MUUSEE Gibxxeppe woxxiiddi biyaagaa beˈa. A yedettiya asata beˈay? Eti Muusa woranau koyiyoy aybissakko eray? Ane nu hegaa erana danddayiyakkonne beˈoos.

Muusee, Gibxxe biittaa haariya Paaroona son dicciis. I keehippe eranchchanne gita asa gidiis. Muusee, i Gibxxe biitta asa gidennaagaanne a yelidaageeti aylle gidida Israaˈeeleta gidiyoogaa eriis.

Muusessi layttay 40 kumido wode, issi gallassi, ba asay waanidi deˈiyaakko beˈanau qofaa qachchiis. Harati, eta iita hanotan oyqqidosona. Issi Gibxxe bitanee, Israaˈeela asa gidida issi aylliyaa wadhdhishin beˈiis. Muusee yaa haa xeellidi, ooninne baynnaagaa beˈinne Gibxxe bitaniyaa shocin, he Gibxxe bitanee hayqqi aggiis. Hegaappe Muusee bitaniyaa ahaa shafiyaa giddon qottiis.

Wonttetta gallassikka Muusee ba asaa beˈanau simmidi biis. Eti aylletettaappe kiyanaadan i maaddana danddayiyaabadan qoppiis. SHin naaˈˈu Israaˈeeleti warettiyaageeta Muusee beˈidi, mooranchchaa: ‘Neeni ne ishaa ayssi dechchay?’ yaagiis.

Bitanee: ‘Nena nu bolli haariyaagaanne daanna ootti sunttiday oonee? Neeni he Gibxxe bitaniyaa woridoogaadan, tanakka worana qoppayiyye?’ yaagiis.

He wode Muusee yayyiis. I Gibxxe bitaniyaa bolli oottidobaa asay eridoogaa eriis. Ubba Paaroonikka hegaa siyidi, Muusa woranaadan asaa kiittiis. Muusee Gibxxeppe baqatana koshshidoy hegaassa.

Muusee Gibxxe biittaappe kiyidi, Midiyaama giyo haaho biitti biis. Yan Yatiro soo asaara gayttidi, a macca naatuppe Xippaaro geetettiya issinno ekkiis. Muusee dorssa henttanchcha gididi, Yatiro dorssata heemmiis. I Midiyaama biittan 40⁠u laytta deˈiis. He wode assi 80⁠u laytta. Hegaappe issi gallassi Muusee Yatiro dorssata heemmishin, a deˈuwaa muleera laammida issi garamissiyaabay haniis. Kaalliya sinttaa ne kessin, he garamissiyaabay aybakko ane beˈoos.