ANE hagan deˈiya so asaa coraa xeella. Hageeti Yaaqooba 12⁠u attuma naata. Ayyo macca naatikka deˈoosona. Etappe neeni sunttaa eriyoy deˈii? Ane etappe amaridaageetubaa tamaaroos.

Liya Roobeela, Simoona, Leewanne Yihudaa yelaasu. Raaheela naˈa yelabeenna gishshau, daro azzanaasu. Hegaa gishshau, ba ashkkariyo Baalo Yaaqoobi ekkanaadan a immin, Baala Daananne Nifttaaleema geetettiya naaˈˈu attuma naata yelaasu. Hegaappe guyyiyan, Liyakka ba ashkkariyo Zilppo Yaaqoobassi immin, Zilppa Gaadanne Aseera yelaasu. Wurssettan Liya hara naaˈˈu attuma naata, Yisaakooranne Zaabiloona yelaasu.

Wurssettan Raaheelakka issi naˈa yelaasu. A sunttaa Yooseefa sunttaasu. Yooseefi daro erettida asa gidido gishshau, takkidi abaa darobaa tamaarana. Hageeti Yaaqooba 11 attuma naati, i Raaheeli aawaa Laabaanaara deˈishin yelettidaageeta.

Yaaqoobi amarida macca naatakka yeliis; shin Geeshsha Maxaafay etappe issinni sunttaa xallaa yootees. I sunttay Diino.

Yaaqoobi Laabaanaara deˈiyoogaa aggidi, guyye simmidi Kanaane biitti baanau koyiyo wodee gakkiis. Hegaa gishshau, i ba so asaa coraa, daro dorssa wudiyaanne mehe wudiyaa issippe shiishshidi, adussa ogiyaa biyoogaa doommiis.

Yaaqoobinne a soo asay Kanaane gelido guutta wode giddon, Raaheela hara attuma naˈaa yelaasu. Hegee hanidoy eti ogiyan deˈishiina. Raaheela keehin waayettada, wurssettan yelaydda hayqqaasu. SHin yelettida guutta naˈay aynne hanibeenna. Yaaqoobi a Biniyaama yaagidi sunttiis.

Israaˈeela asay ubbay yiidoy etappe gidiyo gishshau, Yaaqooba 12⁠u attuma naatu sunttaa hassayana koyoos. SHin Israaˈeela 12⁠u zareti xeesettidoy, Yaaqooba 10⁠u naatunne Yooseefa naaˈˈu naatu sunttaana. Ha naati ubbay yeletti simmin Yisaaqi daro wodiyau deˈiis; qassi naˈaa naata daruwaa beˈidoogee a keehi ufayssennan aggenna. SHin a naˈaa naˈiyaa Diina waanidaakko ane beˈoos.