MACCAASEE biradhdhiyaa oyqqidi yeekkiya gacino naˈaa xeella. Hegee Muusa. He loˈˈiya maccaasiyaa oonakko eray? A Gibxxe kawuwaa Paaroona naˈiyo.

Muuse aayyiyaa ba naˈaa Gibxxeti worenna mala koyido gishshau, au heezzu agina gidanaashin qottaasu. SHin Muusa hara asi demmikko woriyoogaa erada, a ashshanau kaallidi deˈiyaagaadan oottaasu.

Keeshiyaa daddada ayba haattinne gelennaadan oottada meeshaasu. Hegaappe Muusa a giddon wottada, he keeshiyaa Nayle SHaafaa doonan mokkida adussa maataa giddon wottaasu. Muuse michchiyaa Miiriyaama hanettiyabaa matasan eqqada beˈanaadan azazettaasu.

Sohuwaara Paaroona naˈiyaa bollaa meecettanau Nayle SHaafaa wodhdhaasu. Qoppennan he adussa maataa giddon deˈiya keeshiyaa beˈaasu. Ba macca ashkkaratuppe issinniyo xeesada: ‘Baada he keeshiyaa tau ekkada ya’ yaagaasu. Kawuwaa naˈiyaa keeshiyaa pogiyo wode, a beˈidoy ayba loˈˈiya naˈee! Guutta naˈay Muusee yeekkiyaagaa kawuwaa naˈiyaa beˈada ayyo qarettaasu. I hayqqanaadan koyabuukku.

Hegaappe Miiriyaama yaasu. O ha misiliyan beˈana danddayaasa. Miiriyaama, Paaroona naˈiyo: ‘Neeyyo ha naˈaa xanttanau Israaˈeela maccaasa issinno xeesanau boo?’ yaagada oychchaasu.

Kawuwaa naˈiyaa: ‘Hayyanaa ba’ yaagaasu.

Hegaa gishshau, Miiriyaama ba aayeessi yootanau woxxaasu. Muuse aayyiyaa kawuwaa naˈeekko yin, kawuwaa naˈiyaa: ‘Ha naˈaa efaada, taayyo xanttashsha; taani neeyyo damoozaa qanxxana’ yaagaasu.

Hegaa gishshau, Muuse aayyiyaa ba naˈaa loytta dichchaasu. Guyyeppe Muusee gitaa gidin, a aayyiyaa efaada ba naˈadan dichchiya Paaroona naˈeessi immaasu. Muusee Paaroona son diccana danddayidoy hegaassa.