SHemppuwaa Hosppuna

Xoossaa Kawotettay Aybee?

Xoossaa Kawotettaabaa Geeshsha Maxaafay nuussi ay yootii?

Xoossaa Kawotettay ay oottanee?

He Kawotettay Xoossaa shenee saˈan hananaadan oottanay awudee?

1. Keehi erettida woygiyo woosaa haˈˈi pilgganee?

ALAME yuushuwan deˈiya miilooniyan qoodettiya asati, daroti Nu Aawau giyo woosaa woykko Godaa Woosaa giyo woosaa loytti eroosona. Ha naaˈˈu qaalatikka Yesuus Kiristtoosi ba huuphe leemiso ootti bessido keehippe erettida woosaa malaatoosona. Hegee keehi gita birshshettaa oyqqida woosa; qassi he woosan koyro oychchiyo heezzubati, tumuppe Geeshsha Maxaafay ay tamaarissiyaakko neeni eranaadan maaddoosona.

2. Yesuusi ba erissiyo ashkkarati woossanaadan tamaarissido heezzubati aybee?

² He leemiso gidida woosaa doomettan, Yesuusi bana ezggiyaageeta: “Simmi intte hagaadan yaagidi, Xoossaa woossite; ‘Saluwan de7⁠iya nu Aawau, ne geeshsha sunttai anjjetto. Ne kawotettai yo; ne shenee saluwan hanidoogaadan, sa7ankka hano’ “ yaagiis. (Maatiyoosa 6:9-13) Woosan oychchiyo ha heezzubatu birshshettay aybee?

3. Xoossaa Kawotettaabaa nuuni ay erana koshshii?

³ Hanno gakkanaashin Xoossaa sunttaa, Yihoowabaa darobaa tamaarida. Xoossaa sheniyaabaakka giishin, i oottidobaanne sinttappekka oottanabaa amaridabaa tamaarida. SHin Yesuusi “Ne kawotettai yo” giidi nuuni woossanaadan yootido kawotettay awugee? Xoossaa Kawotettay aybee? A  yuussay Xoossaa sunttay anjjettanaadan woykko bonchchettanaadan waati oottii? Xoossaa Kawotettaa yuussay Xoossaa shenee polettiyoogaara waani gayttii?

XOOSSAA KAWOTETTAY AYBEE?

4. Xoossaa Kawotettay aybee? A Kawoy oonee?

⁴ Xoossaa Kawotettay Xoossan doorettida Kawoy deˈiyo, Xoossaa Yihooway essido ayso. Xoossaa Kawotettaa kawoy oonee? Yesuus Kiristtoosa. Yesuusi Kawo gidiyoogan asaa haariyaageetu ubbaappe aadhdhiyaagaa gidiyo gishshau, ‘kawotu Kawuwaa, godatu Godaa’ geetettiis. (1 Ximootiyoosa 6:15) Asaa haariya ay uraappe, ubba eta giddoppe ooppenne loˈˈo giyoogeetuppekka aadhdhiya daro loˈˈobaa oottiyo wolqqay assi deˈees.

5. Xoossaa Kawotettay awan gididi haaranee? Ay haaranee?

⁵ Xoossaa Kawotettay awan gididi haaranee? Yesuusi deˈiyo sohuwaa eriyoogee, ha oyshaa zaaranau maaddees. Asay a mittaa bolli gita waayiyan woridoogaanne i hayquwaappe denddidoogaakka neeni tamaaridoogaa hassayiyoogee qoncce. Hegaappe gamˈˈennan saluwaa biis. (Oosuwaa 2:33) Hegaa gishshau, Xoossaa Kawotettaykka deˈiyoy yan saluwaana. Geeshsha Maxaafay a “saluwaa kawotettaa” giyoykka hegaassa. (2 Ximootiyoosa 4:18) Xoossaa Kawotettay deˈiyoy saluwaana gidikkonne, saˈaa bolli haarana.—Ajjuutaa 11:15.

6, 7. Yesuusa keehippe dumma Kawo oottiyaabay aybee?

⁶ Yesuusa keehippe dumma Kawo oottiyaabay aybee? Issi gaasoy, i mule hayqqennaagaa gidiyoogaa. Hara kawotuura gatti xeelliyo wode, Geeshsha Maxaafay a “Haiqqennaagee issi a xalaala. Ooninne akko shiiqanau danddayenna poo7⁠uwan de7⁠ees” yaagees. (1 Ximootiyoosa 6:16) Hegee, Yesuusi oottana loˈˈobay ubbay polettana giyoogaa. I gitabaanne asaa maaddiya daro loˈˈobaa oottana.

