POORA mati! Daaneeli daro metuwan geli uttidaba milatees. SHin gaammoti a qohokkona! Aybissakko eray? Ha ubba gaammotu giddon Daaneela yeggiday oonee? Ane beˈoos.

He wode Baabiloone kawoy Daariyoosa geetettiyaagaa. Daaneeli daro kehanne eranchcha gidiyo gishshau, i Daaneela daro dosees. Daariyoosi ba kawotettan Daaneela waanna halaqa gidanaadan dooriis. Hegee kawotettaa giddon deˈiya hara asati Daaneela qanaatanaadan oottin, eti oottidobay kaallidi deˈiyaagaa.

Eti Daariyoosakko biidi: ‘Kawuwau, 30u gallassay gakkanaashin, ay asinne nena kawuwaa woossanaappe attin, hara ay xoossakko woykko ay asakkokka woossennaadan neeni higgiyaa kessana mala maayida. Ay asinne azazettennan ixxiyaba gidikko, gaammotu ollan olettana bessees’ yaagidosona. Ha higgee kiyanaadan ha asati aybissi koyidaakko, Daariyoosi eribeenna. SHin loˈˈo qofa giidi, he higgiyaa xaafissiis. Yaatiyo gishshau, he higgee laamettana danddayenna.

Daaneeli kiyida higgiyaabaa siyido wode, soo biidi kase ubbatoo woossiyoogaadankka woossiis. He iita asati Daaneeli Yihoowakko woossiyoogaa aggibeennaagaa eridosona. Eti Daaneela xayssanau kessido halchchoy polettiyaaba milatido gishshau ufayttidosona.

Kawuwaa Daariyoosi he asati he higgee kiyanaadan ayssi oottidaakko erido wode, keehippe azzaniis. SHin i higgiyaa laammana danddayenna gishshau, Daaneeli gaammotu ollan yegettana mala azazana bessees. SHin kawoy Daaneelayyo: ‘Ne ayyo oottiyo Xoossay nena ­ashshanaagaa taani ammanettayis’ yaagiis.

Daariyoosi keehippe unˈˈettido gishshau, he galla qammi xiskkana danddayibeenna. Wonttetta gallassi maallado guuran gaammotu ollaakko eesotidi biis. I yaa gakkidaagaa beˈana danddayaasa. I ba qaalaa xoqqissidi: ‘Deˈo Xoossaa ashkkaraa Daaneelaa! Neeni assi goynniyo Xoossay nena gaammotuppe ashshanau danddayidee?’ yaagiis.

Daaneeli: ‘Xoossay ba kiitanchchaa kiittidi gaammotu doonaa gorddin, eti tana qohibookkona’ yaagidi zaariis.

Kawoy keehippe ufayttiis. I Daaneela ollaappe kessanaadan azaziis. Hegaappe i Daaneela xayssana koyida iita asata gaammotu ollan olissiis. Eti ollaa duge gakkennan deˈishin, gaammoti sophi ekkidi, eta meqettaa mentteretti aggidosona.

Hegaappe guyyiyan, Kawuwaa Daariyoosi ba kawotettan deˈiya asaa ubbaassi: ‘Asay ubbay Daaneela Xoossaa bonchchana mala azazayis. I maalaalissiyaa wolqqaamabaa oottees. I gaammoti a meenna mala Daaneela ashshiis’ yaagidi xaafiis.