SHEMPPUWAA 35

Xoossaara Waana Dabbotana Danddayiyaanaa?

Jeremi bana gakkida daafabaa gaasuwan Xoossaa dabbo gidiyoogaa goˈˈaa akeekiis. I hagaadan giis: “Tawu layttay 12 gidiyo wode, ta aaway nu soo asaa aggidi biis. Yihooway ta aawaa soo zaaranaadan issi qammi hiixan zinˈˈidosan woossaas.”

Jeremi azzaniiddi Geeshsha Maxaafaa nabbabiyoogaa doommiis. I Mazamure 10:14 nabbabidi, keehi ufayttiis. He xiqisee Yihoowabaa hagaadan gees: “Aawai bainnaageeta neeni maaddiyo gishshau, hiyyeesai woikko qohettidaagee neeni maaddanaadan bana neeyyo sheedhdho.” Jeremi hagaadan giis: Yihooway tana haasayissiyaabadaaninne I tana maaddiyaagaa gidiyoogaa taassi yootiyaabadan qoppaas; I ta Aawaa. Appe loˈˈo aawa woni awan demmiyaanaa?

NE HANOTAY Jeremaagaa mala gidin aggin, Yihooway neeni A dabbo gidanaadan koyiyoogaa Geeshsha Maxaafay yootees. Geeshsha Maxaafay, ‘Xoossaakko shiiqa; ikka neekko shiiqana’ yaagees. (Yaaqooba 4:8) Hegee woygiyoogaakko qoppa: Neeni Xoossaa Yihoowa beˈana danddayakkanne I aybiinikka nenaara lagge gidenna; gidoppe attin, neeni A dabbo gidanaadan I nena shoobbees!

SHin Xoossaara dabbotanawu neeni baaxetana koshshees. Leemisuwawu, neeni ciiyyiyaabaa son tokkikko, I coo bawu diccennaagaa eraasa. Hegee dalqqidalqqidi diccanaadan neeni ubbatoo haattaa ushshananne eesuwan diccana danddayiyo sohuwan tokkana koshshees. Xoossaara dabbotiyoogeekka hegaa mala. He dabbotay minnanaadan waatana danddayay?

Xannaˈiyoogaa Goˈˈaa

Dabbotanawu issoy issuwaara haasayana koshshees. Xoossaara dabbotiyoogeekka hegaadaana. Geeshsha Maxaafaa nabbabiyoogeenne xannaˈiyoogee nuuni Xoossay yootiyoobaa siyiyo oge.—Mazamure 1:2, 3.

Xannaˈiyoogaa neeni waaya dosana. Daro yelagati nabbabiyoogaa aggidi, Televizhiiniyaa beˈiyaakko, kaassaa kaaˈiyaakko woy laggetuura wodiyaa aattiyaakko dosoosona. SHin neeni Xoossaara dabbotanawu koyikko, I yootidoogaadan oottana bessees. Neeni A Qaalaa xannaˈiyoogan I yootiyoobaa siyana koshshees.

SHin hirggoppa. Geeshsha Maxaafaa xannaˈiyoogee salettiyaaba gidenna. Neeni xinaatiya dosenna ura gidikkokka, Geeshsha Maxaafaa xannaˈiyoogaa dosana danddayaasa. Koyro neeni issibaa oottana koshshees: Geeshsha Maxaafaa xannaˈiyo wodiya bazza. Layso giyo naˈiya, “Taani prograamiyaa kessaas. Ubba galla maallado Geeshsha Maxaafaappe issi shemppuwa nabbabiyoogan gallassaa doommays” yaagaasu. Maariyo giyo 15 laytta naˈee meezee hegaappe dummatees. A, “Taani ubba galla qammi xiskkanaappe kase Geeshsha Maxaafaappe amaridabaa nabbabays” yaagaasu.

Neeni prograamiyaa kessada nabbabiyoogaa doommanawu,  sinttaa 292n deˈiya saaxiniyaa xeella. Yaatada 30 daqiiqa gidiya wodiyawu Xoossaa Qaalaa neeni awude xannaˈana danddayiyaakko hagaappe garssan xaafa.

․․․․․

Wodiya bazziyoogee doometta xalla. Neeni xannaˈiyoogaa doommada Geeshsha Maxaafaa nabbabiyoogee issi issitoo metana danddayiyoogaa akeekana. Ba wozanaabaa qosennan yootida Jeziriila giyo 11 laytta naˈaa qofaa neeni maayennan aggakka. I, “Geeshsha Maxaafan issi issi qofay keehi deexxees, qassi allaxissiyaaba gidenna” yaagiis. Neeyyo hegaadan siyettikko hidootaa qanxxoppa. Geeshsha Maxaafaa xannaˈiyo wode awudekka ne dabboy, Xoossaa Yihooway yootiyoobaa neeni takki gaada siyiyabadan qoppa. Neeni Geeshsha Maxaafaa xannaˈanawu baaxetiyoogaa keenan ufayttananne goˈettana!

