YIHOOWA MARKKATI Geeshsha Maxaafaa tamaarissiyoogaa xoqqu oottidi xeelliyo gishshau, issoti issoti eti kawo timirttiyaa koyennabadan qoppana danddayoosona. SHin hegee tuma gidenna. Harata tamaarissanau, koyrottidi asttamaaree ba huuphe tamaaranau bessees; qassi hegau bessiyaagaadan loohiyoogeenne kaaletoy koshshees. Hegaa gishshau, Yihoowa  Markkati kawo timirttiyaa loytti goꞌettiyoogaa bolla, eti bantta huuphe giigissiyo dumma dumma timirtte prograametuuninne timirtte keettatun daro layttaassi goꞌettiiddi takkidosona. Hegee Yihoowa Markkatinne harati qofaaninne kandduwan laamiyaa oottanaadaaninne ayyaanaaban dichaa bessanaadan maaddiis.

Leemisuwau, daro biittatun bessiyaagaadan tamaaranau injjiyaa demmibeennaagaappe woy guuttaa tamaaridoogaappe denddidaagan nabbabiyoogaanne xaafiyoogaa erennaageeta tamaarissiyoogan, Yihoowa Markkata dumma metoy gakkees. He metuwaa xoonanau, Yihoowa Markkati nabbabiyoogaanne xaafiyoogaa asaa tamaarissiyo prograamiyaa giigissidosona.

Leemisuwau, Yihoowa Markkati Nayjeeriyan 1949⁠ppe doommidi nabbabiyoogaanne xaafiyoogaa tamaarissiiddi deꞌoosona. Nayjeeriyaa biittan tammu shaꞌatun qoodettiyaageeti nabbabiyoogaa tamaaranaadan he timirtteti maaddidosona. Nayjeeriyan hara asatu giddon xeetaappe nabbabiyaageeti 50⁠ppe guutta, shin xeetu Yihoowa Markkatu giddon 90⁠ppe dariyaageeti nabbabiyaageeta gidiyoogaa issi xinaatee qonccissiis. Mekisiiko biittan 1946⁠ppe doommidi, Yihoowa Markkati nabbabiyoogaanne xaafiyoogaa asaa tamaarissiiddi takkidosona. Issi laytta giddon 6,500⁠ppe dariya asay nabbabiyoogaanne xaafiyoogaa tamaariis. Nabbabiyoogaanne xaafiyoogaa eranaadan maaddido asaa qooday 100,000⁠ppe daro. Aadhida layttatun, Boliiviyaa, Kaameruune, Neppaale, Zambbiyaanne hegeetu mala hara daro biittatunkka nabbabiyoogaanne xaafiyoogaa asaa tamaarissida. Yihoowa Markkati Nabbabiyoogaanne Xaafiyoogaa Tamaaranau Minna giyo tamaarissuwau giigida brooshuriyaa laappun miilooneppe daruwaa attamissidosona.

Darotoo hegaa mala prograameti oosettiyo biittaa kawotettan, timirttiyaara gayttidaagan aawatettay deꞌiyoogeeti he oosuwaa nashshidosona. Leemisuwau, Mekisiikon issi kawo oosanchay kaallidi deꞌiyaagaadan xaafiis: “Intte maaduwau taani galatays; nabbabiyoogaanne xaafiyoogaa erenna asaa goꞌꞌau eraa pooꞌuwaa pooꞌissiyo loꞌꞌonne dichaa bessiya oosuwan kawotettay wozanappe galatiyoogaa eta sunttan inttessi yootays. . . . Intte tamaarissiyo oosoy murutanaadan amottays.”

Yihoowa Markkati Geeshsha Maxaafaa tamaarissiyo oosuwaa xoqqu oottidi xeelliyo gishshau, Geeshsha Maxaafaa timirttiyaa harata tamaarissiyo abbiyaa dichanau baaxetoosona. Leemisuwau, kumetta saꞌan deꞌiya 119,000⁠ppe dariya gubaaꞌetu ubban tamaareti, haasayaa shiishshiyoogaaninne nabbabiyoogan loohoosona. Ubba yelagatikka, nabbabiyoogaa erosaara, mazagabettidi ha loohissuwaa  demmana danddayoosona; hegee kawo timirttiyaa gujjin hara ogiyankka eta maaddees. Yihoowa Markka gidida tamaareti bantta qofaa loyttidi qonccissiyoogaa daro asttamaareti yootoosona.

Gujjidikka, Yihoowa Markkatu gubaaꞌeti ubbay bantta Kawotettaa Addaraashshan, woykko shiiqo sohuwan, Geeshsha Maxaafaa xannaꞌanau maaddiyaabati, dikishineeretinne hara maaddiya maxaafati deꞌiyo laybireeriyaa giigissanaadan minttettoy imettees. Kawotettaa Addaraashshan shiiquwan beettiya ubbay he laybireeriyan goꞌettana danddayees. Nabbabanaadan  eta gubaaꞌiyan minttettoy imettees; qassi so asa ubbay naatuyyoonne gasttatuyyo koshshiya daro xuufeti deꞌiyo laybireeriyaa bantta son giigissanaadan minttettoy imettees.

Misonaaweta, maccaageetanne attumaageeta, qassi gubaaꞌiyan oottiyo aawatettay deꞌiyo attumaageeta loohissiyo timirtte keettatakka Yihoowa Markkati giigissidosona. Ha timirtte keettati, Yihoowa Markkati timirttiyaa xoqqu oottidi xeelliyoogau gujo naqaasha.