⁷ Yesuusa xeelliyaagan odettida Geeshsha Maxaafaa hiraagaa  beˈa: “GODAA Ayyaanai, aadhdhida eratettaanne akeekaa Ayyaanai, zoriyaanne wolqqaa Ayyaanai, eratettaanne GODAAYYO yayyiyo Ayyaanai a bolli shemppana. GODAAYYO yayyiyoogan i ufaittees; ba aifee be7⁠idoban coo pirddenna; woikko ba haittai siyidoban coo kuuyenna. SHin hiyyeesatuyyo i xilluwan pirddana; sa7an de7⁠iya metootanchchatu yohuwaakka i suuretettan kuuyana.” (Isiyaasa 11:2-4) Yesuusi xillonne qarettiya Kawo gididi saˈa ubban haaranaagaa ha qaalati bessoosona. Hegaadan haariya kawo neeni koyikkii?

8. Yesuusaara haaranaageeti oonee?

⁸ Xoossaa Kawotettaa xeelliyaagan hara tumay: Yesuusi haariyoy barkka gidenna. Aara issippe haariyaageetikka deˈoosona. Leemisuwau, PHauloosi Ximootiyoosassi: “Nuuni genccikko, aara issippe kawotana” yaagiis. (2 Ximootiyoosa 2:12) Ee, PHauloosi, Ximootiyoosinne Xoossan doorettida hara ammanettidaageeti saluwaa Kawotettan Yesuusaara issippe haarana. Hegaa mala dumma maataa demmanay aappunatee?

9. Yesuusaara haaranaageeti aappunee? Xoossay eta dooriyoogaa awude doommidee?

⁹ Ha maxaafan SHemppuwaa 7n deˈiyaagaadan, kiitettida Yohaannisi ba beˈido ajjuutan “Dorssai [Yesuus Kiristtoosi] Xiyoone Deriyaa bolli [saluwan kawo gididi] eqqiis. A sunttainne a Aawaa sunttai som77⁠uwan xaafettido, issi xeetanne oitamanne oiddu sha7⁠u asati aara issippe de7⁠oosona” yaagiis. He 144,000⁠u asati oonee? Yohaannisi ba huuphe: “Dorssai biyoosaa ubbaa eti kaalloosona. Eti Xoossaassinne Dorssaassi baira gidanau, sa7aa asa giddoppe wozettidaageeta” yaagiis. (Ajjuutaa 14:1, 4) Ee, eti Yesuus Kiristtoosaara saluwan haaranau doorettidaageetanne a kaalliya ammanettida asata. Hayquwaappe saluwan deˈanau denddidi, Yesuusaara “eti sa7an haarana.” (Ajjuutaa 5:10) Kiitettidaageeti deˈido wodiyaappe doommidi, Xoossay 144,000⁠u qoodaa kunttanau ammanettida Kiristtaaneta dooriiddi takkiis.

10. Yesuusinne 144,000⁠u asati, asaa haaranaagee siiqo giigisso gidiyoy aybissee?

 ¹⁰ Yesuusinne 144,000⁠ti asaa haaranaadan Xoossay oottido giigissoy keehippe siiqo giigiso. Koyruwan, asa gidiyoogeenne waayettiyoogee ay malakko Yesuusi erees. PHauloosi Yesuusa xeelliyaagan, “nuuni daafuriyo wode nuuyyo qarettanau danddayees; nagara i oottibeennaagaappe attin, nunadan ubbabankka paacettiis” yaagiis. (Ibraawe 4:15; 5:8) Aara issippe haariyaageetikka hara asaagaadan waayettidaageetanne genccidaageeta. Hegaa bollikka, polotetta pacaara baaxetiyoogaanne dumma dumma sahuwaa gencci aattidosona. Asaa naata gakkiya metuwaa eti akeekanaagee qoncce.

XOOSSAA KAWOTETTAY AY OOTTANEE?

