HA KEETTAY aybakko eray? Hegee Yihoowayyo goynniyo dumma dunkkaane. I gayttiyo dunkkaaniyaakka geetetti xeegettees. Asay Gibxxeppe kiyido issi layttappe guyyiyan a keexxi wurssidosona. I keexettanaadan qofaa shiishshiday oonakko eray?

Qofaa shiishshidaagee Yihoowa. Muusee Siina Deriyaa huuphiyan deˈishin, dunkkaaniyaa waatidi keexxanaakko, Yihooway assi yootiis. I dunkkaanee kolanau metennaagaa gididi oosettanaadan yootiis. Hegaa mala ogiyan koletti shaahettidaageeti hara sohuwaa tooketti bin, dunkkaanee yan wodhdhi eqqidi tolettana danddayees. Hegaa gishshau, Israaˈeeleti bazzuwan issisaappe harasaa biiddi, dunkkaaniyaa tookki ekkidi yuuyidosona.

Dunkkaaniyaayyo issi bagga gaxan deˈiya guutta kifiliyaa gidduwaa xeellikko, issi saaxiniyaa beˈana danddayaasa. Hegee maachchaa taabootaa geetettees. Ayyo naaˈˈu bagga gaxaara worqqaappe merettida naaˈˈu kiitanchchati woykko kiruubeti deˈoosona. Muusee koyiroogeeta menttido gishshau, Xoossay Tammu Azazota zaarettidikka masettida shuchchan xaafiis. He naaˈˈu shuchchati maachchaa taabootaa giddon yegettidosona. Qassi, mannaa qolido xaaroykka a giddon yegettiis. Mannay aybakko hassayay?

Yihooway qeestu halaqa oottidi dooridoy Muuse ishaa Aaroona. Asay Yihoowassi goynniyoogan i kaalettees. A naatikka qeese.

Dunkkaaniyau aakkiya kifiliyaa ane haˈˈi xeella. I he guutta kifiliyaappe naaˈˈu kushe darees. Appe cuway kiyiiddi deˈiyo issi guutta saaxiniyaa beˈay? Hegee qeeseti a bolli sawiya ixaanaa cuwayiyo saaxiniyaa. Laappun xomppeta wottiyo ballaykka deˈees. He kifiliyan deˈiya heezzanttobay qassi xaraphpheezaa. A bollan 12⁠u baso oyttati uttoosona.

Gayttiyo dunkkaaniyaa dirssa giddon, haattay kumi uttido aaho keree deˈees. Qeeseti a meecettanau goˈettoosona. Hegan yarshshuwaa yarshshiyoosaykka deˈees. SHukkido mehee yan xuuggiyo yarshsho gididi Yihoowayyo shiiqees. Gayttiyo dunkkaanee asay dunkkaanidosaassi gidduwan deˈees; Israaˈeeleti ubbay qassi a yuushshuwan bantta dunkkaaniyan dunkkaaniyan deˈoosona.