HAREE haasayishin siya eray? ‘CHii, mehee haasayana danddayenna’ geennan aggakka. SHin Geeshsha Maxaafay issi hariyaa haasayidoogaa yootees. Hegee waanidi hanidaakko ane beˈoos.

Israaˈeeleti Kanaane biitti gelanau giigi uttidosona. Mooˈaaba kawoy Baalaaqi Israaˈeeleta yayyiis. Yaatiyo gishshau, i issi Balaama giyo eranchcha bitanee Israaˈeeleta qangganau yaanaadan asa kiittiis. Baalaaqi ayyo daro miishshaa immanau qaalaa gelido gishshau, Balaami ba hariyo toggidi Baalaaqan gayttanau biyoogaa doommiis.

Yihooway Ba asaa Balaami qangganaadan koyibeenna. Yaatiyo gishshau, adussa bisuwaa oyqqida issi kiitanchchay ogiyan eqqidi Balaama teqqana mala kiittiis. Balaami kiitanchchaa beˈana danddayibeennashin, a hariyaa beˈaasu. Yaatiyo gishshau, hariyaa kiitanchchaappe baqataydda takkada, wurssettan ogiyan zinˈˈa aggaasu. Balaami keehin yiillotidi, ba hariyo gatiman bukkiis.

Yaatin hariyaa haasayishin Balaami siyanaadan Yihooway oottiis. Hariyaa: ‘Taani neeyyo ay oottiinne neeni tana bukkiyoy?’ yaagada oychchaasu.

Balaami: ‘Neeni tana eyya kessadassa. Tau bisoy deˈiyaakko, ta nena woranashin!’ yaagiis.

Hariyaa: ‘Taani neeyyo hagaadan hana eriyanaayye?’ yaagada oychchaasu.

Balaami: ‘Hana erakka’ yaagidi zaariis.

Hegaappe guyyiyan, Yihooway Balaama ayfiyaa dooyin, kiitanchchay bisuwaa oyqqidi ogiyan eqqidaagaa beˈiis. Kiitanchchay: ‘Ne hariyo ayssi bukkadii? Israaˈeeleta qangganau neeni beennaadan, taani nena teqqanau yaas. Hariyaa wora simmabeennabaa gidiyaakko, taani nena worada, hariyo ashshana shin’ yaagiis.

Balaami: ‘Taani nagaraa oottaas. Neeni ogiyan eqqidoogaa taani erabeykke’ yaagiis. Kiitanchchay Balaama baanaadan yeddin, Balaami Baalaaqaara gayttanau biis. I haˈˈikka Israaˈeeleta qangganau maliis; shin Yihooway heezzuttoo, i qanggiyoogaappe anjjanaadan oottiis.