ASAY saˈaappe maxiiddi deˈiyoy aybakko eray? Hegee suuppa shachcha milatees. Hegee bootta, leeˈenne shuqo keena. SHin hegee miyobappe attin shachcha gidenna.

Israaˈeeleti Gibxxeppe kiyoosappe mexi issi agina gidiyaagee aadhdhiis. Eti haˈˈi bazzon deˈoosona. Hegan mokkiya kattay keehi laafa gidiyo gishshau, asay zuuzummiiddi: ‘Yihooway nuuni Gibxxen deˈishin nuna woridaakko loˈˈo shin. Yan nuuni koyido qumaa ubbaa miida’ yaagidosona.

Yaatin Yihooway: ‘Taani qumaa saluwaappe duge bukissana’ yaagiis. Yihooway oottidoykka hegaadaana. Wonttetta gallassi maallado Israaˈeeleti saluwaappe wodhdhida he boottabaa beˈidi, issoy issuwaa, ‘Hagee aybee?’ yaagidi oychchidosona.

Muusee: ‘Hagee intte maanaadan Yihooway immido qumaa’ yaagiis. Asay he qumaa ‘MANNAA’ yaagidi xeesiis. I eessaara uukkido leeˈe oyttadan malˈˈees.

Musee asaayyo: ‘Intte huuphiyan huuphiyan issi uri miyoogaa keenaa xallaa maxite’ yaagiis. Yatiyo gishshau, asay ubba gallassi maallado oottidoy hegaadaana. Hegaappe, away michchiyo wode, saˈan attida mannay seeri aggees.

Muusee gujjidikka ‘Ooninne wonttossi mannaappe ashshoppo’ yaagiis. SHin asaappe issoti issoti azazettennan ixxidosona. Yaatin aybi hanidaakko eray? Wonttetta gallassi maallado eti ashshido mannay guxunidi, xinqqiyoogaa doommiis.

Gidikkokka, saaminttan hara gallassaagaappe naaˈˈu kushe dariya mannaa shiishshanaadan, Yihooway yootido issi gallassay deˈees. Hegee usuppuntta gallassaa. Yihooway laappuntta gallassan ayba manninne wodhdhanaadan oottenna gishshau, usuppuntta gallassi maxidoogaappe kaalliya gallassaayyo ashshanaadan etassi yootiis. Eti laappuntta gallassau mannaappe ashshin, guxunibeennanne xinqqibeenna! Hegee hara maalaalissiyaaba!

Israaˈeeleti bazzon deˈido wode ubban, Yihooway eta mannaa miziis.