YAASA beˈa. I: ‘Awau wullennan taakka!’ yaagiiddi deˈees. Awaykka wullennan takkiis. Away kumetta gallassaa saluwau giddo ginan takkiis. Hegee hananaadan oottiday Yihoowa. SHin away wullennan takkanaadan Yaasu koyidoy aybissakko ane beˈoos.

He ichchashu iita Kanaane kawoti Gabaaˈoonatuura olettiyoogaa doommin, Gabaaˈoonati maaduwaa demmanau issi bitaniyaa Yaasukko kiittidosona. Bitanee: ‘Eesuwan nuukko ya! Nuna ashsha! Gezze biittan deˈiya kawoti ubbay ne ashkkarata olanau yi uttidosona’ yaagiis.

Yaasunne a olanchchati ubbay sohuwaara denddidi biidosona. Kumetta qammaa hemettidosona. Eti Gabaaˈoona gakkin, he ichchashu kawotu wotaaddarati yayyidi, baqatiyoogaa doommidosona. Hegaappe Yihooway wolqqaama shachchaa saluwaappe bukissin, Yaasu olanchchati worido wotaaddaratuppe shachchay woridoogeeti daridosona.

Away gamˈˈennan wullanagaa Yaasu eriis. Qammiyo wode, he iita ichchashu kawotu wotaaddaratuppe daroti baqatana. Yaatin Yaasu Yihoowakko woossi simmidi: ‘Awau, wullennan takka!’ yaagidoy hegaassa. Away wullennan takkiyaaba gidikko, Israaˈeeleti olan wurssi xoonana danddayoosona.

Xoossaa asaa ixxiya hara daro iita kawoti Kanaanen deˈoosona. Yaasunne a olanchchati he biittan deˈiya 31 kawota xoonanau, usuppun laytta gidiyaagaa ekkiis. Hegee hani simmin, Yaasu gadee biron imettana koshshiyo zaretuyyo Kanaane biittaa shaakki immanau deˈees.

Daro layttay aadhdhi simmin, wurssettan Yaasu 110⁠u layttan hayqqiis. Inne a laggeti deˈido wode ubban, asay Yihoowayyo azazettiis. SHin ha loˈˈo asati hayqqin, asay iitabaa oottiyoogaa doommidi metuwan geliis. Xoossaa maadoy eta tumuppe koshshidoy he wodiyaana.