HAGAN ay beˈay? Ee, bootta parata toggida olanchchata. SHin eti auppe yiiddi deˈiyaakko akeeka. Parati shaaraa giddoora saluwaappe duge priixiiddi deˈoosona! Saluwan tumuppe parati deˈiyoonaa?

CHii, ha parati tumu para gidokkona. Hegaa nuuni eriyoy, pari shaara giddon priixana danddayenna gishshataassa; danddayiiyye? SHin Geeshsha Maxaafay saluwan deˈiya paratubaa yootees. Geeshsha Maxaafay hegaadan ayssi giyakko eray?

Geeshsha Maxaafay hegaadan giyoy, beni olaa olettiyo wode, parati daro maaddiyo gishshataassa. Yaatiyo gishshau, Xoossay asaara saˈan olettana oli deˈiyoogaa bessanau, Geeshsha Maxaafay saluwaappe duge priixiya paratubaa yootees. He olaa sohoy ayba geetettiyaakko eray? Armmageedoona geetettees. He olay saˈaappe iitatetta ubbaa xayssana.

Ha Armmageedoona olaa Kaalettanaagee Yesuusa. Yihooway Ba kawotettaassi kawo gidanaadan dooridoy Yesuusa gidiyoogaa hassaya. Yesuusi kawo kallachchaa huuphiyan wottidoy hegaassa. Bisoy qassi i Xoossaa morkketa ubbaa woranaagaa bessees. Xoossay iita asaa ubbaa xayssanaagee nuna garamana bessii?

Simmada ane 10tta Taarikiyaa xeella. Yan ay beˈay? Ee, iita asata xayssida wolqqaama Bashsha Haattaa beˈaasa. He Bashsha Haattaa ehiiday oonee? Xoossaa Yihoowa. Haˈˈi 15tta Taarikiyaa xeella. Hegan aybi haniiddi deˈii? Sadoomanne Gamoora katamati Yihooway yeddido taman xayiiddi deˈoosona.

Ane 33tta Taarikiyaa kessa. Gibxxetu paratinne para gaareti waaniiddi deˈiyaakko beˈa. Haattay eta bolli goggi agganaadan oottidaagee oonee? Yihoowa. I hegaa oottidoy ba asaa ashshanaassa. Qassi 76tta Taarikiyaa xeella. Hegan Yihooway eta iitatettaa gishshau, ba asaa Israaˈeelatakka xayanaadan oottidoogaa beˈaasa.

Hegaa gishshau, Yihooway saluwaa olanchchata kiittidi, saˈan deˈiya iitatetta ubbaa xayssanaagan, nuuni garamettana bessenna. SHin hegee ayba giyoogaakko ane qoppa! Kaalliya sinttaa neeni kessin ane beˈoos.