YOOSEEFI bayzettidi Gibxxe biido wode a layttay mexi 17. Yan qassi PHoxiifaara geetettiya bitaniyau bayzettiis. PHoxiifaari Paaroona geetettiya Gibxxe kawuwaa oosanchcha.

Yooseefi ba godaa PHoxiifaarassi minnidi oottees. Yooseefi gitatido wode, PHoxiifaari baassi deˈiya ubbaban a halaqa oottiis. Yaatin, Yooseefi hagan ayssi qasho keettaa gelidee? Hegee hanidoy PHooxifaara machchee gaasuwaana.

Yooseefi diccidi meraa daro loˈˈiya asa gidin, PHoxiifaara machchiyaa i banaara zinˈˈanaadan koyaasu. SHin Yooseefi hegee bala gidiyoogaa eriyo gishshau hegaadan oottenna. PHoxiifaara machchiyaa keehippe yiillotaasu. Hegaa gishsau, i azinay soo yin, ayyo: ‘He iita Yooseefi tanaara zinˈˈana maliis’ yaagada worddotaasu. PHoxiifaari ba machchiyaa odidoogaa ammanidi, Yooseefa bolli keehi yiillotiis. Hegaa gishshau, a qasho keettan yeggiis.

Qasho keettaa halaqa gidida bitanee Yooseefi loˈˈo asa gidiyoogaa gamˈˈennan eriis. Hegaa gishshau, Yooseefa qasho keettan deˈiya haraatuyyo halaqa oottiis. Takkidi Paarooni baassi eessaa tigiyaagaa bollinne oyttaa uukkiyaagaa bolli yiillotidi, eta qasho keetti yegissiis. Issi galla qammi eti naaˈˈaykka issi dumma aymo aymottidosona; shin bantta aymuwaa birshshettay aybakko eribookkona. Wonttetta gallassi Yooseefi: ‘Intte aymuwaa taayyo yootite’ yaagiis. Eti yootin, Xoossaappe maaduwaa demmidi Yooseefi eta aymuwaa birshshettaa qonccissiis.

Eessaa tigiyaagaassi Yooseefi: ‘Heezzu gallassatu giddon neeni qashuwaappe birshshettada kaseegaadankka Paaroonassi eessaa tigiyaagaa gidana’ yaagiis. Yooseefi gujjidikka: ‘Neeni kiyido wode, tabaa Paaroonayyo yootada ha sohuwaappe kiyanaadan tana maadda’ yaagiis. SHin oyttaa uukkiyaagaa Yooseefi: ‘Heezzu gallassatu giddon Paarooni ne qooriyaa muucissana’ yaagiis.

Heezzu gallassa giddon Yooseefi giidoogaadan haniis. Paarooni oyttaa uukkiyaagaa qooriyaa muucissiis. SHin eessaa tigiyaagee qasho keettaappe kiyidi, kawuwaassi kaseegaadan oottiyoogaa doommiis. SHin eessaa tigiyaagee Yooseefabaa ubbaa dogi aggiis! I Paaroonassi abaa odibeenna gishshau, Yooseefi qasho keettan takkiis.