaa maaran amarida laamiyaa oottana koshshiyoogaa he cimati akeekana danddayoosona. Hegee, neeni  haratuppe geeman oottiyo amarida oosota aggiyoogaa gujjana danddayees. Yaatiyo gishshau, neeni mishiraachchuwaa xammaqettennan aassiyaagaa gidanaayyo, bessenna asho gaytotettaa, mattottiyoogaa, jallissiya xaliyaa goˈettiyoogaa milatiya iita nagaraappe haakkanau bessees.—1 Qoronttoosa 6:9, 10; Galaatiyaa 5:19-21.

NAGARAAPPE SIMMIYOOGAANNE LAAMETTIYOOGAA

12. Nagaraappe simmiyoogaa koshshiyoy aybissee?

¹² Neeni xammaqettanau gidaa kunttanaassi, hara amarida tanggota ekkanau bessees. Kiitettida PHeexiroosi: “Xoossai intte nagaraa xaissanaadan . . . intte nagaraappe Xoossaakko simmite” yaagiis. (Oosuwaa 3:19, 20) Nagaraappe simmiyoogee, ne oottidoban wozanappe zilˈˈettiyoogaa yaagiyoogaa. Issi uri shori baynna kandduwan simerettidaba gidikko, nagaraappe simmana bessiyoogee qoncce; shin issi uri maara kandduwaara simerettidaba gidikkokka, nagaraappe simmiyoogaa koshshees. Aybissi? Asay ubbay Xoossaa atotettay koshshiyo nagaranchcha gidiyo gishshataassa. (Roome 3:23; 5:12) Geeshsha Maxaafaa xannaˈanaappe kase, Xoossaa shenee aybakko neeni erakka. Xoossaa sheniyaa erabeenna gishshau, a sheniyaara ubbaban moggada deˈabaakka. Yaatiyo gishshau, nagaraappe simmiyoogaa koshshees.

13. Laamettiyoogaa giyoogee woygiyoogee?

¹³ Nagaraappe simmoogaappe guyyiyan laamettanau bessees. Oottidoban zilˈˈettiyoogaappe aadhdhiyaaba oottana bessees. Ne kase deˈuwaa maaraa ixxanaunne haˈˈippe doommada suurebaa oottanau loyttada qofaa qachchanau koshshees. Nagaraappe simmiyoogeenne laamettiyoogee, neeni xammaqettanaappe kase ekkanau bessiya tanggota.

NE HUUPHIYAA XOOSSAASSI GEPPIYOOGAA

14. Xammaqettanaappe kase neeni ekkana bessiya keehi koshshiya tanggoy awugee?

¹⁴ Xammaqettanaappe kase ekkana bessiya keehi koshshiya hara tanggoy dees. Ne huuphiyaa Xoossaa Yihoowayyo geppanau bessees.

15, 16. Ne huuphiyaa Xoossaayyo geppiyoogaa giyoogee woygiyoogee? Hegaa oottanaadan issi ura denttettiyaabay aybee?

 ¹⁵ Neeni wozanappe woossada ne huuphiyaa Xoossaa Yihoowayyo geppiyo wode, merinau a xallau aqanau qaalaa gelaasa. SHin issi uri hegaadan oottanau koyiyoy aybissee? Issi asi issi ekkanau koyido macca naˈebaa loytti eranau iira giyaaninne hegaa mala sohuwan gayttiyoogaa doommiis giidi qoppoos. I onne iyyo deˈiya loˈˈo eeshshaa loytti eri eri biyo wode, o siiqi siiqi bees. Takkidi o ekkanau oyshaa yeddiyoogee attenna. Machcho ekkiyoogee a bolli aawatetta gujjanaagee tuma. Gidikkonne, iyyo deˈiya siiqoy hegaa mala keehi koshshiya tangguwaa ekkanaadan a denttettees.

¹⁶ Neeni Yihoowa eriyo wodenne a siiqiyo wode, aybanne xibennaaninne au goynniyoogan ayba zawanne wottennan assi oottanau wozanappe denddaasa. Xoossaa Naˈaa Yesuus Kiristtoosa kaallanau koyiya ooninne, ba huuphiyaa ‘yeggi bayana’ koshshees. (Marqqoosa 8:34) Nuuni nu huuphiyaa yeggi bayiyoy, nu koshshaynne nu halchchoy Xoossaayyo muleera azazettiyoogaa diggennaadan oottiyoogaana. Hegaa gishshau, neeni xammaqettanaappe kase Xoossaa Yihoowa sheniyaa oottiyoogee ne deˈuwau waanna halchcho gidana bessees.—1 PHeexiroosa 4:2.

