EDENE ataakiltte sohuwaappe kiyidi, Addaameenne Hewaana daro metuwaa beˈidosona. Miyo qumaa demmanau eti minnidi oottiyoogaa koshshiis. Loˈˈiya mittaa teeraa gishshaa, bantta heeran daro agunttaynne ohay mokkiyoogaa beˈidosona. Addaameenne Hewaana Xoossaayyo azazettiyoogaa ixxidi, Aara deˈiya dabbotaa aggin hanidabay hegaa.

SHin hegaappekka aadhdhida iitabay, Addaameenne Hewaana hayqqiyoogaa doommidoogaa. Issi mittaa teeraappe miikko hayqqeeta giidi, Xoossay eta seeridoogaa hassaya. Eti miido gallassaappe doommidi hayqqiyoogaa doommidosona. Eti Xoossaassi azazettennan ixxidoogan ay keena eeyyidonaa!

Addaamenne Hewaani naati ubbay yelettidoy, Xoossay Addaamanne Hewaano Edene ataakiltte sohuwaappe kessi simmiina. Hagee, eta naatikka ceeggi ceeggi biidi hayqqana deˈoosona yaagiyoogaa.

Addaameenne Hewaana Yihoowassi azazettidaba gidiyaakko, deˈoy etassinne eta naatussi ufayssiyaagaa gidana shin. Eti ubbay saˈan merinau ufayssan deˈana danddayiyoogaashin attiis. Ooninne ceeggenna, harggennanne hayqqenna shin.

Asay merinau ufayssan deˈana mala Xoossay koyeesinne issi gallassi hegaadan oottanau qaalaa geliis. Kumetta saˈay loˈˈiyoogaa xalla gidennan, ubba asay payyatettan deˈana. Qassi, saˈan deˈiya ubba asay issoy issuwaara gidin Xoossaara gidin loˈˈo dabbo gidana.

SHin Hewaana Xoossaayyo dabbo gidada deˈaggabuukku. Hegaa gishshau, naata yeliyo wode yeloy iyyo metiyaagaa gidiis. A waayettaasu. Yihoowassi azazettabeennaagee o daro metuwan yeggiis; hegee tuma gidennee?

Addaameenne Hewaana daro attumanne macca naata yelidosona. Bayra naˈay yelettido wode, a Qaayeela giidi sunttidosona. Naaˈˈantto naˈaa sunttaa qassi Aabeela giidosona. He naati waanidaakko neeni eray?