NAAˈˈU layttay aadhdhiis shin, Yooseefi haˈˈikka qasho keettan deˈees. Eessaa tigiyaagee a hassayibeenna. Hegaappe, issi qammi Paarooni naaˈˈu dumma aymuwaa aymottiis; eta birshshettaykka aybakko eranau koyiis. Hagan i xiskkidaagaa beˈay? Wonttetta galla maallado Paarooni ba eranchcha asata xeesidi, etassi ba aymuwaa yootiis. SHin eti a aymuwaa birshshettaa ayyo yootana danddaybookkona.

Haˈˈi wurssettan eessaa tigiyaagee Yooseefa hassayiis. I Paaroonassi: ‘Taani qasho keettan deˈiyo wode aymo birshshana danddayiya issi bitanee yan deˈees’ yaagiis. Paarooni sohuwaara Yooseefa qasho keettaappe ehiissiis.

Paarooni ba aymuwaa Yooseefassi yootiiddi yaagiis: ‘Taani laappun orddenne modhdho miizzata beˈaas. Etappe simmin, laappun laafanne gilqqa miizzata beˈaas. He gilqqati modhdho miizzata miidosona.

‘Naaˈˈantto aymuwan taani laappun loˈˈonne muruta tiyati issi anuwan dicciyaageeta beˈaas. Etappe simmin, taani laappun shoggettidanne shullida tiyata beˈaas. He shoggettida tiyati laappun loˈˈonne muruta tiyata mittidosona’ yaagiis.

Yooseefi Paaroonassi hagaadan giis: ‘Naaˈˈu aymotu birshshettaykka issuwaa. Laappun modhdho miizzatunne laappun loˈˈo tiyatu birshshettay, laappun layttaa; qassi laappun gilqqa miizzatunne laappun shoggettida tiyatu birshshettay hara laappun layttaa. Lappun daro kalo layttati Gibxxe biittau ubbau yaana; shin laappun kosha layttay hegaa kaallana.’

Hegaa gishshau, Yooseefi Paaroonassi yaagiis: ‘Issi eranchcha asa doorada he laappun kalo layttatun kattaa shiishshanaadan aawatettaa ayyo imma. Yaatikko, yiya guutta kattay mokkiyo laappun kosha layttatun asay namisettenna’ yaagiis.

Paarooni he qofaa dosiis. Kattaa gootaran shiishshanaadan, Yooseefa dooriis. Yooseefi Gibxxe biittan Paaroonappe kaallidi daro erettida asa gidiis.

Hosppun layttappe guyyiyan, koshaa wode, Yooseefi amarida asati yiyaageeta beˈiis. Eti oonakko eray? Eti Yooseefa bayra ishantta 10⁠ta! Kanaanen, eta son kattay wurana haniyo gishshau, eta aaway Yaaqoobi eta Gibxxe kiittiis. Yooseefi ba ishantta eriis shin eti a eribookkona. Aybissakko eray? Hegee, Yooseefi diccidi gita asa gidido gishshataassanne dumma maayuwaa maayido gishshataassa.

Yooseefi naatettan deˈiiddi ba ishantti baassi zigganau yiyaageeta beˈido aymuwaa hassayiis. Hegaa neeni nabbabidoogaa hassayay? Hegaa gishshau, Yooseefi bana Gibxxe kiittidaagee Xoossaa gidiyoogaanne hegeekka loˈˈobaassa gidiyoogaa erana danddayiis. Yooseefi ay oottiyaaba neessi milatii? Ane beˈoos.