SHemppuwaa Tammanne Ichchasha

Xoossaa Ufayssiya Goynuwaa

Haymaanootee ubbay Xoossaa ufayssii?

Tumu haymaanootiyaa waati shaakki erana danddayiyoo?

Saˈan ha wodiyan Xoossaayyo tumu goynniyaageeti oonee?

1. Xoossaayyo suure ogiyan goynniyaaba gidikko, waanidi goˈettiyoo?

XOOSSAA YIHOOWAY nuuyyo keehippe qoppeesinne a siiqo kaaletuwan nuuni goˈettana mala koyees. Nuuni suure ogiyan ayyo goynniyaaba gidikko, ufayttiyaageetanne deˈuwan gakkiya daro metuwaappe naagettiyaageeta gidoos. A anjjuwaanne a maaduwaakka demmoos. (Isiyaasa 48:17) SHin, Xoossaabaa tumaa tamaarissoos yaagiya xeetan qoodettiya haymaanooteti deˈoosona. Gidoppe attin, eti Xoossaa oonatettaanne i nuuppe koyiyoobaa xeelliyaagan tamaarissiyoobay issoy issuwaagaappe keehi dummatees.

2. Yihoowayyo goynniyo suure ogiyaa waati erana danddayiyoo? Hegaa akeekanau maaddiya leemisoy awugee?

² Yihoowayyo goynniyo suure ogiyaa waata erana danddayay? Ubba haymaanooteti tamaarissiyo timirttiyaa erada issuwaa haraara geeddarissiyoogaa koshshenna. Neeni tumuppe Geeshsha Maxaafay tumu goynuwaabaa ay tamaarissiyaakko, hegaa xallaa erana bessees. Hegaa leemisuwan qonccissanau: Daro biittan worddo biraara gayttida metoy deˈees. Worddo biraa haraappe shaakkiyo oosoyo neeyyo imettiyaaba gidiyaakko, worddo biraa waata shaakka eruutee? Worddo biraa huuphiyan huuphiyan akeekiyoogaanee? Akkay. Tumu biraa loytta eranau wodiyaa immiyaaba gidikko, hegee eratetta. Tumu biray ay malatiyaakko eroogaappe guyyiyan, worddo biraa shaakka erana danddayaasa. Hegaara issi mala gidida hanotan, tumu haymaanootiyaa shaakki eriyo ogiyaa tamaariyo  wode, worddo gidida haymaanooteta erana danddayoos.

3. Yesuusi giidoogaadan, Xoossan nashettanau koyiyaaba gidikko, nuuni ay oottana koshshii?

³ Nuuni a ufayssiya ogiyan Yihoowayyo goynniyoogee keehi koshshiyaaba. Daro asay, ubba haymaanooteekka Xoossaa ufayssiyaadan qoppees; shin Geeshsha Maxaafay hegaadan tamaarissenna. Haray atto bana Kiristtaane giyoogaa xallaykka gidenna. Yesuusi: “Saluwan de7⁠iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna” yaagiis. Hegaa gishshau, Xoossan nashettanau, Xoossay nuuppe koyiyoobaa eranaunne oosuwan peeshshanau koshshees. Yesuusi Xoossaa sheniyaa oottennaageeta ‘iitabaa oottiyaageeta’ yaagidi xeegiis. (Maatiyoosa 7:21-23) Worddo biraadan worddo haymaanootiyaukka waagi baawa. Ubba ixxi iitidi, hegaa mala haymaanootee tumuppe qohees.