MOOROBAA OOTTANA DANDDAYAYS YAAGIYO YASHSHAA XOONI KIYIYOOGAA

17. Amarida asati banttana Xoossaayyo geppanau guyye giyoy aybissa gidanau danddayii?

¹⁷ Amarida asati banttana Yihoowassi geppanau guyye giyoy hegaa mala mino tangguwaa ekkanau yayyiyo gishshataassa. Eti bantta huuphiyaa Xoossaassi geppida Kiristtaane gidiyoogan Xoossaa sinttan oyshettennaadan yayyana danddayoosona. Moorobaa oottidi Yihoowa azzanttoos yaagiyo yashshan, ayyo banttana geppennaagee loˈˈo giidi qoppoosona.

18. Ne huuphiyaa Xoossaassi geppana mala nena denttettana danddayiyaabay aybee?

¹⁸ Neeni Yihoowa siiqiyoogaa tamaaraydda biyo wode, ne huuphiyaa assi geppanaunne hegaara moggottada deˈanau  neeyyo danddayettidaba ubbaa oottanau wozanappe denddaasa. (Eranchchaa 5:4) Ne huuphiyaa Yihoowayyo geppoogaappe guyyiyan, neeni ‘Goday koyiyoogaadan deˈanaunne, ubba wode a ufayssiyaabaa oottanau’ koyanaagee qoncce. (Qolasiyaasa 1:10) Neeni Xoossaa siiqiyo gishshau, a sheniyaa oottiyoogaa keehi deexxiyaabadan qoppakka. “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagida Yesuusi kiittido Yohaannisaara neeni maayanaagau siree baawa.—1 Yohaannisa 5:3.

19. Ne huuphiyaa Xoossaassi geppanau ne yayyana bessennay aybissee?

¹⁹ Xoossaassi ne huuphiyaa geppanau neeni polo gidida asa gidana koshshenna. Ne abbiya Yihooway erees; qassi ne danddayiyoobaappe  daruwaa neeni oottana mala mule koyenna. (Mazamure 103:14) I neeyyo injjetana mala koyees; qassi nena maaddananne kaafana. (Isiyaasa 41:10) Ne polo wozanan neeni Yihoowan ammanettiyaaba gidikko, “i nena likke ogiyaa kaalettana.”—Leemiso 3:5, 6.

XAMMAQETTIYOOGAN NE GEPPIDOOGAA BESSA

20. Yihoowayyo ba huuphiyaa geppiyoogee hara asaukka qonccidi beettana koshshiyoy aybissee?

²⁰ Nuuni hanno gakkanaashin tobbidobata qoppiyoogee,  ne huuphiyaa woosan Yihoowassi geppanaadan nena maaddana danddayees. Xoossaa tumuppe siiqiya ubbay ‘atotettaa demmanau ba doonankka markkattana’ bessees. (Roome 10:10) Neeni hegaadan oottiyoy ayba ogiyaanee?

21, 22. Neeni ne ammanuwaa qoncciyan ‘markkattiyoogaa’ waatada bessana danddayay?

²¹ Neeni xammaqettana koyiyoogaa, ne gubaaˈiyan deˈiya shiishshiya cimaa erissa. I Geeshsha Maxaafaa baaso timirtteta oyqqida unddenna oyshata, amarida cimati nenaara zaarettanaadan giigissuwaa oottees. He cimati neeni gidaa kunttidoogaa maayiyaaba gidikko, kaalliya gita shiiquwan xammaqettana danddayiyoogaa neessi yootoosona. * Hegaa mala wodiyan darotoo, xinqqatee woygiyoogaakko zaarettiyo haasayay shiiqees. Hegaappe simmin, haasayaa shiishshiyaagee xinqqatiyau giigidaageeti bantta ammanuwaa bantta doonan qoncciyan ‘markkattiyoogaa’ bessana mala naaˈˈu deexxenna oyshata oychchees.

