BAABILOONEE Meedoonatuuninne Parssetun oyqettoosappe naaˈˈu laytta gidiyaagee aadhdhiis. Haˈˈi aybi hanettiiddi deˈiyaakko beˈa! Ee; Israaˈeeleti Baabilooneppe kiyidi biiddi deˈoosona. Eti waanidi laˈa kiyidonaa? Eti baanadan oottiday oonee?

Hegaa oottiday, Parsse kawuwaa, Qiiroosa. Qiiroosi yelettanaappe daro wodiyaa kasetidi, Yihooway hananabaa yootiya Isiyaasi: ‘Neeni oottanaadan ta koyiyoobaa ne oottana. Katamaa oyqqanaadan a penggee neessi dooyetti uttana’ yaagidi Qiiroosabaa xaafanaadan oottiis. Baabiloone katamaa oyqqiyoogan Qiiroosi sintta xeera gidiis. Meedoonatinne Parsseti qamman, dooya deˈiya penggetuura katamaa gelidosona.

SHin Yihooway kiittin hananabaa yootiya Isiyaasi, Qiiroosi Yerusalaameenne beeta maqidasee zaarettidi keexettanaadan azazanaagaakka yootiis. Qiiroosi hegaadan azazidee? Ee, azaziis. Qiiroosi Israaˈeeletuyyo giidoy hagaadana: ‘Haˈˈi Yerusalaame biite; biidi intte Xoossaa, Yihoowa beeta maqidasiyaa keexxite.’ Ha Israaˈeeletikka biiddi de⁠ˈiyoy hegaa oottanaassa.

SHin Baabiloonen deˈiya Israa⁠ˈeeletuppe guyye Yerusalaame adussa ogiyaa baanau danddayiyaageeti ubbata gidokkona. Hegee 800u kilo mitire gidiya keehippe adussa oge; qassi daroti keehi cimido woy keehi harggiyo gishshau, hegaa hemettanau danddayokkona. Amarida asati bibeenna hara gaasotikka deˈoosona. SHin beennaageetuyyo Qiiroosi: ‘Yerusalaamenne a beeta maqidasiyaa keexxanau simmi biyageetuyyo biraa, worqqaanne hara imotaakka immite’ yaagiis.

Yaatiyo gishshau, simmidi Yerusalaame biiddi deˈiya ha Israaˈeeletussi, daro imotay imettiis. Qiiroosi, Kawuwaa Naabukadanaxoori Yerusalaame xayssiyo wode, Yihoowa beeta maqidasiyaappe ehiido saynetanne wanccatakka etassi immiis. Asay simmidi biiddi, tookkidi efiyo darobay deˈees.

Israaˈeeleti oyddu agina gidiyaagaa hemettoogaappe guyyiyan, Yerusalaame gakkana bessiya wodiyan gakkidosona. Katamay xayoosappe likke 70u laytta; hegaa gishshau, biittay ayba asinne baynna bayssa gididi ­deˈiis. SHin Israaˈeeleti haˈˈi bantta biitti simmidaba gidikkonne, kaallidi tamaaranaagaadan eta metiyaabay gakkana dees.