MITTAA bolli xaaxetti uttidaagee tumu shooshsha milatii? Tumu shooshsha gidenna. He shooshshay nahaase birataappe merettiis. Asay he shooshshaa beˈidi attanaadan mittaa bolli a kaqqana mala Yihooway Muusessi yootiis. SHin saˈan deˈiya hara shooshshati, tumu shooshsha. Eti asaa dukkin, asay sahettiis. Aybissakko eray?

Israaˈeele asay Xoossaa bollinne Muuse bolli zuuzummido gishshataassa. Eti: ‘Nuuni bazzuwan hayqqanaadan Gibxxeppe ayssi ehadii? Ha sohuwan qumi woy haatti baawa. Hagaappe guyye ha mannaa maana danddayokko’ yaagidi zuuzummidosona.

SHin mannay loˈˈo quma. Yihooway etau mannaa immidoy maalaalissiya ogiyaana. Qassi haattaakka etau immidoy maalaalissiya ogiyaana. SHin Xoossay eta naagidi oyqqido hanotaassi asay galata xayiis. Yaatiyo gishshau, Yihooway Israaˈeeleta qaxxayanau marzziyaara deˈiya ha shooshshata yeddiis. Shooshshati eta dukkin, etappe daroti hayqqidosona.

Wurssettan asay Muusekko yiidi: ‘Nuuni Yihoowa bollinne ne bolli zuuzummidi, nagaraa oottida. Ha shooshshata diggana mala, Yihoowa woossa’ yaagidosona.

Hegaa gishshau, Muusee asaassi woossiis. Yaatin, Yihooway ha nahaase shooshshaa medhdhanaadan Muusessi yootiis. Dukettida asi ooninne xeellana mala, a mittan kaqqanaadan yootiis. Muusee Xoossay giidoogaadan oottiis. Qassi dukettida asay nahaasiyaa shooshshaa xeellidi paxiis.

Hagaappe demmiyo timirttee deˈees. Nuuni ubbay shooshshatun dukettida Israaˈeeletuugaa mala hanotan deˈoos. Nuuni ubbay hayqqiyo hanotan deˈoos. Ubbasaa xeelliyaaba gidikko, asay ceeggiyoogaa, harggiyoogaanne hayqqiyoogaa akeekaasa. Hegee hanidoy, koyro bitaneenne maccaasiyaa, Addaameenne Hewaana, Yihoowappe haakkido gishshataassanne nuuni ubbaykka eta naata gidiyo gishshataassa. SHin Yihooway nuuni merinau deˈana danddayiyo ogiyaa giigissiis.

Yihooway ba Naˈaa, Yesuus Kiristtoosa saˈaa kiittiis. Daro asay Yesuusa iita giidi qoppido gishshau, a mittan kaqqidosona. SHin Yihooway Yesuusa nuna ashshanaadan immiis. Nuuni a xeellikkonne a kaallikko, merinaa deˈuwaa demmana danddayoos. SHin hagaa xeelliyaagan darobaa deˈishshiiddi tamaarana.