4. Yesuusi naaˈˈu ogiyaa xeelliyaagan yootidobay ay malaatii? Eti au au kaalettiyoonaa?

⁴ Yihooway ubba asau saˈan merinaa deˈuwaa demmiyo hanotaa injjeyiis. Gidikkokka, nuuni Gannatiyan merinaa deˈuwaa demmanau, Xoossaayyo bessiya ogiyan goynnanaunne a ufayssiya ogiyan haˈˈi deˈanau koshshees. Daroti hegaadan oottanau koyennaagee azzanttiyaaba. Yesuusi: “Un77⁠o penggiyaara gelite. Aissi giikko, bashshau efiya penggee aaho; ogeekka woggaa. Hegaara geliya asaikka daro. Aissi giikko, de7⁠uwau efiya penggee un77⁠o; ogeekka xuntta. Qassi hegaara biya asatikka amaridaageeta” giidoy hegaassa. (Maatiyoosa 7:13, 14) Tumu haymaanootee merinaa deˈuwau kaalettees. Worddo haymaanootee bashshau kaalettees. Yihooway ay asinne xayanaadan koyenna; i ubba heeran deˈiya asay abaa tamaaranaadan injjiyaa medhdhiiddi deˈiyoy hegaassa. (2 PHeexiroosa 3:9) Hegaa gishshau, nuuni Xoossaayyo goynniyo ogee nuussi deˈo woykko hayqo giyoogaa gidiyoogee erettidaagaa.

TUMU HAYMAANOOTIYAA SHAAKKI ERIYO OGIYAA

5. Tumu haymaanootiyan simerettiyaageeta waati shaakki erana danddayiyoo?

⁵ ‘Deˈuwaa ogee’ aybin erettii? Yesuusi tumu haymaanootee, he  haymaanootiyan simerettiya asaa deˈuwan qoncciyoogaa yootiis. I: “Eti aifiyo aifiyan intte eta erana; . . . lo77⁠o mitta ubbai lo77⁠o aife aifees” yaagiis. (Maatiyoosa 7:16, 17) Hara ogiyan, tumu haymaanootiyan simerettiyaageeti bantta ammanuwaaninne bantta eeshshan erettoosona yaagiyoogaa. Eti polo gidennaageetanne balaa oottiyaageeta gidikkonne, tumu goynuwaa goynniyaageeti cita xekkan xeelliyo wode, Xoossaa sheniyaa oottanau baaxetoosona. Tumu haymaanootiyan simerettiyaageeta shaakki eranau maaddiya usuppun ogeta ane beˈoos.

6, 7. Xoossaayyo oottiyaageeti Geeshsha Maxaafaa waati xeelliyoonaa? Yesuusi hegaa xeelliyaagan leemiso gidiyaaba ay oottidee?

⁶ Tumu ogiyan Xoossaayyo goynniyaageeti tamaarissiyoobay baasettidoy Geeshsha Maxaafaana. Geeshsha Maxaafay ba huuphe: “Xoossaa maxaafa ubban Xoossaa Ayyaanai de7⁠ees. Qassi he maxaafati Xoossau oottiya asi kumettanne lo77⁠o ooso ubbau giigidaagaa gidana mala, tumatettaa tamaarissanau, balaa seeranau, mooruwaa suurissanaunne xillotetta de7⁠uwau zoriyaa immanau maaddoosona” yaagees. (2 Ximootiyoosa 3:16, 17) Kiitettida PHauloosi ba mala Kiristtaanetussi: ‘Intte nuuppe Xoossaa qaalaa tuma gididoogaadan ekkido wode, Xoossaa kiitadan ekkidoogaappe attin, asa kiitadan ekkibeekketa’ yaagidi xaafiis. (1 Tasalonqqe 2:13) Hegaa gishshau, tumu haymaanootiyaa ammanoynne oosoy baasettidoy asa xeelaana woykko wogaana gidenna. He ammanoynne oosoy baasettidoy Xoossaa ayyaanan xaafettida Qaalan, Geeshsha Maxaafaana.

⁷ Yesuus Kiristtoosi ba timirttiyaa Xoossaa Qaalan baasiyoogan kaallana bessiya leemiso gidiis. Saluwan deˈiya ba Aawau woossiiddi: “Ne qaalaikka tumatettaa” yaagiis. (Yohaannisa 17:17) Yesuusi Xoossaa Qaalaa ammanees; i tamaarissido ubbabay Geeshsha Maxaafaara maayettiyaagaa. Yesuusi darotoo: “Xoossaa maxaafay . . . yaagees” yaagiis. (Maatiyoosa 4:4, 7, 10) Yesuusi Geeshsha Maxaafaappe yootidi tamaarissees. Hegaara issi mala hanotan, ha wodiyan deˈiya Xoossaa asatikka bantta qofaa tamaarissokkona. Eti Geeshsha Maxaafay Xoossaa Qaalaa gidiyoogaa ammanoosona; bantta timirttiyaakka minttidi baasidoy i giyoobaana.

