DACHE biittaa palasppaa Isppaynoozi: “Taani asay oottiyooban miiccennaadan, yeekkennaadaaninne eta ixxennaadan, hegaappe eta qofaa akeekanau baaxetaas” yaagidi xaafiis. Intte asttamaare gidiyoogaadan, Yihoowa Markkatu naata gujjin intte tamaarissiyo tamaaretu xeelaa, eti diccido hanotaanne eta ammanuwaa akeekanau maliyoogee daro baaxe koshshiyaaba. Issitoo issitoo hegaa mala tamaaretussi asay maayettiyoogaappe dumma eqoy amaridabatun deˈana danddayees. Gidikkonne, hegaa mala equwau gaasoy haymaanootiyaanne kandduwaabaa xeelliyaagan issi tamaaree ammaniyoobaa gidiyo wode, intte hegaa akeekan xeellana bessees. Ha brooshuree Yihoowa Markka gidida tamaaretubaa intte loyttidi akeekanaadan maaddanau, Wochiyo Keelaa Geeshsha Maxaafaanne Tirakttiyaa Maabaran (Yihoowa Markkatu attamissiya dirijjitiyaa) giigiis. Intte wodiyaa immidi hegaa akeekan nabbabanaagaa ammanettoos.

Issi uraa ammanuwaa akeekiyoogee he uraa ammanuwan geliyoogaa woy kaalliyoogaa gidenna; qassi erissiyoogee ammanuwaa laamissiyoogaa gidenna. Ha brooshuree giigidoy Yihoowa Markkati ammaniyoobaa intte woy intte tamaareti ammananaadan wolqqanttanaassa gidenna. Nu koshshay intte tamaaretuppe amaridaageetubaa woykko Yihoowa Markka gidida naatubaa intte akeekanaunne etaara issippe oottanau metootennaadan, eta yelidaageeti tamaarissiyo baaso siraatatubaanne ammanuwaabaa yootanaassa. Issi naˈi ba kahaa dichanau tamaariyo gishshau, naati tamaariyoobaynne oottiyoobay ubbatoo moggottennan aggana danddayiyoogee qoncce.

Yelida darotuugaadan, Yihoowa Markkati bantta naati timirtte keettan tamaariyoobaappe loyttidi goˈettanaadan koyoosona. He halchuwau, eti bantta naati asttamaaretuura issippetettan oottanaadan tamaarissoosona. Hegaadankka, Yihoowa Markka gidida yelidaageetinne eta naati, asttamaareti banttana akeekaaninne bonchuwan oyqqiyoogaa nashshoosona.

Yihoowa Markkati saˈa yuushuwan erettida Kiristtaane. Gidikkonne, issi issitoo asay etabaa bala ogiyan xeellees. Hegaa gishshau, ha brooshuree intte tamaarissiyo Yihoowa Markka gidida naatubaa loyttidi akeekanaadan inttena maaddana giidi hidootoos. Ubba qassi issi issi dumma hanotatun eti haratuppe dummatiyo maatay bonchettanaadan oychana danddayiyoy aybissakko intte akeekana giidi hidootoos.