HA NE beˈiyo asati asaa wolqqan ootissiiddi deˈoosona. Oosanchchatuppe issuwaa lissuwan shociya bitaniyaa xeella! Oosanchchati Israaˈeeleta geetettiya Yaaqooba so asata. Eta wolqqan ootissiyaageeti qassi Gibxxeta. Israaˈeeleti Gibxxetussi aylle gididosona. Hegee waani hanidee?

Corattida Yaaqooba soo asay daro layttaassi Gibxxen saruwan deˈiis. Gibxxe biittan kawuwaa Paaroonappe kaallidi xoqqa sohoy deˈiyo Yooseefi, eta loytti oyqqiis. SHin hegaappe Yooseefi hayqqiis. Qassi Israaˈeeleta dosenna hara Paarooni Gibxxen kawotiis.

Yaatiyo gishshau, ha iita Paarooni Israaˈeeleta aylle oottiis. Qassi, eta bolli qareti baynna iita asata halaqa oottiis. He asati wolqqan Israaˈeeleta daro deexo ooso ootissidi, Paaroonayyo katamata keexissidosona. SHin Israaˈeeletu qooday gujjiiddi biyoogaa aggibeenna. Guuttaa takkishin Gibxxeti, ‘Israaˈeeleti keehippe daroosonanne minnoosona’ giidi hirggiyoogaa doommidosona.

Hegaa gishshau, Paarooni waatidaakko eray? I Israaˈeela maccaasay yeliyo wode maaretissiya maccaasata: ‘Yelettiya naˈay attumaagaa gidikko worite’ yaagiis. SHin he maccaasati loˈˈo asa gidiyo gishshau naata woribookkona.

Yaatiyo gishshau, Paarooni ba asaa ubbaa: ‘Israaˈeeletu gacino naata, attumaageeta woridi maccaageetu xallaa ashshite’ yaagidi azaziis. Hegee keehi yashshiya azazo gidennee? He gacino attuma naatuppe issoy waanidi attidaakko ane beˈoos.