HANNO gakkanau deˈida asa ubbaappe mino gidida bitaniya sunttaa eray? I Samssoona geetettiya daannaa. Samssoonassi minotettaa immiday Yihoowa. Samssooni ubba yelettanaappe kase, Yihooway a aayeeyyo: ‘Neeni mata wode attuma naˈa yelana. I Pilisxxeematuppe Israaˈeeleta ashshanau, kasettiyaagaa gidana’ yaagiis.

Pilisxxeemati Kanaane biittan deˈiya iita asata. Etayyo daro olanchcha asay deˈiyo gishshau, Israaˈeeleta daro qohidosona. Issi gallassi Samssooni Pilisxxeemati deˈiyoosaa biiddi ogiyan deˈishin, issi wogga gaammoy gudiiddi akko yiis. SHin, Samssooni kushiyan aybanne oyqqennan he gaammuwaa woriis. Qassi iita Pilisxxeema asatuppe xeetan qoodettiyaageeta woriis.

Takkidi Samssooni Daliilo geetettiya maccaasiyo siiqiis. Pilisxxeema asaa kaalettiyaageeti, Samssoona wolqqaama oottidabay aybakko Daliila banttassi yootikko, eti ubbay huuphiyan huuphiyan issi 1,100 xaqara biraa immanau qaalaa gelidosona. Daliila he miishshaa ubbaa ekkanau koyaasu. A Samssoonanne Xoossaa asaa wozanappe siiqabuukku. Yaatiyo gishshau, a Samssoona ayssi i hegaadan wolqqaama asa gididaakko, zaara zaarada oychchaasu.

Wurssettan Daliila, Samssooni ba minotettaa xuuraa odanaadan oottaasu. I issi hagaadan yaagiis: ‘Ta huuphiyaa binnaanay ta yelettoosappe meedetti erenna. Ta yelettoosappe doommada Xoossay doorin, ayyo dummatida Naaziraawe geetettiya asa. Ta binnaanay meedettikko, taani ta wolqqaa xayayiis’ yaagiis.

Yaatin Daliila hegaa erido wode, Samssooni ba kiyuwan xiskkanaadan oottaasu. Hegaappe issi bitanee yiidi, a binnaanaa meedanaadan xeegaasu. Samssooni xiskkuwaappe denddiyo wode, a wolqqay appe xayiis. Hegaappe Pilisxxeemati soo gelidi a oyqqi aggidosona. Eti a naaˈˈu ayfiyaa kessidi, a banttayyo aylle oottidosona.

Issi gallassi Pilisxxeemati bantta xoossaa Daagonassi goynnaanau gita gibiraa giigissidi, eti Samssoona qilliccanau qasho keettaappe ehiidosona. He wode gakkanaashin, Samssoona huuphee simmidi mokkiis. Samssooni ba kushiyaa oyqqidi kaalettiya naˈaa: ‘Keettaa tookkida tuussata tana oytta’ yaagiis. Samssooni Yihooway bana minttana mala tuussata oyqqidi woossiis. I waassidi: ‘Ta Pilisxxeematuura hayqqana’ yaagiis. He gibiraa sohuwan 3,000⁠u Pilisxxeemati deˈoosona; Samssooni tuussata sugiyoogan keettay kunddin, he iita asati ubbay hayqqidosona.