YAAQOOBAARA haasayiya ha asati oonakko eray? Daro gallassa ogiyaa hemettoogaappe guyyiyan, issi haatta ollaa matan Yaaqoobi etaara gayttiis. Eti bantta dorssata heemmoosona. Yaaqoobi eta: ‘Intte auppe yiidetii?’ yaagidi oychchiis.

Eti: ‘Nuuni Kaaraaneppe yiida’ yaagidosona.

Yaaqoobi: ‘Laabaana ereetii?’ yaagidi oychchiis.

‘Ee, eroos’ yaagi zaaridosona. ‘A naˈiyo Raaheelo a dorssaa wudiyaa ekkada yiyaaro hanno beˈa’ yaagidosona. Raaheelo haahuwaara yiyaaro beˈay?

Yaaqoobi ba aayye ishaa Laabaana dorssata laaggada Raaheela yiyaaro beˈidi, dorssati haattaa uyaanaadan ollaakko biis; biidi ollaa doonaappe shuchchaa gonddorssiis. Hegaappe Yaaqoobi Raaheelo yeridi, i oonakko issi yootiis. A keehippe ufayttada, soo woxxa baada ba aawaa Laabaanassi yootaasu.

Yaaqoobi ba matan takkanaagaa Laabaani eridi daro ufayttiis. Yaaqoobi Raaheelo ekkanau Laabaana oychchin, i ufayttiis. Gidikkonne, Raaheelo ekkanau laappun layttaa a gaden oottanaadan Yaaqooba oychchiis. Yaaqoobi Raaheelo keehippe siiqido gishshau, hegaadan oottiis. SHin i, o machchiyo wodee gakkin, aybi hanidaakko eray?

Laabaani Raaheeli gishshaa ba bayra naˈiyo Liyo Yaaqoobassi immiis. Yaaqoobi hara laappun layttaa ayyo ottanau eeno gin, Laabaani Raaheelokka ayyo machcho ootti immiis. Xoossay he wode attuma asay issi maccaasaappe daruwaa ekkiyoogaa diggenna. SHin Geeshsha Maxaafay yootiyoogaadan, ha wodiyan issi attuma asi issi maccaasa xalla ekkana bessees.