MUUSEE ba dorssatussi maataa demmanau Korebe deriyaa gakkanaashin biis. He sohuwan issi eexxiya buuraa beˈiis shin, tamay he buuraa meenna!

Muusee: ‘Hagee oorattaba; taani hagaa loytta beˈanau a mati shiiqana’ yaagidi qoppiis. I shiiqin, buuraa giddoppe cenggurssay: ‘Haa shiiqoppa. Neeni eqqido biittay geeshsha gidiyo gishshau, ne tohuwan deˈiya caammaa kessa’ yaagiis. Kiitanchchaa baggaara ayyo haasayiday Xoossaa gidiyo gishshau, Muusee ba somˈˈuwaa genttiis.

Hegaappe Xoossay yaagiis: ‘Taani Gibxxe biittan ta asay tuggatiyo tuggaa beˈaas. Yaatiyo gishshau, ta eta he tuggaappe kessana; ta asaa Gibxxeppe kaalettada kessanaadan ta kiittiyoy nena’ yaagiis. Yihooway ba asaa loˈˈiya Kanaane biitti ehaana hanees.

SHin Muusee yaagiis: ‘Taani oonashin; hegaa ta waata oottana danddayiyanaa? Gido shin, taani bin Israaˈeeleti, “Nena kiittiday oonee?” giikko taani woyganee?’ yaagiis.

Xoossay: ‘Neeni gaanay hagaadaana’ yaagiis. “‘YIHOOWAY Abrahaama Xoossay, Yisaaqa Xoossay, Yaaqooba Xoossay, i tana inttekko kiittiis.’” Qassikka Yihooway gujjidi: ‘Hagee merinau ta suntta’ yaagidi zaariis.

Muusee: ‘Tana kiittiday nena gidiyoogaa yootin, eti ammanennan ixxikko shin’ yaagidi zaariis.

Yaagin Xoossay: ‘Ne kushiyan deˈiyaagee aybee?’ yaagidi oychchiis.

Muusee: ‘Xamˈˈaa’ yaagiis.

Xoossay: ‘Ane a saˈan ola’ yaagiis. Muusee olin, xamˈˈay shooshsha kiyiis. Hegaappe Yihooway Muusa hara malaataa bessiis. ‘Ne kushiyaa ne maayuwaa giddo naaqqa’ yaagiis. Muusee hegaadan oottin, i kessiyo wode a kushee shachchadan booxxiis! A kushee baruwaa giyo iita harggiyan oyqettidaba milatiis. Kaallidi Yihooway Muusessi heezzantto malaataa oottanaadan wolqqaa immiis. Wurssettan Yihooway: ‘Ne ha malaatata oottiyo wode Israaˈeeleti taani nena kiittidoogaa ammanana’ yaagiis.

Hegaappe guyyiyan, Muusee soo biidi Yatiroyyo: ‘Taani Gibxxe biittan deˈiya ta dabboti waanidi deˈiyaakko beˈanaadan hayyana yeddarkkii’ yaagiis. Hegaa gishshau, Yatiroy saro ba yaagin, Muusee Gibxxe biitti guyye simmidi biyoogaa doommiis.