Xoossaa Ufayssiya Ogiyan Deˈiyoogaa

KAASSA

SHemppuwaa Tammanne Naaˈˈa

Xoossaa Ufayssiya Ogiyan Deˈiyoogaa

Neeni waanada Xoossaa dabbo gidana danddayay?

Yihooway ubbabaa haariyo maataa bolli Seexaanay denttido oyshay nena gujjiyoy ayba ogiyaanee?

Yihoowa ufayssenna eeshshay awugee?

Waanada Xoossaa ufayssiya ogiyan deˈana danddayay?

1, 2. Yihooway baassi mata dabbo ootti xeelliyo asatuppe amaridaageeta yoota.

MATA lagge woykko dabbo gidanaadan neeni dooriyoy ay mala asee? Neegaara issi mala gidida xeelay, koshshaynne eeshshay deˈiyo asa koyiyoogau siree baawa. Loˈˈo eeshshay deˈiyo urakko giishin, ammanettiyaanne keha gidida urakko shiiqaasa.

²Taarike wodetu ubban, amarida asata baayyo mata dabbo gidanaadan Xoossay dooriis. Leemisuwau, Yihooway Abrahaama baasi dabbo yaagiis. (Isiyaasa 41:8; Yaaqooba 2:23) Daawiti Yihooway siiqiyo asa gidiyo gishshau, Xoossay abaa yootiiddi ‘taani koyiyo ubbabaa ta wozanadan oottiyaagaa’ yaagiis. (Oosuwaa 13:22) Hananabaa yootiya Daaneelakka Yihooway ‘keehi dosiyoogaa’ yootiis.—Daaneela 9:23.

3. Yihooway amarida asata ba dabbo oottidi dooriyoy aybissee?

³Yihooway Abrahaama, Daawitanne Daaneela ba dabbo ootti xeellidoy aybissee? Abrahaamessi: ‘Neeni taayyo azazettadasa’ yaagiis. (Doomettaabaa 22:18) Hegaa gishshau, i azazidobaa eeno giidi oottiyaageetukko Yihooway shiiqees. I Israaˈeeletuyyo: “Taayyo azazettite. Yaatikko, taani intte Xoossaa gidana; inttekka ta asaa gidana” yaagiis. (Ermaasa 7:23) Yihoowassi azazettiyaaba gidikko, neenikka a dabbo gidana danddayaasa!

YIHOOWAY BA DABBOTA MINTTETTEES

4, 5. Xoossay ba asaa waati minttettii?

⁴Xoossaa dabbo gidiyoogan beettiya goˈˈaa qoppa. Geeshsha Maxaafay, “ba kumetta wozanaappe GODAN ammanettiya asa minttettanau” Yihooway injjiyaa koyiyoogaa yootees. (2 Odiya 16:9) Yihooway nena minttettiyoogaa waati bessana danddayii? Issi ogiyaa Mazamure 32:8y hagaadan yootees: “Taani [“Yihooway,” NW] nena erissananne neeni baanau bessiya ogiyaa nena tamaarissana; taani nena zorananne naagana.”

⁵Yihooway qoppiyoogaa bessiya ayba ufayssiya qonccissoo! I neeyyo koshshiya kaaletuwaa immees; qassi hegaa poliyo wode nena naagees. Nena gakkiya metuwaanne paaciyaa xoona kiyanaadan Xoossay nena maaddanau koyees. (Mazamure 55:22) Hegaa gishshau, neeni kumetta wozanaappe Yihoowassi oottiyaaba gidikko: “Taani ubbaton GODAI ta sinttan de7⁠iyoogaa hassayais. I taappe ushachcha baggaara de7⁠iyo gishshau, taani yeeqikke” giidi yexxida yettanchchaadan ammanettana danddayaasa. (Mazamure 16:8; 63:8) Ee, neeni a ufayssiya ogiyan deˈanaadan Yihooway nena maaddana danddayees. SHin neeni eriyoogaadan, heegaadan neeni oottenna mala teqqanau koyiya Xoossaa morkkee deˈees.