11. Yesuusi ba erissiyo ashkkarati Xoossaa shenee saluwan hanana mala woossanaadan ayssi yootidee?

¹¹ Yesuusi ba erissiyo ashkkarati Xoossaa Kawotettay yaanaadan woossana koshshiyoogaa yootido wode, Xoossaa shenee “saluwan hanidoogaadan, sa7ankka hano” giidi woossanaadankka yootiis. Xoossay deˈiyoy saluwaana; a shenee yan ammanettida kiitanchchatun ubbatoo polettees. Gidikkonne, ha maxaafan SHemppuwaa 3n, issi iita kiitanchchay Xoossaa sheniyaa poliyoogaa aggi bayidi, Addaamanne Hewaano nagaara ootissidoogaa tamaarida. SHemppuwaa 10n, Seexaanaa Dabloosa geetettiya iita kiitanchchaabaa Geeshsha Maxaafay ay tamaarissiyaakko gujjidi tamaarana. Seexaanaynne a kaalliya daydanttata geetetti xeegettiya ayyaana meretati amarida wodiyaassi saluwan deˈiyoogaa digettibookkona. Yaatiyo gishshau, he wode saluwan deˈiya ubbati Xoossaa sheniyaa oottiyaageeta gidokkona. Xoossaa Kawotettay haariyoogaa doommiyo wode ha hanotay laamettees. Doorettida ooratta Kawoy, Yesuus Kiristtoosi Seexaanaa bolli olaa denttees.—Ajjuutaa 12:7-9.

12. Ajjuutaa 12:10n qonccida keehippe koshshiya naaˈˈu hanotati awugeetee?

 ¹² Kaallidi deˈiya hiraagay aybi hananaakko qonccissees: “Taani saluwaappe hagaadan yaagiya cenggurssaa siyaas; ‘Xoossaa atotettai ha77⁠i yiis. Xoossai bau Kawo gidiyoogaadankka ba wolqqaa bessiis; a Kiristtoosi ba maataa bessiis. Aissi giikko, qamminne gallassi Xoossaa sinttan eqqidi, nu ishantta mootiyaagee [Seexaanay] saluwaappe duge olettiis.’” (Ajjuutaa 12:10) Geeshsha Maxaafan, ha xiqisiyan qonccida keehippe koshshiya naaˈˈu hanotata akeekadii? Koyroy, Yesuus Kiristtoosi haariyo Xoossaa Kawotettay haariyoogaa doommiis. Naaˈˈanttoy, Seexaanay saluwaappe duge saˈau olettiis.

13. Seexaanay saluwaappe duge olettidoogan hanidabay aybee?

¹³ He naaˈˈu hanotatu wurssettay ay gididee? Saluwan hanidabaa xeelliyaagan: “Hegaa gishshau, saluwaunne salo giddon de7⁠iyaageetoo, ufaittite” yaagiyaagaa nabbaboos. Seexaanaynne a daydanttati saluwaappe xayido gishshaunne saluwan deˈiya ubbati Xoossaa Yihoowassi ammanettidaageeta gidiyo gishshau, saluwan deˈiya ammanettida kiitanchchati ufayttidosona. Polonne kumetta gidida saroynne issippetettay yan deˈees. Haˈˈi Xoossaa shenee saluwan haniis.

14. Seexaanay saˈau duge olettido gishshau aybi hanidee?

¹⁴ Saˈaa xeelliyaagan shin, woygana danddayettii? Geeshsha Maxaafay: “Sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagees. (Ajjuutaa 12:12) Seexaanay saluwaappe olettido gishshaunne au guutta wode xallay attido gishshau, keehippe hanqqettiis. He hanqquwaappe denddidaagan, i metuwaanne “aayye7ana” giissiyaabaa saˈan oottees. He “aayye7ana” giissiya darobaa kaalliya shemppuwan tamaarana. Hegaa wozanan wottidi, Godaa Kawotettay Xoossaa sheniyaa saˈan waati polanee? yaagidi oychchana danddayoos.

15. Saˈau deˈiya Xoossaa shenee aybee?

¹⁵ Saˈau deˈiya Xoossaa shenee aybakko hassaya. Hegaa xeelliyaagaa  SHemppuwaa 3n tamaaradasa. Ha saˈau deˈiya Xoossaa shenee, saˈay gannate gididi hayqqenna xillo asaa zerettan kumanaadaana gidiyoogaa Xoossay Edenen bessiis. Seexaanay Addaamanne Hewaano nagaraa ootissin, hegee saˈau deˈiya Xoossaa shenee polettiyo wodiyaa Sinttau sugidaba gidikkonne, Xoossaa halchchoy laamettanaadan oottibeenna. Yihoowayyo deˈiya halchchoy haˈˈikka “Xilloti biittaa laattananne yan merinau de7ana” yaagiyaagaa. (Mazamure 37:29) Xoossaa Kawotettay hegaa polana. Waatidi polanee?

