BASHSHA Haattaappe simmin, asay deˈanau biido sohotuppe issoy Uura geetettees. He sohoy amarida loˈˈo keettati deˈiyo erettida katama gidiis. SHin yan deˈiya asati eeqatussi goynnoosona. Hegee eti Baabeelan deˈiiddikka oottidoba. Uuraninne Baabeelan deˈiya asay, Yihoowassi oottiyoogaa aggibeenna Nohanne a naˈaa Seema mala gidokkona.

Bashsha haattay gakki simmin 350⁠u layttaa takkidi, ammanettida Nohee hayqqiis. Hegaappe naaˈˈu layttaa takkidi, ha misiliyan neeni beˈiyo bitanee yelettiis. I Xoossaassi keehi dumma asa. A sunttay Abrahaama. I ba soo asaara he katamaa Uuran deˈiis.

Issi gallassi Yihooway Abrahaama: ‘Neeni Uura katamaappenne ne dabbotuppe shaahettada taani nena bessiyo biitti ba’ yaagiis. Abrahaamee Xoossaassi azazettidi, Uuran deˈiya injje duussaa aggidi biidee? Ee, biis. Abrahaamee Xoossaa dabbo geetettidoykka, i ubbatoo Xoossaayyo azazattido gishshataassa.

Abrahaamee Uura katamaa aggidi biyo wode a soo asaappe amaridaageeti aara issippe biidosona. A aawaa Taari issippe biis. A ishaa naˈay Looxeekka aara biis. Qassi, a keettayiyaa Saarakka issippe biidoogee qoncce. Guyyeppe, eti Kaaraane giyoosaa gakkidosona; hegeekka Taari hayqqidosaa. Hegee Uurappe daro haaho soho.

Guutta wodiyaappe guyyiyan, Abrahaameenne a soo asay Kaaraaneppe kiyidi Kanaane giyo biitti biidosona. He sohuwan Yihooway: ‘Taani ne naatussi immana biittay hagaa’ yaagiis. Abrahaamee Kanaane biittan dunkkaaniyan deˈiis.

Xoossay Abrahaama maaddido gishshau, assi cora dorssa wudee, hara mehetinne xeetan qoodettiya ashkkarati deˈana danddayidosona. SHin Abrahaamee Saarippe naˈa yelibeenna.

Abrahaame layttay 99 gidiyo wode Yihooway ayyo: ‘Neeni daro deriyaa asau aawaa gidana’ yaagiis. SHin Abrahaameenne Saara naˈa yelanau keehippe cima gidishin, hegee waanidi hanana danddayii?