YOOSEEFI 10⁠u ba bayra ishantti haˈˈikka qareti baynna iita asakkonne erana koyiis. Hegaa gishshau, i eta: ‘Intte wochchi xeelliya asa. Intte nu biittan naagoy leppiyo baggay augaakko beˈanau yiideta’ yaagiis.

Eti: ‘CHii, gidokko’ yaagidosona. ‘Nuuni ammanettiya asa. Nuuni ubbaykka ishantta. Nuuni 12⁠u ishantta shin issoy xayiis; wurssetta kaaloy haˈˈi nu aawaara son deˈees’ yaagidosona.

Yooseefi eta ammanibeennaba milatiis. Simoona giyo ishaa qashissidi, harati kaattaa ekkidi soo baanaadan oottiis. SHin eta: ‘Intte simmidi yiyo wode, intte wurssetta kaalo ishaa inttenaara ehaana koshshees’ yaagiis.

Eti Kanaane bantta soo simmido wode, bantta aawaa Yaaqoobassi hanettida ubbabaa odidosona. Yaaqoobi keehippe azzaniis. ‘Yooseefi baawa; Simoonikka baawa’ yaagidi yeekkiiddi: ‘Ta wurssetta naˈaa Biniyaama inttenaara yeddikke’ yaagiis. SHin etau deˈiya kattay wurana hanin, Yaaqoobi eti Gibxxeppe kattaa gujjidi ehaanaadan Biniyaama etaara yeddiis.

Haˈˈi Yooseefi ba ishantti yiyaageeta beˈiis. I ba kaalo ishaa Biniyaama beˈidi keehi ufayttiis. Ha xoqqa sohoy deˈiyo bitanee Yooseefa gidiyoogaa, etappe issoynne eribeenna. Yooseefi haˈˈi ba aawaa naata 10⁠ta paaccanau issibaa oottiis.

I ba ashkkarati eta ubbaa ogoruwan kattaa kunttanaadan oottiis. SHin eti erennan, ba dumma bira wanccaa Biniyaama ogoro giddon yegissiis. Eti ubbay kiyidi guutta ogiyaa boogaappe guyyiyan, Yooseefi ba ashkkarata eta geeduwaa kiittiis. Ashkkarati etakko gakkidi: ‘Nu godaa bira wanccaa ayssi wuuqqidetii?’ yaagidosona.

Ishantti ubbaykka: ‘Nuuni a wanccaa wuuqqibookko’ yaagidosona. ‘Intte he wanccaa nu giddon ooppenne demmikko, he asi hayqqo’ yaagidosona.

Yaatin, ashkkarati ubbaa ogoruwaa giddon koyidi, Biniyaama ogoruwaa giddoppe, ha misiliyan neeni beˈiyoogaadan, he wanccaa demmidosona. Ashkkarati: ‘Biniyaami attin intte ubbay baana danddayeeta shin, i nunaara baana koshshees’ yaagidosona. Haˈˈi a aawaa naati 10y waanana deˈiyoonaa?

Eti ubbay Biniyaamaara Yooseefa so simmidosona. Yooseefi ba ishantta: ‘Intte ubbay soo baana danddayeeta shin, Biniyaami hagan attidi taassi aylle gidana bessees’ yaagiis.

Yihuday hagaadan giis: ‘Taani naˈaa ekkennan soo simmikko, ta aaway naˈaa keehi siiqiyo gishshau hayqqana. Hegaa gishshau, hayyana tana ne aylle oottada naˈaa soo yedda’ yaagiis.

Yooseefi ba ishantti laamettidoogaa erana danddayiis. Eti haˈˈi kaseegaadan qareti baynna iita asa gidokkona. Haˈˈi Yooseefi ay oottidaakko ane beˈoos.