SHEMPPUWAA 8

Loˈˈo Laggeta Waata Demmana Danddayiyaanaa?

“Taani hanqqettiyo wode tawu siyettiyaabaa awu yootiyo, azzaniyo wode tana minttettiyaanne ufayttiyo wode tanaara ufayttiya uri deˈanaadan koyays. Taayyo laggeti deˈana koshshees.”—Biritaaniyo.

Naatettan nenaara kaaˈiya hara naati neeyyo koshshidosona. Neeni nerkka kaaˈennaadan eti maaddidosona. SHin haˈˈi nenaara wodiyaa aattiyoogaa xalla gidennan, neeni nashshiyoobaa yootiyo uri koshshees.

Hegaa bollikka, Geeshsha Maxaafay hagaadan gees: “Laggee mule wodekka siiqees; ishaikka metuwaa wode maaddanaassi yelettees.” (Leemiso 17:17) Ha xiqisee, naatettan nenaara kaaˈiya naatuura laggetiyoogaappe keehi aadhdhiya laggetettaa qonccissees!

Tumaa: Neeni dicciyo wode, kaallidi deˈiyaageetu mala laggeta koyaasa:

1. Loˈˈo eeshshay deˈiyoogeeta

2. Loˈˈo maaraa kaallidi deˈiyaageeta

3. Loˈˈo asa gidanaadan nena maaddiyaageeta

Oyshaa: Hegaa mala laggeta waata demmana danddayay? Ane qommoora odettidabata huuphiyan huuphiyan beˈoos.

Koyroogee: Loˈˈo Eeshshaa

Neeni erana bessiyaabaa. Nenaara laggetiya ubbay neeyyo tumu lagge gidanawu danddayenna. Geeshsha Maxaafay haray atto ‘issoy issuwaa qohiya laggeti’ deˈiyoogaakka yootees. (Leemiso 18:24, NW) Hagee hanennaba milatana danddayees. Hagaa qoppa: Issi uri bawu goˈˈettanawu giidi neeyyo lagge milati erii? Woy qassi, nebaa xeelliyaagan xuurabaa woy worddobaa haratuyyo haasayida laggee neeyyo deˈii? Hegaa malabay gakki erikko, ne laggiyaa ammanennan aggana danddayaasa. * Keehi koshshiyaabay daro laggeti deˈiyoogaa gidennan, loˈˈo laggeti deˈiyoogaa gidiyoogaa ubbatoo hassaya!

Neeni oottana danddayiyoobaa. Loˈˈo leemiso gidana danddayiyaageetuura laggeta.

“Ta laggiyo Fiyono asa ubbay nashshees. Asay tanakka iigaadan nashshanaadan koyays. Taani O bonchchays; qassi I mala gidanawu koyays.”—Eveto, 17.

Kaallidi deˈiyaabata oottanawu mala.

1. Galaatiyaa 5:22, 23 nabbaba.

2. Nena hagaadan oychcha: ‘Ta laggetussi ‘geeshsha ayyaanaa ayfiyaa’ eeshshati deˈiyoonaa?’

3. Ne mata laggetu sunttaa xaafa. Yaatada eta shaakki erissiya eeshshaa xaafa.

Sunttaa

․․․․․

Eeshshaa

․․․․․

Maaddiya Zoriya: Etawu iita eeshsha xallay deˈiyoogaa akeekikko, neeni hara loˈˈo laggeta koyana bessees!

Naaˈˈanttoogee: Loˈˈo maaraa

Neeni erana bessiyaabaa. Neeyyo laggeti deˈanaadan keehi koyiyaaba gidikko, iita eeshshay deˈiyoogeetuura laggetana danddayaasa. Geeshsha Maxaafay hagaadan gees: “Eeyya asatuura hemettiya asi metuwan gelees.” (Leemiso 13:20) “Eeyya asatuura” giya qaalay timirttiyan gooba gidenna ura woy eri baynna ura qonccissiyaaba gidenna. SHin, he qaalay loˈˈo zoriyaa siyennan ixxidi iitabaa oottanawu dooriyaageeta qonccissees. Hegaa mala laggeti neeyyo deˈana koshshenna!

Neeni oottana danddayiyoobaa. Ay mala asakko qoppennan coo laggetiyoogaappe, doorada laggeta. (Mazamure 26:4) “Xilluwaappenne nagaranchchaappe gidduwan de7iya zawaanne Xoossaassi azazettiyaageetuppenne azazettennaageetuppe gidduwan de7iya zawaa” shaakkada eranawu neeni akeekanchcha gidana koshshees.—Milkkiyaasa 3:18.

“Xoossaa siiqiyaanne A ufayssana koyiya laggeta dooranaadan tana yelidaageeti maaddido gishshawu eta keehi galatays.”—Kiristtofeera, 13.

Kaalliya oyshata zaara:

Iitabaa oottanaadan ta laggeti tana denttettana gaada hirggiyaanaa?

□ Ee

□ CHii

Tana yelidaageeti ta laggetuura erettiyaakko, ta laggeta waayi dosana gaada yayyiyaanaa?

□ Ee

□ CHii

Maaddiya Zoriya: Qommoora deˈiya oyshata ee gaada zaarikko, Xoossaa ufayssanawu baaxetiya hara laggeta koya.