SEEXAANAY DENTTIDO OYSHAA

6. Asaa naata xeelliyaagan Seexaanay ayba mootuwaa denttidee?

⁶Ha maxaafay SHemppuwaa 11n Seexaanaa Dabloosi, Xoossay ubbabaa haariyo maataa bolli denttido oyshaa qonccissees. Yihooway, Addaamanne Hewaano banttau loˈˈaadan iitaanne kehaa dooridi kuuyiyo maataa diggiis yaagidi Seexaanay Xoossaa wordduwan mootiis. Addaameenne Hewaana nagaraa ootti simmin, saˈay eta zariyan kumiyoogaa doommin, asaa naati ubbay Xoossaayyo oottanau denttettiyaabaa xeelliyaagan Seexaanay mootuwaa denttiis. Seexaanay: “Asay Xoossaassi oottiyoy a siiqiyo gishshataassa gidenna. Maatay taassi imettiyaaba gidikko, oonakka gidin Xoossaappe haassana danddayays” yaagiis. Iyyooba geetettiya bitaniyaa taarikee, Seexaanay hegaadan ammanidoogaa bessees. Iyyoobi oonee? Seexaanay denttido oyshay a xeelliyoy ayba ogiyaanee?

7, 8. (a) He wode deˈida asa ubaappe Iyyooba keehi dumma oottidabay aybee? (b) Iyyoobi Xoossaassi oottanau koyidoogaa xeelliyaagan Seexaanay ayba oyshaa denttidee?

⁷Iyyoobi 3,600⁠u laytta heera gidiyaagaappe kase deˈiis. Iyyoobi loˈˈo asa; Yihooway a xeelliyaagan: “Sa7aa bollan a milatiya boree bainnanne suure asi mulekka baawa. I GODAASSI yayyiya, iitabaappekka haakkida asa” yaagiis. (Iyyooba 1:8) Iyyoobi Xoossaa ufayssiis.

⁸Iyyoobi Xoossaassi oottanau ayssi koyidaakko Seexaanay oyshaa denttiis. Dabloosi Yihoowassi: “Anne a so asaanne ayyo de7⁠iyaabaa ubbaa neeni dirada naagabeikkii? I oottiyo ooso ubbaa neeni anjjido gishshau, a mehiyaa wudee biittaa ubbaa bollan dariis. SHin neeni ne kushiyaa yeddada, ayyo de7⁠iya aquwaa ubbaa shociyaakko, i nena tumu ne sinttan qanggana” yaagiis.—Iyyooba 1:10, 11.

9. Seexaanay denttido oyshaa xeelliyaagan Yihooway ay oottidee? Aybissi?

⁹Iyyoobi Xoossaassi oottiyoy woytuwaa demmanaassa giidi, Seexaanay palamettiis. Iyyoobi paacettiyaaba gidikko, Xoossaappe haakkana yaagidikka Dabloosi mootiis. Seexaanay denttido oyshata xeelliyaagan Yihooway ay oottidee? Denddida oyshay Iyyooba wozanaa koshshaa xeelliyaagaa gidiyo gishshau, Seexaanay Iyyooba paacciyoogaa Yihooway coˈˈu giidi xeelliis. Iyyoobi Xoossaa siiqiyoogee woykko siiqennaagee hegan qonccidi erettana.

IYYOOBI PAACETTIIS

10. Iyyooba gakkida pacee aybee? I ay zaaridee?

¹⁰Sohuwaarakka Seexaanay Iyyooba dumma dumma ogetun paacciyoogaa doommiis. Koyro, Iyyooba meheti wuuqettidosona; a ashkkaratakka asay woriis. Hegee ikkonomiyan a bolli daro qohuwaa kaalettiis. Iyyooba naati tammaykka gotiyan hayqqin, hara keehi azzanttiyaabay merettiis. Keehippe iita gidida ha hanotay gakkidaba gidikkokka, “Iyyoobi nagaraa oottibeenna; Xoossaa amassalibeenna.”—Iyyooba 1:22.

11. (a) Seexaanay Iyyooba xeelliyaagan woygiya naaˈˈantto mootuwaa denttidee? Yihooway shin waatidee? (b) Iyyoobi bana gakkida keehi sakkiya harggiyaa xeelliyaagan ay oottidee?

¹¹Seexaanay hidootaa qanxxibeenna. Iyyoobi ba aquwaa, ba ashkkaratanne ba naata xayidi genccidaba gidikkonne, i harggiyaaba gidikko Xoossaappe haakkana yaagidi Seexaanay qoppidaba milatees. Seexaanay Iyyooba iita harggiyan shociyo wode Yihooway coˈˈu giidi xeelliis. SHin hegeekka gidin, Iyyoobi Xoossaa bolli deˈiya ammanuwaa agganaadan oottibeenna. Ubba i: ‘Taani hayqqana gakkanaassikka suure gidiyoogaa aggikke!’ yaagidi minttidi yootiis.—Iyyooba 27:5

