BAABILOONEPPE Yerusalaame adussa ogiyaa yiida asay daro shaˈan qoodettiyaagaa. SHin eti yaa gakkiyo wode, Yerusalaamee keehippe bayi uttiis. Yan ayba asinne deˈenna. Israaˈeeleti ubbabaakka wotti yeggidi oottana bessees.

Eti kaseti oottidobaappe issoy yarshshiyoosaa. Ha sohoy eti mehiyaa yarshshuwaa woykko imotaa Yihoowassi shiishshiyoosaa. Guutta aginappe guyyiyan Israaˈeeleti beeta maqidasiyaa keexxiyoogaa doommidosona. SHin mata biittan deˈiya morkketi, Israaˈeeleti beeta maqidasiyaa keexxiyoogaa koyibookkona. Yaatiyo gishshau, eta yashissidi, esissanau malidosona. Wurssettan, he morkketi Parsse ooratta Kawoy, keexxiyo oosuwaa diggiya higgiyaa kessanaadan oottidosona.

Daro layttay aadhdhiis. Israaˈeeleti Baabilooneppe simmoosappe haˈˈi 17n laytta gidiis. Yihooway, asay zaarettidi keexxiyoogaa doommanaadan yootana mala hananabaa yootiya Hagganne Zakkaariyaasa kiittiis. Asay Xoossaa maaduwan ammanettidi, hananabaa yootiyaageetussi azazettidosona. Eti keexxennaadan diggiya higgee kiyidabaa gidikkonne, zaarettidi keexxiyoogaa doommidosona.

Yaatiyo gishshau, Parsse biittaa sunttatuppe Tattanaaya geetettiyaagee yiidi, beeta maqidasiyaa keexxanau etau ayba maati deˈiyaakko Israaˈeeleta oychchiis. Israaˈeeleti Baabiloonen deˈiyo wode, Kawuwaa Qiiroosi etassi: ‘Yerusalaame biite; biidi, intte Xoossaa Yihoowa beeta maqidasiyaa keexxite’ giidoogaa ayyo yootidosona.

Tattanaayi, he wode paxa deˈenna Qiiroosi, hegaadan tumukka giidaakkonne eranau dabddaabbiyaa Baabiloone biitti kiittiis. Takkennan Parsse ooratta kawuwaappe xaafettida dabddaabbee yiis. Qiiroosi tumukka hegaadan giidoogaa he dabddaabbee yootees. Yaatiyo gishshau kawoy: ‘Israaˈeeleti bantta Xoossaa beeta maqidasiyaa keexxona. Neenikka eta maaddanaadan taani azazayis’ yaagidi xaafiis. Oyddu laytta gidiyaagaappe guyiyan beeta maqidasee keexetti wurin, Israaˈeeleti keehippe ufayttidosona.

Keehi daro layttay aadhdhiis. Beeta maqidasee keexetti wuroosappe haˈˈi 48n laytta gidana. Yerusalaamen deˈiya asay hiyyeesa; qassi katamaynne Xoossaa beeta maqidaseekka keehippe loˈˈenna. Baabiloonen deˈiya Israaˈeele biittaa asa gidida Iziri, Xoossaa beeta maqidasiyaa giigissana koshshiyoogaa eriis. Hegaa gishshau, i ay oottidaakko eray?

Iziri Parsse kawuwaa Arxxekssiisakko bin, he loˈˈo kawoy Yerusalaame i ekkidi efiyo daro imotaa Izirassi immiis. Iziri Baabiloonen deˈiya Israaˈeeleta, he imotata Yerusalaamee tookkidi efiyoogan bana maaddana mala oychchiis. Baanau eeno giida asati 6,000 gidiyaageeta. Eti tookki efaana daro biraynne worqqay qassi hara daro alˈˈo miishshati deˈoosona.

Eti biyo ogiyan iita asati deˈiyo gishshau, Iziri hirggiis. He asati geella eta worqqaanne biraa ekkidi etakka worana danddayoosona. Hegaa gishshau, neeni ha misiliyan beˈiyoogaadan, Iziri asaa issippe shiishshiis. Hegaappe eti simmidi Yerusalaame he adussa ogiyaa biishin, eta naaganaadan Yihoowakko woossidosona.

Yihoowaykka eta naagiis. Yaatin oyddu aginaa hemettidoogaappe guyyiyan, eti saruwan Yerusalaame gakkidosona. Yihooway maaduwaa demmanau banan ammanettiyaageeta naagana danddyiyoogaa hagee bessenee?