16, 17. Daaneela 2:44y Xoossaa Kawotettaabaa nuussi ay yootii?

¹⁶ Daaneela 2:44n deˈiya hiraagaa qoppa. Hagaadan gees: “He kawotu laittan, saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.” Hagee Xoossaa Kawotettaabaa nuussi ay yootii?

¹⁷ Koyruwan, Xoossaa Kawotettay eqqiyoy “he kawotu laittan” woykko hara kawotettati haariyo wodiyaana gidiyoogaa yootees. Naaˈˈanttuwan, he Kawotettay merinau eqqidi daanaagaa yootees. He Kawotettay hara aysuwan xoonettennanne laamettenna. Heezzanttuwan, Xoossaa Kawotettaa giddooninne ha alamiyaa kawotettatu giddon olay denddanaagaa akeekoos. Xooniyaagee Xoossaa Kawotettaa gidees. Hegaappe, asaa ayssiyaagee Xoossaa Kawotetta xalla gidees. Hegaappe guyyiyan, asaa naati bantta deˈuwan beˈido haaro ubbaappe loˈˈo haaruwan deˈana.

18. Xoossaa Kawotettay ha alamiyaa aysuwaara olettiyo wurssetta olay ayba geetettii?

¹⁸ Geeshsha Maxaafay Xoossaa Kawotettay ha alamiyaa ayssiyaageetuura olettiyo wurssetta olaabaa yootiyoobay darobay deˈees. Leemisuwau, wurssettay gakkiyo wode, iita ayyaanati “sa7aa kawota ubbaa” worddo cimuwan balettana. Ayba halchchuwaassee? ‘Ubbaappe Wolqqaama Xoossaa gita gallassan, eta olaayyo shiishshanaassa.’ Saˈaa kawoti “Ibraisxxe qaalan  Armmageedoona giyo sohuwaa” shiiqana. (Ajjuutaa 16:14, 16) Ha naaˈˈu xiqisetun beˈidoogaadan, asa aysuwaaninne Xoossaa Kawotettaa giddon denddiya wurssetta olay Armmageedoona geetettees.

19, 20. Xoossaa shenee haˈˈi saˈan hanennaadan oottidabay aybee?

¹⁹ Xoossaa Kawotettay Armmageedoona olan ay polanee? Saˈau deˈiya Xoossaa shenee aybakko zaarettada qoppa. Xoossaa Yihooway bayyo oottiya xillonne polo gidida asay Gannate saˈaa kumanaadan halchchiis. Hegee haˈˈi hanennaadan oottidabay aybee? Koyruwan, nuuni nagaranchcha gidido gishshau, harggoosinne hayqqoos. Gidikkonne, SHemppuwaa 5n tamaaridoogaadan, Yesuusi nu gishshau hayqqido gishshau, merinau deˈana danddayoos. Yohaannisa Wonggeliyan deˈiya qaalaa hassayennan aggakka: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.”—Yohaannisa 3:16.

²⁰ Hara metoy qassi daro asati iitabaa oottoosona. Worddotoosona, cimmoosonanne shaaramuxoosona. Eti Xoossaa sheniyaa oottanau koyokkona. Iitabaa oottiya asati Xoossaa olaa wode Armmageedoonan xayoosona. (Mazamure 37:10) Xoossaa shenee saˈan hanibeenna hara gaasoy qassi, asa aysoy asay hegaa oottanaadan minttettibeenna gishshataassa. Ayssiya daroti abbee baynnaageeta, meqetti baynnaageetanne ammanettennaageeta. Geeshsha Maxaafay qoncciyan, “asi bau de7⁠iya haariyo maataa hara asa qohanau go7⁠ettiyoogaa” yootees.—Eranchchaa 8:9.

