HA MISILIYAN deˈiya maccaasiyaa oonakko eray? I sunttay Ribiqo. A gayttanau yiyo bitanee qassi Yisaaqa. A assi machcho gidana hanausu. Hagee waani hanidee?

Yisaaqa aaway Abrahaamee ba naˈaassi loˈˈo maccaasa demmana koyiis. Kanaane asay eeqaassi goynniyo gishshau, Yisaaqi he biittaappe maccaasa ekkanaadan i koyibeenna. Hegaa gishshau, Abrahaamee ba ashkkaraa xeesidi: ‘Neeni ta dabboti deˈiyoosaa Kaaraane baada, ta naˈaa Yisaaqassi maccaasa ehaanaadan koyayiis’ yaagiis.

Sohuwaarakka Abrahaame ashkkaray tammu gaameelata ekkidi he haahosaa biis. I Abrahaame dabboti deˈiyoosaa matattidi, issi haatta pulttoy deˈiyoosan shemppiis. He wodee, katamaa maccaasay pulttuwaappe haattaa tikkanau yiyo omarssa wode. Yaatin, Abrahaame ashkkaray: ‘Tananne ta gaameelata haattaa ushshiya maccaasiya hinna neeni Yisaaqassi doorido machcho gidu’ yaagidi Yihoowa woossiis.

Sohuwaarakka Ribiqa haattaa tikkanau yaasu. Abrahaame ashkkaray uyiyo haatta oychchin a immaasu. Hegaappe, saamettida gaameelati ubbay alana gakkanaashin ushshaasu. Gameelati keehi daro haattaa uyiyo gishshau, hegee daro deexo ooso.

Ribiqa hegaa ootta wurssa simmin, Abrahaama ashkkaray i aaway oonakko o oychchiis. Qassi, qammaa eta son aqana danddayiyaakkonne oychchiis. Akka: ‘Ta aaway Baatuˈeela; qassi intte aqanaukka nu son sohoy deˈees’ yaagada zaaraasu. Baatuˈeeli Abrahaama ishaa Naakoora naˈaa gidiyoogaa Abrahaama ashkkaray eriis. Hegaa gishshau, Abarahaama dabbotukko bana kaaletto gishshau gulabttidi Yihoowa galatiis.

He galla qammi Abrahaama ashkkaray Baatuˈeelassinne Ribiqi ishaa Laabaanassi, i ayssi yiidaakko yootiis. Eti naaˈˈaykka Ribiqa aara baanaadaaninne Yisaaqa gelanaadan eeno giidosona. Ribiqashin, oychchiyo wode woygadee? ‘Eeno’ yaagada baanau koyaasu. Hegaa gishshau, eti wonttetta gallassi gaameelata toggidi guyye Kanaane simmidi, he adussa ogiyaa biyogaa doommidosona.

Eti yaa gakkiyo wode, saˈay omariis. Issi bitanee dembban hemettiyaagaa Ribiqa beˈaasu. He bitanee Yisaaqa. I Ribiqiira gaytto gishshau ufayttiis. A aayyiyaa Saara hayqqoosappe heezzu laytta; haˈˈikka i hegan azzaniyoogaa aggibeenna. SHin haˈˈi Yisaaqi Ribiqo keehippe siiqido gishshau, zaarettidi ufayttiis.