HA QOFY ekettidoy The World Book Encyclopedia geetettiya maxaafaappe gidishin, iqonccissiyoogaadan, naata tamaarissiyo waanna halchotuppe issoy, sinttappe aqo oyqqiyo wode so asau koshshiyaabaa kunttana danddayissiyoogaa gujjiya, galla galla deˈuwau loohissiyoogaa. Hegee boncho aawatetta gidiyoogaa Yihoowa Markkati ammanoosona. Geeshsha Maxaafay ba huuphe: “SHin baageetuyyo qassi ubbaappe aattidi, ba so asaayyo qoppenna urai oonanne gidikko, he aawi ba ammanuwaa kaddidaagaa. Ammanenna asaappekka aadhdhida iitaa” yaagees. (1 Ximootiyoosa 5:8) Tamaariyo layttati naati bantta deˈuwan aawatettaa kiyanau giigettanaadan oottoosona. Yaatiyo gishshau, timirttiyaa xoqqu oottidi xeellana koshshiyoobadan Yihoowa Markkatussi siyettees.

Yihoowa Markkati Geeshsha Maxaafan deˈiya: “Intte oottiyo ooso ubbaa asau gidennan Godau oottiyoogaadan, wozanappe oottite” yaagiya azazuwaadan deˈanau baaxetoosona. (Qolasiyaasa 3:23) Hegee timirtte keettaa gujjin, deˈo macara ubban oosuwan peˈiya baaso siraata. Hegaa gishshau, Yihoowa Markkati bantta naati loytti xannaˈanaadaaninne timirtte keettan imettiya oosuwaa minttidi oottanaadan minttettoosona.

Geeshsha Maxaafay issi uri ba deˈiyo biittaa higgiyau haarettanaadankka tamaarissees. Yaatiyo gishshau, aappun laytta gakkanau tamaarana koshshiyaakko higgee azaziyo wode Yihoowa Markkati naagoosona.—Roome 13:1-7.

Galla galla deˈuwau loohana koshshiyoogaa xaasayana xayikkonne, Geeshsha Maxaafay timirttiyaa hoollee hegaa xalla geenna; woykko hegee waanna hoolle geenna. Muruta timirttee naati bantta deˈuwan ufayttanaadan denttettanaunne issippetettaa duussan woppu giidaageeta gidanaadankka maaddana koshshees. Yaatiyo gishshau, Yihoowa Markkati kifiliyan tamaariyooban gujettennabata akeekan dooriyoogee keehippe koshshiyoogaa eroosona. Wodiyaa aattiyo bessiyaabati, yettay, wode demmiyoode oottanau dosiyoobati, bollaa minttanau oottiyoobati, laybireeriyaa woykko muuzeemiyaa beˈanau biyoogeenne hegaa malabati bessiya timirttiyau koshshiyaabata gidiyoogaa eti ammanoosona. Gujjidikka, bantta naati cimaa bonchanaadaaninne etassi goˈˈiyaabaa oottanau injjiyaa koyanaadan eti tamaarissoosona.

Ooratta tekinolojiyaa gaasuwan oosuwaa demmiyo injjee ubbatoo laamettiiddi deˈees. Hegaappe denddidaagan, daro yelaga naati loohibeenna oosuwaa oottiyo hanotay merettana  danddayees. Yaatiyo gishshau, eta oosuwaa meezeenne eti loohidobay, ubba qassi laamettiya hanotaa meezetiyo abbiyaa demmiyoogee eta keehippe maaddiyaaba. Hegaa gishshau, Awurooppan asay wotti yeggidi eraa koshshaa doommido wodiyaa (Renaissance) xaafee Montaynyee, ‘eray kumido guuggiyaappe eraa goˈettanau loohida guuggee keha’ giidoogaa mala eray deˈin, tamaareti gastta asa gidiyoogee keha.

Dure biittatanne hiyyeesa biittata bochiya oosuwaa xayoy, oosuwau koshshiyaagaa keenaa loohibeenna yelagata darotoo hirggissees. Yaatiyo gishshau, higgee azaziyoogaappe aadhiya loohissoy oosuwau koshshiyaaba gidikko, gujo timirttiyaa goˈˈaanne hegau giidi yarshshiyoobaa yiggi xeellidi kuuyanaadan yelidaageeti bantta naata kaalettana bessees.

Gidikkokka, injje deˈuwaa deˈiyoogee aquwaaban duretiyoogaappe aadhiyaaba gujjiyoogaa maayennan aggekketa. Bantta deˈuwan oosuwau bichaariya asati mata wodiyan bantta oosuwaappe yedetettiyo wode, bantta deˈuwan halchoy baynnaageeta gididosona. Issi issi yelidaageeti bantta wodiyaa oosuwan wurssiyo gishshau, bantta so deˈuwau goˈettiyo wodiyaanne bantta naati wozannaamanaadan maaddanau etaara aattana danddayiyo wodiyaa coo xayssoosona.

Nuuni tumuppe ufayttiyaageeta gidanaadan danddayissiya, bessiya timirttee aquwaa duretettaappe aadhiyaaba gujjana koshshiyoogee qoncce. Yesuusi:  “Xoossaa maxaafai, ‘Asi Xoossai haasayiyo qaala ubban de7anaappe attin, oitta xalaalan de7enna’ yaagees” yaagiis. (Maatiyoosa 4:4) Kiristtaane gidiyoogaadan, Yihoowa Markkati kandduwaa maaratanne ayyaanaabaa eeshshata dichiyoogeenne aquwaaban koshshiyaabaa kunttanau giigettiyoogee keehippe koshshiyoogaa akeekoosona.