ABRAHAAMEE hagan ay oottiiddi deˈiyaakko beˈay? Mashshaa oyqqiis; qassi ba naˈaa gooraˈana haniyaabaa milatees. A hegaa malabaa ootissiyaabi aybee? Ane koyro, Abraameenne Saara bantta naˈaa waati yelidaakko beˈoos?

Xoossay eti naˈa yelanaagaa qaalaa gelidoogaa hassaya. SHin Abrahaameenne Saara keehi cimido gishshau, hegee hananaba milatenna. Gidikkonne, Xoossay hanennaba milatiyaabaakka oottana danddayiyoogaa Abrahaamee ammaniis. Yaatin, hanidabay aybee?

Xoossay qaalaa geloosappe laytta kumettay aadhdhiis. Hegaappe guyyiyan, Abrahaamessi 100⁠u laytta, qassi Saarissi 90⁠u laytta gidiyo wode, Yisaaqa geetettiya naˈaa yelidosona. Xoossay ba gelido qaalaa naagiis!

SHin, Yisaaqi diccidi gitatido wode, Yihooway Abrahaama ammanuwaa paacciis. I: ‘Abrahaamaa!’ giidi xeessin, Abrahaameekka: ‘Yee’ giidi koyiis. Hegaappe guyyiyan Xoossay: ‘Neeni siiqiyo ne mexi issi naˈaa Yisaaqa ekkada ba; baada yan taani nena bessiyo issi deriyaa bollan a yarshsho oottada taayyo yarshsha’ yaagiis.

Abrahaamee ba naˈaa keehippe siiqiyo gishshau, he azazoy Abrahaama ay keena azzanttideeshsha! Qassi, Xoossay Abrahaama naati Kanaane biittan deˈanaagau qaalaa gelidoogaa hassaya. SHin Yisaaqi hayqqiyaaba gidikko, hegee waani polettana danddayii? Abrahaamee hegee waani hananaakko eriyobi baawa shin, hegankka Xoossaassi azazettiis.

Abrahaamee deriyaa kiyido wode, Yisaaqa qachchidi, yarshshanau gimbbido sohuwan zinˈˈissiis. Hegaappe kaallidi, ba naˈaa gooraˈanau mashshaa ekkiis. SHin sohuwaara Xoossaa kiitanchchay: ‘Abrahaamaa, Abrahaamaa!’ yaagidi xeesiis. Abrahaameekka: ‘Yee’ yaagidi koyiis.

Xoossay hagaadan giis: ‘Naˈaa qohoppa; a aynne oottoppa; neeni tana ammaniyoogaa taani haˈˈi eraas; aybissi giikko, neeni ne mexi issi naˈaakka tana diggabaakka’ yaagiis.

Abrahaamee Xoossan ayba wolqaama ammanoy deˈiyo asee! I Yihoowassi danddayettennabi aybinne baynnaagaanne Yihooway Yisaaqa hayquwaappekka denttana danddayiyoogaa ammaniis. SHin Abrahaamee Yisaaqa woranaadan Xoossay tumuppe koyibeenna. Hegaa gishshau, Xoossay matasan dorssa issoy buuran qaxetti uttanaadan oottidi, Abrahaamee ba naˈaa gishshaa a yarshshanaadan yootiis.