HA GATIMAAPPE woy xamˈˈaappe lauziyaa giyo mittay ciyyin, ayfee teeridi kaˈaagaa beˈa. Hegee Aarona gatimaa. Ha ciishshaynne teera ayfee Aaroona gatiman kiyidoy issi qamma xallaana! Hegee ayssi hanidaakko ane beˈoos.

Israaˈeeleti guutta wodiyau bazzuwan toylattoogaappe guyyiyan, asaappe amaridaageeti Muusee kaalettiyoogaanne Aarooni qeese halaqa gidiyoogaa koyibookkona. Hegaadan qoppidaageetuppe issoy Qoraaha, harati qassi Daataana, Abiiraamanne asaa kaalettiya 250⁠u asata. Hegeeti ubbay Muusekko yiidi: ‘Neeni ayssi nu bolli ne huuphiyaa xoqqu xoqqu oottay?’ yaagidosona.

Muusee Qoraahassinne a kaalliyaageetussi: ‘Wontto maallado ixaanaa cuwayiyoogeeta ekkidi, ixaanaa wottite. Hegaappe Yihoowa dunkkaaniyau yiite. Yihooway oona dooriyaakko nuuni beˈana’ yaagiis.

Wonttetta gallassi Qoraahinne a kaalliya 250⁠u asati dunkkaaniyaakko yiidosona. Hara daro asay eta maaddanau yiidosona. Yihooway keehippe yiillotiis. Muusee: ‘Ha iita asatu dunkkaaniyaappe haakkidi eqqite. Etabaa gididabaa aybanne bochchoppite’ yaagiis. Asay siyidi, Qoraaha, Daataananne Abiiraama dunkkaaniyaa lanqqeppe haakkidosona.

Hegaappe Muusee: ‘Yihooway dooridoy oonakko intte hagan erana. Biittay dooyettidi ha iita asata mittana’ yaagiis.

Muusee haasaya essosaarakka, biittay dooyetti bayiis. Qoraahinne assi deˈiyaaba ubbaynne Daataaninne Abiiraami qassi etaara deˈiyaageeti ollan duge gelin, biittay eta kammi bayiis. Duge ollau wodhdhiya asay waassiyo waasuwaa asay siyidi: ‘Biittay nunakka mittennaadan, woxxoos!’ yaagidosona.

Qoraahinne a kaalliya 250⁠u asati haˈˈikka dunkkaaniyaa matan deˈoosona. Hegaappe Yihooway tamaa yeddidi eta ubbaa xuuggi bayiis. Hegaappe Yihooway Aaroona naˈaa Elˈˈaazari, hayqqida asatu cuwayiyoobata leeˈissi qoxxidi, yarshshuwaa saaxiniyaa kammiyoobaa medhdhanaadan yootiis. Ha yarshshuwaa saaxiniyaa kammiyoobay, Aaroonanne a naatuppe attin, hara ooninne banttana Yihoowassi qeese giidi oottennaadan hassayissiya malaata gidiis.

SHin Yihooway Aarooninne a naati qeese gidanaadan dooriday bana gidiyoogaa keehippe qonccissanau koyiis. Yaatiyo gishshau, Muusessi yaagiis: ‘Israaˈeeletu zare halaqati ubbay bantta gatimaa gatimaa ehaanaadan oda. Leewa zaretuppe Aarooni ba gatimaa ehaanaadan oda. Hegaappe, he gatimata ubbaa dunkkaaniyaa giddon maachchaa taabootaa sinttan wotta. Taani qeesedan doorido asa gatimay ciiyyana’ yaagiis.

Wonttetta gallassi maallado Muusee xeelliyo wode, Aaroona gatimay ciishshaa ciiyyiisinne lauziyaa ayfiyaa teeri uttiis! Yaatin, Yihooway Aaroona gatimay ciiyyanaadan ayssi oottidaakko haˈˈi eradii?