8. Yihoowayyo goynniyoogee ay gujjii?

 ⁸ Tumu haymaanootiyan simerettiyaageeti Yihoowa xallau goynnoosonanne a sunttaa erissoosona. Yesuusi qoncciyan: “Godaayyo, ne Xoossaayyo goinna; a xalaalau ootta” yaagiis. (Maatiyoosa 4:10) Hegaa gishshau, Xoossau oottiyaageeti goynniyoy hara oossinne gidennan Yihoowa xallaassa. Ha goynoy tumu Xoossaa sunttay oonakkonne i ay mala Xoossakko asaa erissiyoogaakka gujjees. Mazamure 83:18y: “Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona” yaagees. Yesuusi harati Xoossaa eranaadan oottiyoogan leemiso gidiyaabaa ba woosan bessiiddi: “Taani ne sunttaa eta erissaas” yaagiis. (Yohaannisa 17:26) Hegaadan, ha wodiyan tumu goynuwaa goynniyaageeti Xoossaa sunttaa, a halchchotanne a eeshshata harata tamaarissoosona.

9, 10. Tumu Kiristtaaneti issoy issuwau siiquwaa bessiyoy ayba ogetuunee?

⁹ Xoossaa asati issoy issuwaa tumuppe siiqiyoogaanne bantta huuphe xallaa siiqennaagaa bessoosona. Yesuusi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Beni wode Kiristtaaneti Yesuusi giidoogaadan issoy issuwaara siiqettidosona. Nuuni bessana mala Xoossay tamaarissido siiqoy zariyaa, maabaraanne yelettido biittaa dummatettaa xeellennan aggidi, asay tumu ishatettan, duuxxenna issippetettan deˈanaadan oottees. (Qolasiyaasa 3:14) Worddo haymaanootiyaa kaalliya asatussi hegaadan issoy issuwaara siiqettiyo ishatettay baawa. Hegaa waati erana danddayiyoo? Yelettido biittaa woykko zariyaa dummatettaappe denddidaagan issoy issuwaa woroosona. Tumu Kiristtaaneti bantta Kiristtaane ishantta woykko hara oonakka gidin woranau ola miishshaa denttokkona. Geeshsha Maxaafay: “Xoossaa naatu giddooninne xalahe halaqaa naatu giddon de7⁠iya dummatettai hagan erettees; xillobaa oottenna urai woikko ba ishaa siiqenna urai ooninne Xoossaa Na7a gidenna. . . . ‘Issoi issuwaara siiqettanau bessees.’ . . . Nuuni Qaayeela mala gidanau bessenna. Qaayeeli xalahe halaqaassa; yaanidi ba ishaa woriis” yaagees.—1 Yohaannisa 3:10-12; 4:20, 21.

¹⁰ Tumu siiqoy harata woriyoogaappe naagettiyoogaappekka  dariyaabaa gujjiyoogee qoncce. Tumu Kiristtaaneti issoy issuwaa maaddanaunne minttettanau bantta wodiyaa, wolqqaanne aquwaa bantta huuphe xallaa siiqiyoogaappe dumma gidida ogiyan goˈettoosona. (Ibraawe 10:24, 25) Eti meto wodiyan issoy issuwaa maaddoosonanne issoy issuwaara ammanettiyo hanotan deˈoosona. Gidikkokka, eti “asa ubbau lo77⁠obaa oottoos” yaagiya Geeshsha Maxaafaa zoriyaakka bantta deˈuwan oosuwan peeshshoosona.—Galaatiyaa 6:10.

