IZIRI Yerusalaame biido wodiyaappe guuttaa kasetiya wodiyaa ane qoppi ekkoos. Marddikiyoosinne Asttira Parsse kawotettaa giddon deˈiya Israa⁠ˈeeletu ubbaappe aadhdhidi erettidaageeta. Asttira kawiyo; qassi i aawaa ishaa naˈay Marddikiyoosi kawuwaappe kaallidi maatay deˈiyo asa. Hegee waanidi hanidaakko ane beˈoos.

Asttiri aawaaynne aayyiyaa a qii guuttan deˈishin hayqqido gishshau, o Marddikiyoosi dichchiis. Parsse kawuwaa Ahishawiroosassi Suusa kataman kawo keettay deˈees; qassi Marddikiyoosi a ashkkaratuppe issuwaa. Issi gallassi kawuwaa machchiyaa Asxxiina ayyo azazettennan ixxaasu; yaatiyo gishshau, kawoy ooratta machchiyo kawiyo gidanaadan dooriis. I doorido maccaasiyo eray? Ee, a loˈˈiya yelaga Asttiro.

Asay ayyo ziggiyo ha otoranchcha bitaniyaa beˈay? Hegee Hamaana. I Parssen gita maatay deˈiyo asa. Hamaani, ha ne beˈiyo uttida bitanee, Marddikiyoosikka ayyo zigganaadan koyiis. SHin Marddikiyoosi ziggenna. Hegaa mala iita asassi ziggiyoogee ayyo likke milatibeenna. Hegee, Hamaana keehippe yiilloyiis. Hegaa gishshau, i kaallidi deˈiyaagaadan oottiis.

Hamaani Israaˈeeleta xeelliyaagan kawuwassi worddobaa yootiis. I: ‘Eti ne higgiyassi azazettenna iita asa. Eti hayqqana bessees’ yaagiis. Ahishawiroosi ba machchiyaa Asttira Israaˈeele biitta asa gidiyoogaa erenna. Yaatiyo gishshau, i Hamaani giidobaa siyidi, ubba Israaˈeeleti issi gallassi hayqqanaadan higgiyaa kessiis.

Marddikiyoosi kiyida higgiyaa siyido wode, keehippe unˈˈettiis. I Asttirikko: ‘Kawuwaayyo yootada, i nuna ashshana mala woossana bessees’ yaagidi kiittiis. Kawoy xeesennan deˈishin kawuwaakko biyoogee, Parsse biittaa higgiyan digettidabaa. SHin Asttira xeesettennan kawuwaakko gelaasu. Kawoy ba worqqa xamˈˈaa ikko micciis; hegee a hayqqukku yaagiyoogaa. Asttira gita gibiraa giigissada kawuwaanne Hamaana shoobbaasu. He sohuwan kawoy Asttiro, i iyyo ay oottanaadan koyiyaakko oychchiis. Asttira, wonttetta gallassikka a giigissiyo hara gibiraayyo inne Hamaani yiyaabaa gidikko, assi odanaagaa yootaasu.

He gibiran Asttira kawuwaayyo: ‘Ta asaanne tana woranau deˈoosona’ yaagaasu. Yaagin, kawoy keehippe yiillotiis. I: ‘Hegaa oottanau xalidaagee oonee?’ yaagidi oychchiis.

Asttira: ‘He bitanee, he morkkee, ha iita Hamaana!’ yaagaasu.

Kawoy he wode iita yiillotiis. I Hamaani hayqqana mala azaziis. Hegaappe simmidi, kawoy Marddikiyoosa baappe kallidi maatay deˈiyoogaa oottidi sunttiis. Yaatin Marddikiyoosi, Israaˈeeleti hayquwaa naagi uttido gallassan, eti bantta bolli yiyabaa oletti teqqanaadan ooratta higgiyaa kessiis. Marddikiyoosi haˈˈi hegaa mala gita maatay deˈiyo asa gidiyo gishshau, daro asay Israaˈeeleta maaddin, eti bantta morkketuppe attidosona.