21. Xoossaa Kawotettay Xoossaa shenee saˈan hananaadan waati oottanee?

²¹ Armmageedoonappe simmin, asay issi aysuwan, Xoossaa Kawotettan haarettana. He Kawtettay Xoossaa sheniyaa oottananne maalaalissiya anjjuwaa ehaana. Leemisuwau, he Kawotettay Seexaanaanne daydanttata xayssana. (Ajjuutaa 20:1-3) Yesuusa yarshshuwaa goˈˈay oosuwan peeˈiyo gishshau,  ammanettida asaa naati hegaappe guyyiyan harggokkonanne hayqqokkona. Ubba he Kawotettan haarettiiddi merinau deˈana danddayoosona. (Ajjuutaa 22:1-3) Saˈay gannate gidana. He Kawotettay Xoossaa shenee saˈan hananaadan oottanaynne Xoossaa sunttaa bonchchissanay hegaadaana. Hegee woygiyoogee? Hegee, Xoossaa Kawotettaa haaruwaa giddon, deˈuwan deˈiya ubbay Yihoowa sunttaa bonchchana yaagiyoogaa.

XOOSSAA KAWOTETTAY A SHENIYAA POLANAY AWUDEE?

22. Xoossaa Kawotettay Yesuusi saˈan deˈido wode gidin, woykko a dendduwaappe simmin sohuwaara yibeennaagaa waati eriyoo?

²² Yesuusi bana kaalliyaageeti “Ne kawotettai yo” giidi woossanaadan odido wode, he Kawotettay yiichchibeennaagee qoncce. Yesuusi saluwaa biido wode shin yiidee? CHii; PHeexiroosinne PHauloosi naaˈˈaykka, Yesuusa dendduwaappe simmin, Mazamure 110:1y a bolli polettidoogaa yootiiddi: “GODAI ta godaa, ‘Taani ne morkketa neeni tohuwan yedhdha eqqiyoobaa oottana gakkanaassi, hagan taappe ushachcha baggaara utta’ yaagiis” yaagidosona. (Oosuwaa 2:32-35; Ibraawe 10:12, 13) Naagiiddi takkiyo wodee deˈees.

23. (a) Xoossaa Kawotettay haariyoogaa awude doommidee? (b) Kaalliya shemppuwan ay tamaaranee?

²³ Awude gakkanaassii? Ashkke gidida Geeshsha Maxaafaa tamaareti 19⁠tta xeetu layttan, he naagiyo wodee 1914n wuriyoogaa  akeekan qoodidi eridosona. (He wodiyaa xeelliyaagan, Gujo Timirttiyaa, sinttaa 215-18 xeella.) He ashkke gidida Geeshsha Maxaafaa tamaareti wodiyaa suure qoodidoogaa, 1914n polettida alamiyaa hanotati boxooxissoosona. Geeshsha Maxaafaa hiraagaa polettay, 1914n Kiristtoosi Kawo gididoogaanne saluwan deˈiya Xoossaa Kawotettay haariyoogaa doommidoogaa bessees. Yaatiyo gishshau, nuuni deˈiyoy Seexaanau “guutta wodee” attido wodiyaana. (Ajjuutaa 12:12; Mazamure 110:2) Siree baynnan, Xoossaa Kawotettay mata wode Xoossaa shenee saˈan hananaadan oottana gaanaukka danddayoos. Ha misharaachchoy nena keehippe ufayssennee? Hegee tuma gidiyoogaa ammanay? Kaalliya shemppoy tumuppe Geeshsha Maxaafay hegaa tamaarissiyoogaa akeekanaadan nena maaddana.

GEESHSHA MAXAAFAY TAMAARISSIYOOBAA

▪ Xoossaa Kawotettay, Yesuusi Kawo gididonne asaa naatuppe wozettida 144,000⁠u asati aara issippe haariyo, saluwan deˈiya ayso.—Ajjuutaa 14:1, 4.

▪ Xoossaa Kawotettay haariyoogaa doommidoy 1914na; he wode Seexaanay saluwaappe saˈau duge olettiis.—Ajjuutaa 12:9.

▪ Xoossaa Kawotettay mata wodiyan asaa aysuwaa xayssana; saˈaykka gannate gidana.—Ajjuutaa 16:14, 16.

[Oyshaa]

 [Sinttaa 83n diya misiliyaa]

Seexaanaynne a daydanttati saluwaappe olettidoogee saˈan aayyeˈana giissiyaabaa kaalettiis. Hegaa mala metoy mata wode xayana

[Sinttaa 84n diya misiliyaa]

Xoossaa Kawotettay haariyo wode, Xoossaa shenee saluwan hanidoogaadan saˈankka hanana