11. Xoossay asaa ashshanau immidoy Yesuus Kiristtoosa gidiyoogaa ammanana koshshiyoy aybissee?

¹¹ Tumu Kiristtaaneti Yesuus Kiristtoosa, Xoossay nuna ashshanau immidoogaadan ammanoosona. Geeshsha Maxaafay: “Asi atotettaa Yesuusa baggaara demmanaappe attin, hara o baggaaranne demmenna; nuuni a sunttan attanau bessees; aissi giikko, Xoossai saluwaappe garssan asassi immido hara suntti baawa” yaagees. (Oosuwaa 4:12) Nuuni SHemppuwaa 5n beˈidoogaadan, Yesuusi ba deˈuwaa wozo oottidi azazettiya asaa naatussi immiis. (Maatiyoosa 20:28) Hegaa bolli, Yesuusi kumetta saˈaa mata wode haariya, saluwan deˈiya Xoossaa Kawotettaa Kawo gidiis. Nuuni merinaa deˈuwaa demmanau koyiyaaba gidikko, Yesuusau azazettanaadaaninne a timirttiyaakka oosuwan peeshshanaadan Xoossay koyees. Geeshsha Maxaafay: “Na7aa ammaniya urau merinaa de7⁠oi de7⁠ees; shin Na7aa ammanennaagaa bolli Xoossaa hanqqoi de7anaagaappe attin, i de7⁠o be7⁠enna” yaagiyoy hegaassa.—Yohaannisa 3:36.

12. Alamiyaa bagga gidennaagee ay gujjii?

¹² Tumu goynuwaa goynniyaageeti alamiyaa bagga gidokkona. Yesuusi Roome biittaa haariya PHilaaxoosa sintti pirddau shiiqido wode: “Ta kawotettai ha sa7aana gidenna” yaagiis. (Yohaannisa 18:36) Tumuppe Yesuusa kaalliyaageeti awu biittan deˈiyaaba gidikkonne, saluwan deˈiya a Kawotettau haarettiyo gishshau, alamiyaa polotikaa allaalletun gelennan banttana minttidi naagoosona. Polotikaa gaasuwan merettiya dummatettaaninne ooshshan o bagganne gididi eqqokkona. Haray atto, harati polotikaa yamiyaa bagga gidanau, doorettanau woykko dooranau oottiyoobatunkka, Yihoowayyo goynniyaageeti bantta kushiyaa  gelissokkona. Xoossaayyo tumu goynuwaa goynniyaageeti polotikaara gayttidaban o bagganne gidana xayikkonne, higgiyau azazettoosona. Aybissi? Xoossaa Qaalay “deriyaa heemmiyaageetuyyo haarettanau bessees” yaagidi azaziyo gishshataassa. (Roome 13:1) Eti oottanaadan Xoossay koyiyoobaynne polotikaa siraatay koyiyoobay issoy issuwaara gaaddetiyo wode, tumu Kiristtaaneti: “Nuuni asau azazettanaappe Xoossau azazettanau bessees” yaagida kiitettidaageetu leemisuwaa kaalloosona.—Oosuwaa 5:29; Marqqoosa 12:17.

13. Yesuusa tumuppe kaalliyaageeti Xoossaa Kawotettaa aybadan xeelliyoonaa? Hegaa gishshau, ay oottiyoonaa?

 ¹³ Asaa naatussi deˈiya mexi issi hidootay Xoossaa Kawotettaa gidiyoogaa Yesuusa tumuppe kaalliyaageeti sabbakoosona. Yesuusi kasetidi: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagiis. (Maatiyoosa 24:14) Yesuus Kiristtoosa tumuppe kaalliyaageeti, asay ba metuwaa qaariyay asaa haaruwaa giidi naaganaadan minttettiyoogaappe, asaa naatu mexi issi hidootay saluwan deˈiya Xoossaa Kawotettaa gidiyoogaa awaajjoosona. (Mazamure 146:3) Yesuusi: “Ne kawotettai yo; ne shenee saluwan hanidoogaadan, sa7ankka hano” yaagidi polo gidida aysuwau nuuni woossanaadan tamaarissiis. (Maatiyoosa 6:10) Saluwan deˈiya he Kawotettaa xeelliyaagan Xoossaa Qaalay kasetidi, “He eqqida kawotettai he kawotettata [haˈˈi deˈiyaageeta] ubbaa gaaceretti xaissana; shin i merinau eqqidi daana” yaagiis.—Daaneela 2:44.