Heezzanttoogee: Loˈˈo asa gidanaadan maaddiyoogaa

Neeni erana bessiyaabaa. Geeshsha Maxaafay hagaadan gees: “Iita laggetettai lo77o hanotettaa moorees.” (1 Qoronttoosa 15:33) Loreno giyo yelagiya hagaadan gaasu: “Tanaara tamaariyaageeti taani eti giidoogaadan ootto peeshan, tana banttakko shiishshoosona. Taayyo laggee baynna gishshawu etakko shiiqana gaada, etadan hananawu kuuyaas.” Lorena akeekidoogaadan, neeni ne laggeti koyiyoobaa oottikko, etawu haarettaasa. Neessi hegeetuppe loˈˈo laggeti deˈana bessees!

Neeni oottana danddayiyoobaa. Eti oottiyoogaa malabaa oottanaadan nena giddiyaageetuura laggetoppa. Neeni hegaadan oottikko neeyyo kaseegaappe guutta laggeti deˈana danddayikkonne, neeni loˈˈo asa gidanaadan maaddiya laggeta doorana danddayaasa.—Roome 12:2.

“Ta mata laggee Kilinti yuushshi qoppiyaanne haratussi siyettiyaabaa akeekiya asa; I tana keehi minttettiis.”—Jesena, 21.

Nena kaallidi deˈiyaagaadan oychcha:

Ta laggeta ufayssanawu gaada etaagaadan loˈˈennabaa maayiyaanaa, haasayiyaanaa woy oottiyaanaa?

□ Ee

□ CHii

Taani baana bessenna iita soho gidiyoogaa erikkonne, ta laggeta ufayssanawu gaada he sohuwaa biyanaa?

□ Ee

□ CHii

Maaddiya Zoriya: Ha oyshatuyyo neeni ee gaada zaarikko, nena yelidaageeta woy hara kaymida ura zoriya oychcha. Qassi neeni Yihoowa Markka gidikko, loˈˈo laggeta dooranaadan maaddana mala gubaaˈe cimaa oychchana danddayaasa.

HA HUUPHE YOHUWAARA GAYTTIDABAA GUJJADA NABBABANAWU PAYDO 2, SHEMPPO 9 XEELLA

KAALLIYA SHEMPPUWAN

Neeni iitabaa oottanaadan ne lagge giyo uri woy ne wozanay nena denttettii? Hegaa waata xoonana danddayiyaakko akeeka!

[Tohossa qofata]

WAANA XIQISETA

“Ishappe aadhdhidi ammanttiya laggee de7ees.”—Leemiso 18:24.

MAADDIYA HARA QOFAA

Neeni loˈˈo maaraa kaallikko, yaatanawu baaxetiya haratikka neekko shiiqana. Eti neeyyo ooppenne loˈˈo lagge gidana!

HAGAA ERAY?

Xoossay asa asappe shaakkenna, shin I ‘ba dunkkaaniyaa ooni gelanawu bessiyaakko’ loytti doorees.​—Mazamure 15:1-5.

OOTTANABAA!

Taani loˈˈo laggeta demmanawu oottanabay ․․․․․

Taani etaara loytta erettanawu koyiyo taappe gasttiyaageetuppe amaridaageeti ․․․․․

Ha qofaabaa tana yelidaagaa(geeta) taani oychchanabay ․․․․․

NE QOFAY AYBEE?

●Ne laggiyaa eeshshatuppe neeni keehi nashshiyoogeeti awugeetee, qassi aybissi?

●Neeni loˈˈo lagge gidanawu aybin aybin laamettana koshshii?

[Qonccissuwaa]

“Taani amarida naatuura laggetennaadan tana yelidaageeti zoridosona. SHin he naati ta lagge gidanaadan koyido gishshawu tana yelidaageeti giidobaa siyabeykke. SHin, ta aawaynne aayyiyaa zoridobay loˈˈo gidiyo gishshawu hegaa yuushsha qoppada, loˈˈo laggeta demmana danddayiyoogaa akeekaas.’’​—Kool

[saaxiniyaa]

Hagaadan oottanawu mala

Laggetettaabaa nena yelidaageetuura haasaya. Eti ne keesa gidido wode etayyo ay mala laggeti deˈiyaakko oychcha. Eti amaridaageetuura laggetidoogan zilˈˈettiyoonaa? Zilˈˈettikko, aybissi? Etaagaadan balennaadan waatana danddayiyaakko eta oychcha.

Ne laggeta nena yelidaageetuura eretissa. Neeni yaatanawu kayennaba gidikko, ‘Ayssi koyikkinaa?’ gaada nena oychcha. Nena yelidaageeti ne laggetuban dosennabi deˈiyoogaa eray? Yaatikko, ne laggeta akeekan dooriyoogee koshshana danddayees.

Loytta ezgga. Ne laggetu sarotettaabaanne eti qoppiyoobaa koyiyoogaa bessa.​—Piliphphisiyuusa 2:4.

Atto ga. Bali deˈana bessenna gaada qoppoppa. “Nuuni ubbaikka daroban baleettees.”​—Yaaqooba 3:2.

Ne laggee babawu wode xayanaadan oottoppa. Ubba wode ne laggiyaappe duuxxennan deˈana bessenna. Tumu laggeti ne eta koyiyo wode ne matan deˈana.​—Eranchchaa 4:9, 10.

[misiliyaa]

Neeni ne laggeti koyiyoobaa oottikko, etawu haarettaasa.