DIINA ookko baydda deˈiyaakko beˈay? Kanaane biittan deˈiya macca naatuppe amaridaageetukko baydda deˈausu. I aaway Yaaqoobi hegan ufayttanddeeshsha? Abrahaamessinne Yisaaqassi Kanaane biittaa maccaasatuyyo ay mala xeelay deˈiyakko ne hassaya ekkiyoogee, he oyshaa zaaranau maaddana danddayees.

Abrahaamee ba naˈay Yisaaqi Kanaane macca naatuppe machcho ekkanaadan koyidee? CHii, koyibeenna. Yisaaqinne Ribiqa eta naˈay Yaaqoobi Kanaane macca naˈa ekkanaadan koyidonaa? CHii, koyibookkona. Aybissakko eray?

Kanaanen deˈiya asay eeqatussi goynniyo gishshataassa. Eta ekkanau woykko gelanau loˈˈo asa gidokkonanne eta mata lagge oottanaukka loˈˈo asa gidokkona. Hegaa gishshau, a naˈiyaa Kanaane macca naata ba lagge oottidoogan, Yaaqoobi ufayttibeennaagee qoncce.

Diina metuwan gelidoogee qoncce. Misiliyan Kanaane bitanee Diino tishshi oottidi xeelliyaagaa beˈay? A sunttay SHekeema. Issi gallassi Diina etakko biidaashin, SHekeemi Diino efiidi wolqqan iira zinˈˈiis. Issippe zinˈˈana bessiyay azinanne machcho gidida asa xalla gidiyo gishshau, hegee bala ooso. SHekeemi Diini bolli oottido he iita oosoy hara daro metuwaa kaalettiis.

Diini ishantti aybi hanidaakko siyido wode, keehippe yiillotidosona. Etappe Simoonanne Leewa geetettiya naaˈˈati, keehi yiillotido gishshau bantta bisuwaa ekkidi, he asati qoppennan katamaa gelidi daganttidosona. Etinne eta ishantti SHekeemanne hara attuma asa ubbaa woridosona. A naati hagaa mala iitabaa oottido gishshau, Yaaqoobi yiillotiis.

Ha ubba metoy denddidoy aybiinee? Hegee gakkidoy, Diina Xoossaa higgiyaassi azazettenna asata lagge ootto gishshataassa. Hega mala asata lagge oottana koyokko; koyiyooyye?