HA MISILIYAN deˈiya dummatiyaabi aybee? Ee, ha misiliyaa dummayiyaabay asay deˈiyoogaa. Hageeti koyro bitaniyaanne koyro maccaasiyo. Eta medhdhiday oonee? Xoossaa. A sunttaa eray? A sunttay Yihoowa. Bitaneenne maccaasiyaa qassi Addaamanne Hewaano geetettoosona.

Xoossaa Yihooway Addaama hagaadan medhdhiis. I biittaappe amarida baanaa ekkidi, aybiininne paci baynna issi bitaniyaa bollaa medhdhiis. Hegaappe simmidi, bitaniyaa siiriyan shemppin Addaamee deˈuwaa demmiis.

Xoossaa Yihooway Addaameyyo immana oosoy deˈees. Addaamee dumma dumma qommo mehetanne doˈata ubbaa sunttanaadan Xoossay yootiis. Addaamee geella mehetanne doˈata daro wodiyaassi beˈennan aggenna gishshau, eta ubbaayyo giiga sunttaa sunttana danddayees. Addaamee mehetuyyonne doˈatuyyo sunttaa kessiyo wode issibaa akeekiis. Hegee aybakko eray?

Mehetinne doˈati ubbay attumanne macca. Attumanne macca danggarssatinne attumanne macca gaammoti deˈoosona. SHin Addaameyyo maccaasi baawa. Yaatiyo gishshau, Yihooway Addaama xiskkuwan kayirissidi, a miyyiyaappe issi gaylle meqettaa ekkiis. Yihooway he gaylliyaa goˈettidi maccaasa medhdhin, a assi machcho gidaasu.

Addaamee he wode ayba ufayttideeshsha! Hewaanakka hegaa mala loˈˈiya ataakiltte sohuwan deˈanaadan Yihooway wotto gishshau, ay keena ufayttidaakko qoppa! Haˈˈi eti naata yelanaunne ufayssan issippe deˈanau danddayoosona.

Yihooway Addaameenne Hewaana merinau deˈanaadan koyiis. Eti kumetta saˈaa Edene ataakiltte sohuwaadan loˈˈiyaasa oottanaadan i koyiis. Addaameenne Hewaana he oosuwaabaa qoppiyo wode ay keena ufayttidonaashsha! Neenikka saˈaa loˈˈiya ataakiltte soho oottiyoogan maaddiyoogaa dosuuteeshsha? SHin Addaamenne Hewaani ufayssay gamˈˈibeenna. Hegee aybissakko ane beˈoos.