12. Xoossay Ubbabaa haariyo maataa bolli Dabloosi denttido oyshaa Iyyoobi waati zaaridee?

¹²Iyyoobi bana gakkida metuwau gaasoy Seexaanaa gidiyoogaa eribeenna. Yihooway ubbabaa haariyo maataa bolli Dabloosi denttido oyshaa Iyyoobi eribeenna gishshau, bana gakkida meto ubbau gaasoy Xoossaa giidi qoppiis. (Iyyooba 6:4; 16:11-14) Gidikkokka, Iyyoobi Yihoowayyo ba suuretettaa naagidi deˈiis. Iyyoobi Xoossaayyo oottiyoy bana siiqiyo gishshataassa giidi Seexaanay yootidobay worddo gidiyoogaa Iyyoobi ammanetti deˈidi tumayiis.

13. Iyyoobi Xoossaassi ammanettido gishshau, hanidabay aybee?

¹³Iyyoobi ammanetti deˈido hanotay, Seexaanay sunttaa mooranau denttido oyshatussi Yihooway tishsha zaaruwaa zaaranaadan oottiis. Iyyoobi tumukka Yihoowa dabbo; i ammanettidi deˈido gishshau, Yihoowaykka a anjjiis.—Iyooba 42:12-17.

HE OYSHAY NENAKKA GUJJEES

14, 15. Seexaanay Iyyoobaara gayttidaagan denttido mootoy ubba asaa xeelliyaagaa gaana danddayiyoy aybissee?

¹⁴Xoossaassi ammanettidi deˈiyoogaa xeelliyaagan Seexaanay denttido oyshay Iyyooba xallaa xeelliyaagaa gidenna. He oyshay nenakka gujjees. Leemiso 27:11n: “Ta na7au, neeni aadhdhida eranchcha gida. Yaatiyaakko taani ufaittananne tana boriyaageetu oishaakka zaarana” yaagiya Yihoowa Qaalay hegaa qoncciyan bessees. Ha qaalay xaafettidoy Iyyoobi hayqqoosappe xeetan qoodettiya layttaappe guyyiyaana; hegee Seexaanay ha wodiyankka Xoossaa cayiiddinne Assi oottiyaageetakka mootiiddi deˈiyoogaa bessees. Nuuni Yihoowa ufayssiya ogiyan deˈiyo wode, Seexaanay denttido worddo mootuwaassi i zaaruwaa immanaadan tumuppe maaddoos; hegaadan oottiyoogan Xoossaa wozanaa ufayssoos. Hegee neessi aybi siyettanaadan oottii? Neeni deˈuwan amarida laamiyaa oottanaadan koshshiyaaba gidikkonne, Seexaanay denttido worddo mootuwau zaaruwaa immiyaageetu giddon qoodettiyoogee keehi ufayssiyaaba gidennee?

¹⁵Seexaanay: “Asi ba shemppuwaa gishshau, bau de7⁠iyaabaa ubbaa immana” yaagidoogaa akeeka. (Iyyooba 2:4) Seexaanay “asi” yaagidi, i denttido mootoy Iyyooba xallaassa gidennan ubba asaassa gidiyoogaa qonccissiis. Hagee keehi qofissiya yoho. Seexaanay neeni Xoossaassi ammanettada deˈiyo hanotan oyshaa denttiis. Neeni Xoossaassi azazettennan ixxiyoogaa beˈanaunne metoy denddiyo wodiyan xillotetta deˈuwaa aggaaganaadan Dabloosi koyees. Hegaadan oottanau Seexaanay ay ogetun goˈettana danddayii?

16. (a) Xoossaappe asaa haassanau Seexaanay goˈettiyoy ayba ogetuunee? (b) Seexaanay he ogetun nena qohanau waati goˈettana danddayii?

¹⁶SHemppuwaa 10n beˈidoogaadan, asaa Xoossaappe haassanau Seexaanay daro ogetun goˈettees. Issi baggaara i “mittiyo uraa koyidi, gudiya gaammuwaadan gudiiddi” asaa qohees. (1 PHeexiroosa 5:8) Hegaa gishshau, geella laggeti, dabboti woykko hara asati neeni Geeshsha Maxaafaa xannaˈanaunne tamaaridobaa oosuwan peeshshanau oottiyo baaxiyaa eqettanaadan oottiyoogan Seexaanay qohana danddayees. * (Yohaannisa 15:19, 20) Hara baggaara qassi Seexaanay, “ba huuphen poo7⁠o kiitanchcha milatanau ba meraa laammees.” (2 Qoronttoosa 11:14) Dabloosi nena cimmanaunne Xoossaa ufayssiya ogiyan deˈiyoogaappe zaaranau balettiya cimo ogetun goˈettanau danddayees. I hidootaa qanxxissiyoogankka goˈettana danddayees; Xoossaa ufayssanau danddayettennabadan neessi siyettanaadan oottanau danddayees. (Leemiso 24:10) Seexaanay “gudiya gaammuwaadan” hanin woykko “poo7⁠o kiitanchcha” milatinkka a mootoy issi mala: I, metoy woykko paacee nena gakkiyo wode Xoossaassi oottiyoogaa aggaagaassa yaagees. Iyyoobi oottidoogaadan, Xoossaassi ammanetta deˈada Seexaanay denttido mootuwaa waata zaarana danddayay?