14. Tumu goynuwaappe koyettiyaabata kunttiya haymaanootee awugaa gaada qoppay?

¹⁴ Qommoora denttidobata baaso ootta qoppiyoogan, hagaadan nena oychcha: ‘Ba timirtte ubbau Geeshsha Maxaafaa baaso oottidanne Yihoowa sunttay erettanaadan oottiya haymaanoote citay awugee? Yihooway nuna tamaarissiyo ogiyan siiquwaa bessiya, Yesuusan ammaniyaanne asaa naatu mexi issi tumu hidootay Xoossaa Kawotettaa gidiyoogaa awaajjiya citay awugee? Saˈan deˈiya ubba haymaanootetuppe koyettiya ha ubbabata kunttiyaagee awugee?’ Hanotati qoncciyan bessiyoogaadan, he haymaanoote citay Yihoowa Maarkkata.—Isiyaasa 43:10-12.

NEENI AY OOTTANEE?

15. Xoossay deˈiyoogaa ammaniyoogaappekka haraa ay oottanaadan Xoossay koyii?

¹⁵ Xoossaa ufayssanau an ammaniyoogaa xallay gidenna. Ubba Geeshsha Maxaafay daydanttatikka Xoossay deˈiyoogaa ammaniyoogaa yootees. (Yaaqooba 2:19) Gidoppe attin, eti Xoossaa sheniyaa polennaageenne Xoossan nashettennaagee qoncce. Xoossan nashettanau, i deˈiyoogaa ammaniyoogaa xalla gidennan a  sheniyaakka polana koshshees. Worddo haymaanootiyaappe kiyidi, tumu goynuwaa kaafana koshshees.

16. Worddo haymaanootiyaara gayttidaagan oottana bessiyaabi aybee?

¹⁶ Kiitettida PHauloosi, nuuni worddo goynuwaara gayttidabaappe haakkana bessiyoogaa yootiis. I: “Godai ‘Eta giddoppe kiyite; etappe shaahettite. Tunabaakka bochchoppite. Taani inttena mokka ekkana’ yaagiis” yaagidi xaafiis. (2 Qoronttoosa 6:17; Isiyaasa 52:11) Hegaa gishshau, tumu Kiristtaaneti worddo goynuwaara gayttida aybippenne haakkoosona.

17, 18. “Gita Baabiloona” oonee? Eesuwan ‘ippe kiyiyoogee’ ayssi koshshidee?

¹⁷ Dumma dumma qommo gidida ubba haymaanootetikka ‘Gita Baablooni’ bagga gidiyoogaa Geeshsha Maxaafay qonccissees. * (Ajjuutaa 17:5) He sunttay, Nohe wode gakkida Bashshaa Haattaappe guyyiyan, worddo haymaanootee pulttido beni Baabiloone katamaa hassayanaadan oottees. Ha wodiyan worddo haymaanootiyan deˈiya erettida timirttetinne oosoti pulttidoy, beni daro wodiyaappe kase deˈida Baabilooneppe. Leemisuwau, Baabilooneti sillaasiyau woykko heezzakka issuwaakka gidiya xoossaassi goynnidosona. Ha wodiyan daro haymaanootetussi waanna timirttee sillaasiyaa. SHin Geeshsha Maxaafay, tumu Xoossay Yihoowa gidiyoogaanne Yesuus Kiristtoosi qassi a Naˈaa gidiyoogaa qoncciyan tamaarissees. (Yohaannisa 17:3) Baabilooneti asay hayqqi simmin, bollaappe shaahettidi hayqqennan deˈiya shemppoy asau deˈiyoogaadaaninne keehi waayiyaa beˈiyo sohuwan waayettana danddayiyoogaakka ammanoosona. Ha wodiyan, shemppoy woykko ayyaanay hayqqennan siˈooliyaa taman xuugettana yaagidi daro haymaanooteti tamaarissoosona.

