HA BROOSHUREE giigidoy Yihoowa Markkati ammaniyoobaa ubbaa qonccissanaassa gidenna. Hegaappe, Yihoowa Markkati ammaniyo issi issi baaso siraatata qonccissanaunne intte tamaariyaa aawaynne aayyiyaa woy etappe issoy Yihoowa Markka gidiyo wode i bantta son ay tamaariyaakko loyttidi qonccissanau baaxetida.

Yihoowa Markkati bantta naati ayyaanaaban dicciyoogaa xoqqu oottidi xeelloosona. Qassi bantta naati harabankka eesuwan dichaa bessanaadan hegee maaddiyoogaa ammanoosona. Eti ammaniyoobaynne eti kaalliyo baaso siraatay eta deꞌoy giiga gidanaadaaninne galla galla gakkiya metota xoonanaadan maaddees. Gujjidikka, he ammaniyoobatinne he baaso siraatati eti bantta deꞌo layttan tamaaranau koshshay deꞌiyoogeetanne deretettan goꞌꞌiyaageeta gidanau baaxetanaadan denttettana koshshees.

Yihoowa Markkati deꞌuwaa suure ogiyan xeellanau baaxetiyo gishshau, timirttiyaa xoqqu oottidi xeelloosona. Hegaa gishshau, banttau danddayettida ubban inttenaara issippe oottanau keehippe koyoosona. Yihoowa Markkati bantta baggaara, saꞌa yuushuwan bantta sooninne bantta goynniyo sohuwan, ha goꞌꞌiya issippetettan naati banttappe koyettiyaabaa polanaadan ubbatoo minttettoosona.