²² Neeni ne huuphiyaa Xoossaassi geppada Yihoowa Markka gidida asa gidiyoogaa qoncciyan bessiyaabay xinqqatiyaa. Xinqqatiyau giigettidaageeti banttana Yihoowassi geppidoogaa qoncciyan bessanau, muleera haattan muukettoosona.

NE XINAQATTEE MALAATIYOOBAA

23. “Aawaa sunttan, Na7aa sunttaaninne Geeshsha Ayyaanaa sunttan” xammaqettiyoogee woygiyoogee?

²³ Yesuusi ba erissiyo ashkkarati “Aawaa sunttan, Na7aa sunttaaninne Geeshsha Ayyaanaa sunttan” xammaqettanaagaa yootiis. (Maatiyoosa 28:19) Hagaa giyo wode, xinqqatiyau giigettida uri Xoossaa Yihoowaunne Yesuus Kiristtoosau deˈiya haariyo maataa akeekees giyoogaa. (Mazamure 83:18; Maatiyoosa 28:18) Qassi Xoossaa geeshsha ayyaanay woykko a wolqqay ay oottiyaakkokka akeekees.—Galaatiyaa 5:22, 23; 2 PHeexiroosa 1:21.

24, 25. (a) Xinqqatee aybaa malaatii? (b) Zaaro demmanau koshshiya oyshay woygiyaagee?

 ²⁴ Gidoppe attin, xinqqatee coo meechcha gidenna. I issi keehi koshshiyaabau malaata. Haattaa giddon muukettiyoogee, ne kase deˈuwau hayqqidoogaa malaatees. Muukettosaappe kiyiyoogee, neeni haˈˈi Xoossaa sheniyaa oottanau deˈuwau denddidoogaa malaatees. Qassi neeni ne huuphiyaa oosossi woy qofassi woy hara asassi woy dirijjitessi gidennan, Xoossaa Yihoowassi geppidoogaa hassaya. Ne geppaynne xinqqatee Xoossaara keehi mata dabbotaa medhdhiyoogau doometta—aara xuuraa shaahettiya dabbo oottees.—Mazamure 25:14.

²⁵ Xinqqatee atotettaa demmiyoogaa tumayiyaaba gidenna. Yesuusi kiittido PHauloosi: “Yashshatettaaninne kokkorssan intte atotettaa polanau oottite” yaagidi xaafiis. (Piliphphisiyuusa 2:12) Xinqqatee doometta xalla. Denddiya oyshay, Xoossaa siiquwan neeni waanada deˈana danddayay? yaagiyaagaa. Wurssettan nu beˈana shemppoy hegau zaaruwaa oyqqiis.

[Tohossa qofaa]

GEESHSHA MAXAAFAY TAMAARISSIYOOBAA

▪ Kiristtaanetu xinqqatee, haattaa caccafiyoogaa gidennan muleera haattan muukettiyoogaa. —Maatiyoosa 3:16.

▪ Xinqqatiyau kaalettiya tanggoti doommiyoy eraa demmiyoogaananne ammanuwaa bessiyoogaana; hegaappe kaalliyay nagaraappe simmiyoogaa, laamettiyoogaanne ba huuphiyaa Xoossaassi geppiyoogaa.—Yohaannisa 17:3; Oosuwaa 3:19; 18:8.

▪ Ne huuphiyaa Yihoowassi geppanau, asay Yesuusa kaallanau bana yeggi bayidoogaadan, nena yegga bayana koshshees.—Marqqoosa 8:34.

▪ Xinqqatee issi uri ba kase deˈuwaayyo hayqqidi, Xoossaa sheniyaa oottanau deˈuwan denddiyoogaa malaatees.—1 PHeexiroosa 4:2.

[Oyshaa]

[Sinttaa 180n diya misiliyaa]

Xoossaa Qaalaa tumu eraa demmiyoogee xinqqatiyau gidaa kunttanau keehi koshshiya tanggo

[Sinttaa 180n diya misiliyaa]

Neeni ammaniyoobaa haratussi yootanau ammanoy nena denttettanau bessees

[Sinttaa 181n diya misiliyaa]

Woosan ne huuphiyaa Xoossaassi geppadii?

[Sinttaa 181n diya misiliyaa]

Xinqqate giyoogee, nu kase deˈuwau hayqqidi Xoossaa sheniyaa oottanau deˈuwan denddiyoogaa yaagiyoogaa