NUUYYO deˈiya loˈˈobati ubbay yiidoy Xoossaappe. I awa ayfee nuussi gallassan pooˈissanaadan, aginaynne xoolintteti qassi qamman guutta pooˈuwaa immana mala medhdhiis. Qassi nuuni a bolli deˈanaadan Xoossay saˈaa medhdhiis.

Gidikkokka, awa ayfee, aginay, xoolinttetinne saˈay Xoossay koyro medhdhidobata gidokkona. Koyro merettidabay aybakko eray? Xoossay koyro medhdhidoy baagaa mala bollay deˈiyo ayyaana meretata. Xoossaa beˈana danddayennaagaadan hegeetakka beˈana danddayokko. Geeshsha Maxaafan ha ayyaana meretati kiitanchchata geetetti xeegettidosona. Xoossay kiitanchchata banaara saluwan deˈanaadan medhdhiis.

Xoossay koyro medhdhido kiitanchchay keehippe dumma. I Xoossaassi bayra Naˈa; qassi ba Aawaarakka issippe oottiis. Xoossay hara ubbabaa oottiyo wode i maaddiis. Xoossay awa ayfiyaa, aginaa, xoolinttetanne nu deˈiyo saˈaakka medhdhiyo wode i maaddiis.

He wode saˈay ay milatii? Doomettan saˈaa bolli ooninne deˈana danddayenna. Saˈa ubbaa kammida issi dalgga abbaa haattaappe attin harabi baawa. SHin Xoossay saˈan asay deˈanaadan koyiis. Hegaa gishshau, i nuussi koshshiyaabata giigissiyoogaa doommiis. Ay oottidee?

Koyrottidi saˈay pooˈuwaa demmana koshshees. Hegaa gishshau, Xoossay awa ayfiyaa pooˈoy saˈaa gakkanaadan oottiis. Hegaadan oottiyoogan gallassaynne qammay deˈanaadan oottiis. Hegaappe simmin, Xoossay dalgga abbaa haattaappe biittay xoqqu giidi kiyanaadan oottiis.

Biittaa bolli koyro aybikka baawa. Ha misiliyan neeni beˈiyoogaa mala. Ciishshay, mittay, meheenne doˈaykka baawa. Abbankka ayba moleenne baawa. Asay, meheenne doˈay deˈanau saˈay tumuppe injje soho gidanaadan Xoossay oottana darobi deˈees.