HAGAN oosettiiddi deˈiya oosuwaa ubbaa beˈa. Israaˈeeleti Yerusalaame dirssaa gimbbiyaa shemppoy baynnan gimbboosona. Kawuwaa Naabukadanaxoori 152u layttappe kase Yerusalaame xayssido wode, i dirssa gimbbiyaa laaliisinne katamaa penggetakka taman xuuggiis. Israaˈeeleti Baabilooneppe bantta biitti simmido koyro wode, dirssaa gimbbiyaa zaaretti gimbbibookkona.

Yan deˈiya asay bantta katamay dirssi baynnan hegaa keena layttassi deˈiyo wode, etassi aybbi siyettees gaada qoppay? Eti hirggan deˈidosona. Eta morkketi metootennan gelidi eta qohana danddayoosona. SHin haˈˈi wurssettan dirssaa gimbbiyaa zaarettidi gimbbanaadan, ha bitanee Nahimee asaa maaddiiddi deˈees. Nahimee oonakko eray?

Nahimee Marddikiyoosinne Asttira deˈiyo Suusa katamaappe yiida Israaˈeele asa. Nahimee kawo keettan oottiido gishshau, Marddikiyoosassinne Kawee Asttirissi mata lagge gidennan aggenna. SHin Geeshsha Maxaafay Nahimee Asttiri azinaa Kawuwaa Ahishawiroosassi oottidoogaadan yootenna. I oottidoy appe kaallidi kawotida Kawuwaa Arxxekssiisassa.

Arxxekssiisi, Iziri Yihoowa beeta maqidasiyaa giigissanau Yerusalaame biyo wode, he ubba miishshaa ekki baanaadan oottida loˈˈo kawuwaa gidiyoogaa hassaya. SHin Iziri laaletti uttida katamaa dirssaa gimbbiyaa gimbbibeenna. Nahimee he oosuwaa waati oottana danddayidaakko ane beˈoos.

Iziri beeta maqidasiyaa giigissanaadan Arxxekssiisi miishshaa assi immoosappe 13u laytta gidiis. Nahimee haˈˈi Kawuwaa Arxxekssisassi woyne eessaa tigiyaageetu halaqa. Hegaa giyoogee, kawuwaassi woyne eessaa immiyoogaanne ooninne marzziyaa yeggidi kawuwaa qohenna mala naagiyoogaa yaagiyoogaa. Hegee keehi gita ooso.

Issi gallassi Nahimiyaa ishay Hanaaninne hara asati Israaˈeeleppe Nahimiyaara gayttanau biidosona. Eti Israaˈeeleti beˈiiddi deˈiyo metuwaanne, Yerusalaame dirssaa gimbbeekka he wode gakkanaashin, laalettidi ay mala hanotan deˈiyaakko assi yootidosona. Nahimee hegan daro azzanidi, hegaa xeelliyaagan Yihoowakko woosaa shiishshiis.

Issi gallassi Nahimee azzanidoogaa kawoy eridi: ‘Neeni hagaa keena ayssi azzanadii?’ yaagidi oychchiis. Nahimee Yerusalaamee hegaa mala iita hanotan deˈiyo gishshataassanne dirssaa gimbbeekka kunddi uttido gishshataassa gidiyoogaa kawuwaassi yootiis. Kawoy: ‘Neeni koyiyoobay aybee?’ yaagidi oychchiis.

Nehimee: ‘Taani Yerusalaame baada, dirssaa gimbbiyaa zaarada gimbbanaadan yeddarkkii?’ yaagidi oychchiis. Kawuwaa Arxxekssiisi daro keha asa. I Nahimee baana danddayiyoogaa yootidi, amarida oosuwau goˈettiyo mittaa demmana malakka maaddiis. Nahimee Yerusalaame simmosaarakka, ba halchchidobaa asaassi yootiis. Eti a qofaa dosidi: ‘Gimbbiyoogaa doommoos’ yaagidosona.

Israaˈeeletu morkketi dirssaa gimbbee xoqqiiddi biyaagaa beˈidi: ‘Nuuni pude kiyi eta woridi, he oosuwaa esissana’ yaagidosona. SHin Nahimee hegaa siyidi, gimbbiyaageetussi bisuwaanne tooraa immiis. Qassi i: ‘Nu morkketuyyo yayyoppite. Intte ishanttussi, intte naatussi, intte machchotussinne intte keettaassi olettite’ yaagiis.

Asay keehippe xala. Eti bantta ola miishshaa oyqqidi, gimbbiyaa gallassinne qammi gimbbiyoogaa aggibookkona. Yaatiyo gishshau, dirssaa gimbbee 52u gallassa xallan gimbbetti wuriis. Haˈˈi asay kataman hirggi baynnan deˈana danddayees. Nahimeenne Iziri Xoossaa higgiyaa asaa tamaarissin, asay ufayttiis.

SHin haˈˈikka gidin ubbabay Israaˈeeleti omooddettidi Baabiloone baanaappe kase deˈiyaagaa mala gidenna. Asaa haariyay Parsse kawuwaa gidiyo gishshau, eti ayyo oottana bessees. SHin Yihooway asaassi ooratta kawuwaa denttanaagaanne he kawoy asaassi sarotettaa ehaanaagau qaalaa geliis. He kawoy oonee? I saˈan sarotaa waati ehaanee? He yohuwaabaa gujjidi erennan 450u laytta gidiyaagee aadhdhiis. Hegaappe asa naatu yeletan xoqqa sohoy immettiyo naˈay yelettiis. SHin hegee hara taarike.