¹⁸ Beni Baabiloone goynoy saˈaa ubbasaa gakkido gishshau, ha wodiyaa Gita Baabiloona, alamiyaa worddo haymaanootiyaa ubbaa xaaxa waaxa oyqqidaaro geetettiyoogee bessiyaaba. Qoppennan bashshay worddo haymaanootiyaa ubbaa xaaxa waaxa oyqqidaaro gakkanaagaa Xoossay kasetidi yootiis. (Ajjuutaa 18:8)  Gita Baabiloone bagga gidida aybippenne kiyayichchiyoogee keehippe koshshiyoy aybissakko akeekadii? Wodee deˈishin, neeni haˈˈi eesuwan ‘ippe kiyanaadan’ Xoossaa Yihooway koyees.—Ajjuutaa 18:4.

19. Yihoowayyo oottiyoogan neeni ay demmanee?

¹⁹ Neeni worddo haymaanoote oosota agganau kuuyidoogaappe denddidaagan, issoti issoti kase nenaara deˈiya dabbotaa essana danddayoosona. Gidikkokka, Yihoowayyo a asaara gidada oottiyoogan, neeppe haliya aybippenne dariyaabaa ne demmana. Yesuusa kaallanau harabaa aggida i erissiyo koyro ashkkaratudan, neeyyookka daro ayyaana ishanttinne michchentti deˈana. Nena tumuppe siiqiya miilooniyan qoodettiya, alame yuushuwan deˈiya issi keettaa asa gidida, tumu Kiristtaanetu bagga neeni gidana. “Sinttappe yaana wodiyankka” merinau deˈiyo maalaalissiya hidootay neessi deˈees. (Marqqoosa 10:28-30) Geella guyyeppe, ne ammanuwaa gaasuwan nena aggi bayidaageetikka, Geeshsha Maxaafay tamaarissiyoobaa akeekidi, Yihoowayyo goynniyaageeta gidana danddayoosona.

20. Tumu haymaanootiyan simerettiyaageeti sinttappe ay demmanee?

²⁰ Xoossay mata wodiyan ha iita siraataa xayssidi, ba Kawotettan haarettiya xilloti deˈana ooratta alamiyaa ehaanaagaa Geeshsha Maxaafay tamaarissees. (2 PHeexiroosa 3:9, 13) Hegee ay mala maalaalissiya alame gidanee! Xilloti deˈana he ooratta siraatan, issi haymaanoote xallay, issi tumu goynoy deˈana. Tumu goynuwaa goynniyaageetuura issippetettaa medhdhanau bessiya tangguwaa haˈˈi ekkiyoogee eratetta gidennee?

[Tohossa qofaa]

GEESHSHA MAXAAFAY TAMAARISSIYOOBAA

▪ Issi tumu haymaanoote xallay deˈees.—Maatiyoosa 7:13, 14.

▪ Tumu haymaanootee ba timirttiyaaninne oosuwan erettees.—Maatiyoosa 7:16, 17.

▪ Yihoowa Markkati, Yihoowa ufayssiya ogiyan goynnoosona.—Isiyaasa 43:10.

[Oyshaa]

 [Sinttaa 147n diya saaxiniyaa]

TUMU XOOSSAU GOYNNIYAAGEETI

▪ bantta timirttiyaa baasiyoy Geeshsha Maxaafaana

▪ Yihoowa xallau goynnoosonanne a sunttaa erissoosona

▪ issoy issuwaara tumuppe siiqettoosona

▪ Xoossay nuna ashshanau Yesuusa immidoogaa ammanoosona

▪ alamiyaa bagga gidokkoan

▪ asaassi deˈiya mexi issi hidootay Xoossaa Kawotettaa gidiyoogaa sabbakoosona

[Sinttaa 150n diya misiliyaa]

Yihoowayyo a asaara gidada oottiyoogan,

neeppe haliya aybippenne dariyaabaa ne demmana