HA GUUTTA naˈay loˈˈennee? A sunttay Sameela. Qassi ba kushiyaa Sameela huuphiyan wottidaagee, Israaˈeele qeesetu halaqaa Eela. Sameela Eelakko ehiiddi deˈiyageeti hegeeti, a aawaa Elqqaananne a aayyiyo Haanno.

Sameeli mexi oyddu woykko ichchashu laytta naˈa. SHin i Eelaaranne hara qeesetuura, hagan Yihoowa dunkkaaniyan deˈana. Elqqaaninne Haanna ha qii guutta naˈaa Sameela, Yihoowa dunkkaaniyan oottanaadan immidoy aybissee? Ane beˈoos.

Guutta layttappe kase Haanna keehi azzanaasu. Hegau gaasoy, Haannissi naˈi baynnaagaa gidishin, a naˈa yelanau keehippe amottausu. Hegaa gishshau, Haanna Yihoowa dunkkaaniyaa biido wode, Yihoowakko: ‘Abeet Yihoowau, tana dogoppa! Ne taassi naˈa immikko, i ba deˈo laytta ubban neeyyo oottanaadan ta a neessi immanau qaalaa gelayis’ yaagada woossaasu.

Yihooway Haanni woosaa siyin, amarida aginatuppe guyyiyan a Sameela yelaasu. Haanna ba guutta naˈaa siiqiyo gishshau, i qii guuttan deˈishin doommada Yihoowabaa a tamaarissaasu. Ba azinaassi: ‘Sameeli xanttaa duuttosaara, i yan Yihoowassi oottanaadan taani a gayttiyo dunkkaanee deˈiyosaa ekka baana’ yaagaasu.

Ha misiliyan Elqqaaninne Haanna oottishin nu beˈiyoogeekka hegaa. Qassi a yelidaageeti Yihoowabaa a loyttidi tamaarissido gishshau, Sameeli hagan Yihoowa dunkkaaniyan Yihoowassi oottana danddayidoogan daro ufayttiis. Haannanne Elqqaani layttan layttan he dumma dunkkaaniyan goynnanaunne bantta guutta naˈaa beˈanau yoosona. Qassi layttan layttan Haanna Sameelassi, a giigissido ooratta qoliyaa ekkada yausu.

Layttaappe layttay aadhdhi aadhdhi biyo wode, Sameeli Yihoowa dunkkaaniyan oottiyoogaa aggibeenna gishshau, Yihoowaynne asay a dosoosona. SHin qeesetu halaqaa Eela naati Hofiniininne Piinihaasi, loˈˈo asa gidokkona. Eti daro iitabaa oottidosonanne hara asaykka Yihoowassi azazettennaadan oottoosona. Eeli eta qeesetettaappe diggana bessees shin diggibeenna.

Dunkkaane giddon oosettiya iitabay, yelaga Sameela Yihoowassi oottiyoogaa agganaadan oottibeenna. SHin Yihoowa wozanappe siiqiya asay keehi guutta gidiyo gishshau, Yihooway asaa haasayisoosappe daro wodee aadhdhiis. Sameeli guuttaa gitatoogaappe guyyiyan hanettidabay kaallidi deˈiyaagaa:

Sameeli Yihoowa dunkkaane giddon xiskkidaashin, issi cenggurssay a xeesin beegotiis. Yaatin i ‘Yee’ yaagidi koyiis. Denddidi Eelakko woxxi biidi, ‘Neeni xeesin hekko yaas’ yaagiis.

SHin Eeli zaaridi: ‘Taani nena xeesabeykke, baada zinˈˈa’ yaagiis. Yaagin Sameeli biidi zinˈˈiis.

Hegaappe: ‘Sameelaa!’ giidi naaˈˈanttuwaa xeesiis. Sameeli denddidi zaarettidikka Eelakko woxxi biidi, ‘Neeni xeesin hekko yaas’ yaagiis. SHin Eeli zaaridi: ‘Ta naˈau ta nena xeesabeykke. Haˈˈikka baada zinˈˈa’ yaagiis. Yaagin Sameeli biidi zinˈˈiis.

He cenggurssay heezzanttuwaakka: ‘Sameelaa!’ yaagidi xeesiis. Yaatin Sameeli Eelakko woxxi biidi, ‘Tana haˈˈi xeesiday nena gidana, hekko yaas’ yaagiis. Eeli naˈaa xeesiyaagee Yihoowa gidiyoogaa haˈˈi eriis. Yaatiyo gishshau, Eeli Sameela: ‘Haˈˈikka baada zinˈˈa; zaarettidi xeesiyaaba gidikko, “Yihoowau, yoota; taani ne ashkkaray siyayis” yaaga’ yaagiis.

Yihooway zaarettidi xeesin, Sameeli hegaadan giidi zaariis. Hegaappe Yihooway Eelanne a naata qaxxayanaagaa Sameelassi yootiis. Takkidi Hofiniininne Piinihaasi Pilisxxeematuura olettiiddi hayqqidosona; qassi Eeli hanidabaa siyido wode kunddidi, garbbalee meqqin ikka hayqqiis. Yaatiyo gishshau, Yihooway giidobay polettiis.

Sameeli diccidi, Israaˈeelen wurssetta daanna gidiis. I cimido wode, asay a: ‘Nuna haariya kawuwaa doora’ yaagidi oychchiis. Yihooway tumuppe etayyo kawo gidiyo gishshau, Sameeli hegaadan oottana koyibeenna. SHin asay giyoobaa siyanaadan Yihooway assi yootiis.