LOOXEENNE a soo asay Kanaane biittan Abrahaameera issippe deˈidosona. Issi gallassi Abrahaamee Looxa hagaadan giis: ‘Hagan biittay nu mehiyau ubbau gidenna. Hayyana, ane shaahettoos. Neeni issi baggi biikko, taani hara baggi baana’ yaagiis.

Looxee biittaa yuuyidi xeelliis. I ba mehiyaassi haattaynne loˈˈo maatay daroy deˈiyo keehi loˈˈo sohuwaa beˈiis. Hegee Yorddaanoosa SHaafay deˈiyo heeraa. Yaatiyo gishshau, Looxee ba soo asaanne ba mehiyaa ekkidi yaa biis. Wurssettan Sadooma kataman deˈiyoogaa doommidosona.

Sadooma biittaa asay keehi iita. Looxee loˈˈo asa gidiyo gishshau, hegan yiillotiis. Xoossaykka yiillotiis. Wurssettan, Xoossay Sadooma katamaanne matan deˈiya Gamoora katamaa, eta iita oosuwaa gishshau xayssana haniyoogaa Looxessi yootanaadan naaˈˈu kiitanchchata kiittiis.

Kiitanchchati Looxa: ‘Ellella! Ne machchiyonne ne naaˈˈu macca naata ekkada hagaappe kiya!’ yaagidosona. Looxeenne a soo asay kiyanau guuttaa gamˈˈin, kiitanchchati kushiyaa oyqqidi katamaappe eta kessidosona. Kiitanchchatuppe issoy hagaadan giis: ‘Intte shemppuwau baqatite! Guyye simmidi xeellopite. Intte hayqqennaadan, deriyaakko baqatite’ yaagiis.

Looxeenne a macca naati azazettidi Sadoomappe baqatidosona. Eti guutta wodiyaukka eqqibookkonanne guyye simmidi xeellibookkona. SHin Looxe machchiyaa azazettabuukku. Sadoomappe kiyidi eti guuttasaa bi simmin, a eqqada guyye xeellaasu. Hegaappe, Looxe machchiyaa maxine tuussa gidaggaasu. Ha misiliyan o beˈay?

Hagaappe loˈˈo timirtte demmana danddayoos. Xoossay ashshiyoogeeti ayyo azazattiyaageeta gidiyoogaanne ayyo azazettennaageeti xayanaagaa bessees.