Woosay Keehi Koshshiyaba

Woosay nuuni Xoossaa haasayissiyo oge. Woosay ay keena maalaaliya imotakko qoppa! Neeni galla gidin qammi gidin, ay saatiyankka Xoossaa Yihoowa issibaa oychchana danddayaasa. I awudekka siyees. Hegaa xalla gidennan, I ne yootiyoobaa siyanawu koyees. Geeshsha Maxaafay nena hagaadan zoriyoy hegaassa: ‘Xoossaa neeni woossiyo woosa ubban A keehi galataydda, nena koshshiyaabaa ubbawu woossa.’—Piliphphisiyuusa 4:6.

He xiqisee yootiyoogaadan, neeni Yihoowawu darobaa yootana danddayaasa. Ne yootiyoobay nena metiyabaanne hirggissiyabaa gidana danddayees. Neeni A galatanawu koyiyoobakka gidana danddayees. Ne laggeti neessi oottido loˈˈobawu eta woni galatikkii? Ay laggeenne oottana danddayiyoobaappe aarobaa neessi oottida Yihoowakka hegaadan galatana danddayaasa.—Mazamure 106:1.

Neeni Yihoowa galatiyo amaridabata hagaappe garssan xaafa.

․․․․․

Neeni issi issitoo keehi yayyiyoogeenne hirggiyoogee tuma. Mazamure 55:22y hagaadan gees: “Ne toohuwaa Xoossan wotta; i nena zemppissana. Xoossai audenne xilloti shabbarettanaadan oottenna.”

Neeni woosan Xoossawu yootana koyiyo, nena qofissiyabata kaallidi deˈiya yafaratun xaafa.

․․․․․․

Ne Deˈuwan Gakkidabaa

Xoossaara nena dabboyiya, ne dogana koshshenna harabay deˈees. Mazamuraawee Daawiti, “[Yihooway] keha gidiyoogaa xeelli beˈite” yaagiis. (Mazamure 34:8) Daawiti 34tta Mazamuriya xaafido wode, yashshiyabay A gakkiis. A woranawu koyiya Kawuwaa Saaˈoolappe he wode I baqatees; hegee keehi yashshiyaba. SHin I attanawu giidi ba morkketu Pilisxxeematukko baqatidi biis. Daawiti hayqqiyoogee attennaba milatidoogee gooyiya ura milatidi kessi ekkiis.—1 Sameela 21:10-15.

Daawiti hayquwaappe qiisan attidoy ba eraana gibeenna; shin I Yihooway bana ashshidoogaa yootiis. Qommoora denttido Mazamuriyan guuttaa kasetidi I hagaadan giis: “Taani GODAA koyaas; koyin i taayyo zaariis; taani yayyiyoobaa ubbaappe tana i ashshiis.” (Mazamure 34:4) Hegaa gishshawu, Daawiti ba deˈuwan gakkidabaappe harati Yihooway “keha gidiyoogaa xeelli [beˈanaadan]” minttettana danddayiis. *

Yihooway ne deˈuwan nena maaddiis gaada ne qoppiyoobaa hassayay? Yaatikko, hagaappe garssan hegaa xaafa. Xeera besuwaa: Gakkidabay keehi gitaba gidana koshshenna. Hegeetuppe amaridaageeti asay darin nashshenna guuttabata gidikkonne, Xoossaappe ubba galla demmiyo anjjota qoppa.

․․․․․

Geeshsha Maxaafaa nena tamaarissidaageeti ne aawaanne aayyiyo gidennan aggokkona. Yaanikko, hegee anjjo. Gidikkokka, neeni ne huuphen Xoossaara dabbotana koshshees. Ne dabbotaychchabeennaba gidikko, ha shemppuwan deˈiya qofaa goˈettada dabbotaa doommana danddayaasa. Neeni yaatanawu baaxetikko, Yihooway nena anjjana. Geeshsha Maxaafay, “Woossite; intte ekkana. Koyite; intte demmana” yaagees.—Maatiyoosa 7:7.

HA QOFAABAA PAYDO 1N, SHEMPPO 38NINNE 39N GUJJADA NABBABA

KAALLIYA SHEMPPUWAN Xoossaabaa haratussi yootanawu metootay? Neeni ammaniyoobawu waanada exatana danddayiyaakko tamaara.

[Tohossa qofata]

WAANNA XIQISIYAA

“Ayyaanaaban banttassi koshshiyaabaa akeekiyaageeti ufayttiyaageeta.”—Maatiyoosa 5:3, NW.

ZORIYAA

Geeshsha Maxaafaappe oyddu sintta gidiyaagaa ubba galla nabbaba; yaatikko neeni issi laytta gidiya wodiyan muleera nabbabada wurssana.

