NOHEE ba soo asaara markkabiyaappe kiyido wode, koyro oottidobay aybakko eray? I Xoossaayyo yarshshuwaa woykko imotaa shiishshiis. Hagaappe garssan deˈiya misiliyan, i hegaa oottiyogaa beˈana danddayaasa. Xoossay a soo asaa bashsha haattaappe ashshido gishshau, Nohee a galatanau mehetuppe he imotaa shiishshiis.

Yihooway he imotan ufayttidaba neeyyo milatii? Ee, ufayttiis. Hegaa gishshau, Yihooway saˈaa bashsha haattan naaˈˈantto mule xayssennaagau Nohessi qaalaa geliis.

Gamˈˈennan biitta ubbay xiˈˈiis; qassi Noheenne a soo asay markkabiyaappe kiyidi ooratta duussaa doommidosona. Xoossay eta: ‘Yelettite corattite saˈa ubaa kumite’ giidi anjjiis.

SHin guyyeppe, asay bashsha haattaabaa siyiyo wode, geella hegaa mala bashsha haattay haranttuwaakka gakkana giidi yayyana danddayoosona. Yaatiyo gishshau, Xoossay kumetta saˈaa zaaridi bashsha haattan xayssennaagau gelido qaalaa asaa hassayssiya malaataa wottiis. Eta hassayissanau i wottido malaatay aybakko eray? He malaatay zuullaa.

Zuullay darotoo iray bukki simmin away kiyiyo wode saluwan beettees. Zuullau loˈˈiya daro dumma dumma meray deˈees. Zuullaa beˈa eray? Ha misiliyan deˈiya zuullaa beˈay?

Xoossay hagaadan giis: ‘Naaˈˈantto mulekka asay, meheenne doˈay ubbay bashsha haattan xayennaagaassi taani qaalaa gelayiis. Taani ta zuullaa shaaraa giddon wottayiis. Zuullay kiyiyo wode beˈada, ta gelido qaalaa hassayana’ yaagiis.

Yaatiyo gishshau, neeni zuullaa beˈiyo wode, nena i ay hassayissana bessii? Ee, Xoossay zaarettidi kumetta saˈaa bashsha haattan xayssennaagau gelido qaalaa hassayissana bessees.