HA BITANEE ba dunkkaane giddon ay qottiiddi deˈiyaakko beˈa! Issi loˈˈiya maayuwaa, worqqaanne amarida xaqara biraa qottees. I hegeeta Yarkko katamaappe ehiis. SHin Yarkkon deˈiyabata waatanau bessii? Hegaa ne hassayay?

Hegeeti xayana koshshees; qassi biraynne worqqay Yihoowa dunkkaaniyaa buquraa minjjiyoosan uttana bessees. Yaatiyo gishshau, ha asay Yihoowassi azazettibeenna. Eti Xoossaabaa gididabaa wuuqqidosona. Bitaniyaa sunttay Akkaana, qassi aara deˈiyaageeti a so asata. Aybi hanidaakko ane beˈoos.

Akkaani hegeeta wuuqqi simmin, Yaasu Aaya katamaa olanaadan amarida asata kiittiis. SHin eti olan xoonettidosona. Amaridaageeti hayqqidosona, attidaageeti qassi baqatidosona. Yaasu keehippe azzaniis. I saˈan gufannidi Yihoowakko woossiiddi: ‘Hagee nu bolli gakkanaadan ayssi oottadii?’ yaagiis.

Yihooway zariddi: ‘Dendda eqqa! Israaˈeeleti nagaraa oottidosona. Eti xayana koshshiyaabaappe woy Yihoowa dunkkaaniyau imettana bessiyaabaappe amaraa ekkidosona. Eti issi loˈˈiya maayuwaa wuuqqidi qottidosona. He maayuwaanne wuuqida bitaniyaa intte xayssennan taani inttena anjjikke’ yaagiis. Yihooway Yaasussi he iita bitanee oonakko bessanaagaa yootiis.

Yaatiyo gishshau, Yaasu asaa ubbaa shiishshin, Yihooway he iita bitaniyaa Akkaana asaa giddoppe kessi bayiis. Akkaani hagaadan yaagiis: ‘Taani nagaraa oottaas. Issi loˈˈiyaa mayuwaa, worqqaanne xaqara biraa beˈaas. Beˈada keehippe amottido gishshau ekkaas. Hegeeti ta dunkkaaniyaa giddon moogetti uttidaageeta biidi demmana danddayeeta’ yaagiis.

Hegeeta asay demmidi Yaasukko ehin, Yaasu Akkaana: ‘Ha metuwaa nu bolli ayssi ehaadii? Yihoowaykka ne bolli metuwaa ehaana!’ yaagiis. Yaatin, asay ubbay Akkaananne a soo asaa shuchchan caddidi woridosona. Nubaa gidennabaa mule nuussi ekkana koshshennaagaa hegee bessenee?

Hegaappe guyyiyan, Israaˈeeleti Aaya katamaa olanau zaarettidi biidosona. He wodiyan Yihooway ba asaa maaddin, eti olan xoonidosona.