YIHOOWA HIGGIYAA AZAZETTIYOOGAA

17. Yihoowa higgiyaa azazettanau denttettiya waannabay aybee?

¹⁷Xoossaa ufayssiya ogiyan deˈiyoogan, Seexaanay denttido mootuwaa zaaranau danddayaasa. Hegee ay gujjii? Geeshsha Maxaafay: “Neeni GODAA ne Xoossaa ne kumetta wozanaappe, ne kumetta shemppuwaappenne ne kumetta wolqqaappe siiqa” yaagidi zaarees. (Zaarettido Wogaa 6:5) Xoossaassi deˈiya siiqoy neegee dicciyo wode, neeni oottanaadan i koyiyoobaa oottanau keehippe amottaasa. Yohaannisi: “Nuuni Xoossaa siiqiyoogee a azazuwaa naagiyoogaa” yaagidi xaafiis. Yihoowa kumetta wozanaappe siiqiyaaba gidikko, ‘a azazoy deexo gidennaagaa’ akeekaasa.—1 Yohaannisa 5:3.

18, 19. (a) Yihoowa higgetuppe amaridaageeti awugeetee? (Sinttaa 122n deˈiya saaxiniyaa xeella.) (b) Yihooway nu danddayaappe bollaa nuuppe naagennaagaa aybin eriyoo?

¹⁸Yihoowa higgeti awugeetee? Hegeetuppe amaridaageeti nuuni haakkana bessiyo eeshshata yootiyaageeta. Leemisuwau, sintta 122n deˈiya “Yihooway Ixxiyoobatuppe Haakka” yaagiya saaxiniyaa xeella. Hegan Geeshsha Maxaafay iita giidi qoncciyan odiyo eeshshati xaafettidaageeta beˈaasa. Koyro xeelliyo wode, hegan xaafettidaageetuppe issi issi oosoti hegaa keena iita milatennaageeta gidana danddayoosona. SHin xiqisetun wotta denttada qoppoogaappe guyyiyan, Xoossaa higgiyaa aadhdhida eraa akeekana danddayaasa. Eeshshan laamiyaa oottiyoogee, neeni hanno gakkanaashin oottido ubbabaappe deexxiyaagaa gidana danddayees. Gidikkonne, Xoossaa ufayssiya ogiyan deˈiyoogee, gita woppaanne ufayssaa ehees. (Isiyaasa 48:17, 18) Hegee neeni gakkana danddayiyooba. Hegaa nuuni aybin eriyoo?

¹⁹Yihooway nu danddayaappe dariyaabaa nuuni oottanaadan mule naagenna. (Zaarettido Wogaa 30:11-14) I nu abbiyaanne nu danddayaa nuuni eriyoogaappekka aaruwan erees. (Mazamure 103:14) Hegaa bollikka, nuuni a azazettanaadan Yihooway minttettana danddayees. Kiitettida PHauloosi: “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, he paaciyaa i inttena danddayissana. Qassi he paaciyaappe intte kessi ekkiyo ogiyaakka immana” yaagidi xaafiis. (1 Qoronttoosa 10:13) Neeni genccanaadan, Yihooway ‘ubbaappe aadhdhiya wolqqaa’ immanakka danddayees. (2 Qoronttoosa 4:7) Daro metuwaa gencci aattoogaappe guyyiyan PHauloosi: “Wolqqaa taassi immiya an ubbabaa oottanau danddayays” yaagidi xaafiis.—Piliphphisiyuusa 4:13, NW.