HAGAA ERAY . . .?

Neeni ha maxaafaa nabbabiyoogeenne an deˈiya Geeshsha Maxaafaa zoriyadan oottanawu baaxetiyoogee Yihooway nena dosiyoogaa bessiyaaba.—Yohaannisa 6:44.

OOTTANABAA!

Taani Geeshsha Maxaafaa xannaˈada loytta goˈettanawu oottanabay ․․․․․

Kaseppe aaruwan ubbatoo woossanawu taani oottanabay ․․․․․

Ha qofaabaa tana yelidaagaa(geeta) taani oychchanabay ․․․․․

NE QOFAY AYBEE?

● Geeshsha Maxaafaa xannaˈiyoogaa keehi dosanawu waatana danddayay?

● Yihooway nagaranchcha asaa woosaa siyanawu ayssi koyii?

● Neeni loˈˈo woosaa woossanawu waatana danddayay?

[Qonccissuwaa]

Taani naatettan ubbatoo woossiyoobay issi mala. Haˈˈi ubba galla gakkiya loˈˈobaakka iitabaakka xeelliyaagan woossays. Naaˈˈu gallassati issi mala gidenna gishshawu, yaatiyoogee taani issibaa zaara zaarada woossennaadan maaddees.’’—Iivo

[Saaxiniyaa/​Misiliyaa]

 Geeshsha Maxaafaa pilgga

1. Geeshsha Maxaafaappe neeni nabbabanawu koyiyoobaa doora. Qofaa akeekanawu Xoossay aadhdhida eratettaa immanaadan woossa.

2. He qofaa akeekan nabbaba. Takki gaada nabbaba. Nabbabaydda he hanotaabaa qoppa. Akeekanawu maaddiya bollaa qommotuppe danddayettida keenan darota goˈetta: Haniyaabaa beˈanawu, asati haasayiyoobaa siyanawu, carkkuwan deˈiyaabaa singganawu, qumaa ma beˈanawu, hegaanne hegaa malabaa oottanawu mala. Ne nabbabiyoobay neessi qonccidi beettanaadan baaxeta!

3. Neeni nabbabidobaa loytta qoppa. Kaallidi deˈiyaageetu mala oyshata nena oychcha:

● Yihooway Ba Qaalan hagaa xaafissidoy aybissee?

● Taani eta milatana koshshiyo asati oonee, qassi oona oona milatennaadan naagettana koshshii?

● Taani nabbabidobaappe maaddiyaabaa ay tamaarana danddayiyanaa?

● Yihoowabaa, qassi I oottiyo ogiyabaa ha qofaappe ay tamaariyanaa?

4. Qanttan Yihoowa woossa. Neeni Geeshsha Maxaafaa xannaˈada akeekidobaanne he akeekidoogaadan deˈana mala ne ay oottanawu halchchidaakko ayyo yoota. Yihooway neessi immido imotaa, A Qaalaa, Geeshsha Maxaafaa gishshawu, ubbatoo A galata!

[Misiliyaa]

“Ne qaalai ta gediyaassi xomppe, ta ogiyaassikka poo7o.”—Mazamure 119:105.

[Saaxiniyaa/​Misiliyaa]

keehi koshshiyaabaa oottanawu kuuya

Woossanawukka wodee baawee? Geeshsha Maxaafaa xannaˈanawu wode xayadii? Darotoo, hegee kasetidi oottanabaa kuuyiyoogaara gayttidaba.

Hagaa mala beˈa: Amarida ordde shuchchata balddiyan yegga. Yaatada balddiyan shafiya siillada kuntta. Ne balddiyan haˈˈi shuchchaynne shafee kumiis.

Haˈˈi qassi shuchchaanne shafiya balddiyaappe kessada issisan wotta. Haˈˈi kayaa laammada balddiyawu guyye zaara: Koyro shafiya balddiyan yegga simmada, shuchchata balddiyan zaarada yegganawu mala. Sohoy gidibeennee? Neeni kasetada shafiya balddiyan yeggido gishshawu hegaadan haniis.

Waanna allaallee aybee? Geeshsha Maxaafay hagaadan gees: “Keehi koshshiyaabay aybakko shaakka era.” (Piliphphisiyuusa 1:10, NW) Allaxxiyoogaa mala guuttabata neeni sinttayikko, ne deˈuwan ayyaanaabaa mala gitabaa oottanawu neeni wodee baawa gaada qoppana danddayaasa. SHin neeni Geeshsha Maxaafay zoriyoogaadan oottikko, Xoossaa Kawotettaabaa oosuwawu, qassi guuttaa allaxxanawukka wode xayakka. He ubbabay neeni balddiyan koyro yeggiyoobaara gayttidaba.

[Misiliyaa]

Xoossaara dabbotaa minttanawu son tokkiyo ciiyyiyaabaa dichchiyoogaadan saaphoyi oyqqana koshshees