KANAANEN deˈiya katamatuppe daroti Israaˈeeletuura olettanau giigettiiddi deˈoosona. Eti Israaˈeeleta xoonana danddayiyaabadan qoppidosona. SHin he heera katamaa Gabaaˈoonan deˈiya asatussi hegaadan milatibeenna. Israaˈeeleta Xoossay maaddiiddi deˈiyoogaa eti ammanidi, Xoossaara olettanau koyibookkona. Yaanin Gabaaˈoonati ay oottidaakko ne eray?

Eti keehi haahosan deˈiya asa milatanau qofaa qachchidosona. Hegaa gishshau, he asatuppe issoti issoti wurida ceega maayuwaa maayidosonanne ceega caammaa wottidosona. Eti bantta haretun melida oyttaa ceega joynetun caanidi, shinqqiyaassi oyqqidosona. Hegaappe Yaasukko biidi yaagidosona: ‘Nuuni intte wolqqaama Xoossaa Yihoowabaa siyidi keehi haaho biittappe yiida. Inttessi i Gibxxen oottidobaa ubbaa siyida. Yaatiyo gishshau, nu halaqati nuuni shinqqiyaa giigissanaadaaninne inttekko yiidi: “Nuuni intte ashkkarata. Intte nunaara olettennaagaadan nuussi qaalaa gelite” gaanaadan yootidosona. Adussa ogiyaa hemettidoogaappe denddidaagan, nu maayoy wuridoogaanne nu shinqqeekka puulummidi melidoogaa beˈana danddayeeta’ yaagidosona.

Yaasunne asaa kaalettiyaa haraati, Gabaaˈoonati giidobaa ammanidosona. Hegaa gishshau, etaara olettennaagau etassi qaalaa gelidosona. SHin heezzu gallassappe guyyiyan, Gabaaˈoonati bantta shooron deˈiyaageeta gidiyoogaa eti eridosona.

Yaasu eta: ‘Nuuni daro haaho biittaappe yiida’ giidi, aybissi nuna cimmidetii?’ yaagidi oychchiis.

Gabaaˈoonati zaariiddi: ‘Nu hegaa oottidoy, intte Xoossaa Yihooway ha Kanaane biittaa ubbaa inttessi immanaagau qaalaa gelidoogaa siyido gishshataassa. Hegaa gishshau, intte nuna woreeta giidi yayyida’ yaagidosona. SHin Israaˈeeleti bantta qaalaa naagidi, Gabaaˈoonata woribookkona. Hegaappe eta banttassi ashkkara oottidosona.

Gabaaˈoona asati Israaˈeeletuura saruwan deˈanau maacettido gishshau, Yerusalaame kawoy yiillotiis. Yaatiyo gishshau, i hara oyddu kawota: ‘Gabaaˈoonata olanaadan yiidi tana maaddite’ yaagiis. He ichchashu kawoti oottidobaykka hegaa. Israaˈeeletuura saruwan deˈanau maacettido gaasuwan, ha kawoti eta olanau denddikko, Gabaaˈoonati oottobay cinccatettee? Ane beˈana.