GEESAY intte keettaa kaaraa bochchiyo issi bitanee neekko yiyaagaa beˈiyaakko, ayba gaada qoppuutee? He bitanee wogga wolqqaama asa gidanna bessees! Issi wode saˈan tumuppekka wogga wolqaama asati deˈidosona. He asatu aawati saluwaappe wodhdhida kiitanchchata gidiyoogaa Geeshsha Maxaafay yootees. SHin hegee waanidi hanana danddayii?

Iita kiitanchcha Seexaanay, shemppoy baynnan iitabaa oottiyoogaa hassaya. I ubba, Xoossaa kiitanchchatikka iita gidanaadan baaxettiiddi takkiis. Hegaappe guyyiyan, he kiitanchchatuppe amaridaageeti Seexaanaayyo azazettiyoogaa doommidosona. Eti, saluwan oottanaadan Xoossay etau immido oosuwaa aggibaydosona. Saˈaa wodhdhidi banttau asaadan ashuwaa maayidosona. Aybissakko eray?

Geeshsha Maxaafay, Xoossaa naati hegeeti, saˈan deˈiya loˈˈiya maccaasaa beˈidi etaara deˈanau koyido gishshataassa yaagees. Hegaa gishshau, eti saˈaa wodhdhidi he maccaasata ekkidosona. Geeshsha Maxaafay hegee bala yaagees; aybissi giikko, kiitanchchati merettidoy saluwan deˈanaassa.

He kiitanchchatinne eta maccaasati naata yelido wode, he naati asaa naatuppe dumma. Koyro heeran daro dumma milatennan aggana danddayoosona. SHin eti wogga wolqqaama gidana gakkanaashin gitati gitati, minni minni biidosona.

He wogga wolqqaama asati iita gididosona. Eti keehi gitanne wolqqaama gidiyo gishshau, asaa qohana danddayidosona. Eti wolqqan asa ubbaa banttanadan iita oottanau baaxetidosona.

Heenooki hayqqiis; shin he wode saˈan issi loˈˈo bitanee deˈees. He bitaniyaa sunttay Noha. Nohee ubbatoo, i oottanaadan Xoossay koyiyoobaa oottiis.

Issi gallassi Xoossay iita asaa ubbaa xayssiyo wodee gakkidoogaa Nohessi yootiis. SHin Xoossay Noha, a soo asaanne, mehetuppenne doˈatuppe darota ashshanau deˈees. Hegaa Xoossay waati oottidaakko ane beˈoos.