NOHESSI issi maccaasiyanne heezzu attuma naati deˈoosona. A naatu sunttay Seema, Kaamanne Yaafeeta. Qassi he naatussikka issi issi machchoti deˈoosona. Yaatiyo gishshau, Nohe son hosppun asay deˈees.

Nohee issi ootti erennabaa Xoossay a ootissana hanees. Issi gita markkabiyaa i keexxanaadan yootiis. He markkabee ha wodiya markkabiyaa mala gita gididi, issi gitanne adussa saaxine milatees. Xoossay: ‘Markkabiyaa heezzu pooqe oottada keexxa’ qassi ‘cora qolˈˈota kessa’ yaagiis. He qolˈˈoti koshshidoy, Nohessa, a soo asaasa, mehetussa, doˈatussanne eti ubbay maana kattaa wottanaassa.

Xoossay markkabiyaa giddo haattay gelennaadan meeshshana mala Nohessi yootiis. Xoossay hagaadan yaagiis: ‘Taani saˈan deˈiya mereta ubbaa wolqqaama bashsha haattaa yeddada xayssana hanayiis. Markkabe giddo gelibeenna ubbay hayqqana.’

Noheenne a naati Yihoowayyo azazettidi markkabiyaa keexxiyoogaa doommidosona. SHin hara asay qilliccees. Iitatettaakka aggibookkona. Xoossay oottana deˈiyoobaa Nohee odiyo wode ooninne ammanibeenna.

Markkabee keehippe gita gidiyo gishshau, a keexxanau daro wodiya ekkiis. Wurssettan daro layttaappe guyyiyan keexetti wuriis. Hegaappe simmin, Nohee mehetanne doˈata markkabe giddo gelissanaadan Xoossay yootiis. Issi issi mehenne doˈa qommotuppe maccanne attuma oottidi naaˈˈaa naaˈˈaa gelissanaadan Xoossay yootiis. Qassi, Xoossay Nohee hara qommo mehiyaappenne doˈaappe laappunaa laappunaa gelissanaadan yootiis. Qassi Nohee dumma dumma qommo kafo ubbaappekka gelissanaadan Xoossay yootiis. Nohee Xoossay giidoogaadan oottiis.

Hegaappe guyyiyan, Noheenne a soo asaykka markkabe giddo gelidosona. Hegaappe simmin, Xoossay markkabiyaa penggiyaa gorddiis. Noheenne a soo asay markkabe giddo gelidi hananau deˈiyaabaa naagoosona. Ane neenikka etaara markkabe giddon naagayidda deˈiyaabadan qoppa. Xoossay giidoogaadan bashsha haattay tumuppe yaaneeshsha?