XOOSSAA UFAYSSIYA EESHSHATA DICHCHIYOOGAA

20. Xoossaa ufayssiya ay eeshshaa dichchana bessii? Hegee keehi koshshiyaagaa gididoy aybissee?

²⁰Yihoowa ufayssiyoogee, i ixxiyo eeshshatuppe haakkiyoogaappekka darobaa gujjiyoogee erettidaagaa. I siiqiyoobatakka neeni siiqana bessees. (Roomee 12:9) Neegaara issi mala xeelay, koshshaynne eeshshay deˈiyoogeeta lagge oottada shiiqanau koyikkii? Yihoowaykka hegaadan oottana koyees. Hegaa gishshau, Yihooway siiqiyoobata siiqiyoogaa tamaara. Mazamure 15:1-5y, Xoossay bau mata dabbo ootti xeelliyoogeeti ay mala asatakko odiiddi, he eeshshatuppe amaridaageeta qonccissees. Yihoowa dabboti, Geeshsha Maxaafay ‘geeshsha ayyaanaa aife’ yaagiyoogeeta ayfoosona. Geeshsha ayyaanaa ayfee “siiquwaa, ufaissaa, sarotettaa, danddayaa, kehatettaa, lo77⁠otettaa, ammanuwaa, ashkketettaa, ba huuphiyaa naagiyoogaa” milatiya eeshshata gujjees.—Galaatiyaa 5:22, 23.

21. Xoossaa ufayssiya eeshshata dichchanau nena maaddana danddayiyay aybee?

²¹Geeshsha Maxaafaa ubbatoo nabbabiyoogeenne xannaˈiyoogee Xoossay dosiyo eeshshata dichchanau maaddees. Neeni oottanaadan Xoossay koyiyoobata tamaariyoogee ne qofaa Xoossaa qofaara maayettiyaagaa oottanau maaddees. (Isiyaasa 30:20, 21) Xoossaassi deˈiya ne siiquwaa ne minttido payduwan, Xoossaa ufayssiya ogiyan deˈanau neeni keehippe amottana.

22. Neeni Xoossaa ufayssiya ogiyan deˈiyaaba gidikko, ay polana danddayay?

²²Yihoowa ufayssiya ogiyan deˈanau baaxiyaa koshshees. Geeshsha Maxaafay deˈuwan laamiyaa oottiyoogaa, galˈˈa asatettaa qaaridi ooratta asatettaa maayiyoogan leemisees. (Qolasiyaasa 3:9, 10) SHin Yihoowa higgiyaa xeelliyaagan yettanchchay: “Ne higgiyaa naagiyoogan taani daro go7⁠ettais” yaagidi xaafiis. (Mazamure 19:11) Neenikka Xoossaa ufayssiya ogiyan deˈiyoogan, keehippe goˈettana danddayaasa. Hegaadan oottiyoogan, Seexaanay denttido mootuwau zaaruwaa immanaunne Yihoowa wozanaa ufayssanau danddayaasa.

[Tohossa qofaa]

^ MENT. 16 Hegaa giyoogee nena eqettiyaageeta ubbaa, eti oottiyooba ubban Seexaanay kaalettees giyoogaa gidenna. SHin Seexaanay ha alamiyaa siraataa xoossaa gidiyo gishshau, mule alamee an haarettees. (2 Qoronttoosa 4:4; 1 Yohaannisa 5:19) Hegaa gishshau, Xoossaa ufayssiya ogiyan deˈiyoogee daro asay dosennaba gidiyo gishshau, amaridaageeti nena eqettanau danddayoosona.

GEESHSHA MAXAAFAY TAMAARISSIYOOBAA

▪ Xoossaayyo azazettiyoogan a dabbo gidana danddayaasa.—Yaaqooba 2:23.

▪ Ammanettidi deˈiyoogaara gayttidaagan, Seexaanay asaa naata ubbaa xeelliya oyshaa denttiis.—Iyyooba 1:8, 10, 11; 2:4; Leemisuwaa 27:11.

▪ Nuuni Xoossaa ufayssenna oosotuppe haakkana bessees.—1 Qoronttoosa 6:9, 10.

▪ Nuuni Yihooway ixxiyoobata ixxiyoogaaninne i dosiyoobata dosiyoogan a ufayssana danddayoos.—Roome 12:9.

[Oyshaa]

[Sinttaa 122n diya misiliyaa]

YIHOOWAY IXXIYOOBATUPPE HAAKKA

Asa woriyoogaappe. —Kessaabaa 20:13; 21:22, 23.

SHaaramuxiyoogaappe.—Wogaabaa 20:10, 13, 15, 16; Roome 1:24, 26, 27, 32; 1 Qoronttoosa 6:9, 10.

Iita ayyaana oosuwaappe.—Zaarettido Wogaa 18:9-13; 1 Qoronttoosa 10:21, 22; Galaatiyaa 5:20.

Eeqau goynniyoogaappe.—1 Qoronttoosa 10:14.